عمتي صارت تستعر مني لهذه الاسباب

السلام عليكم ورحمة الله
ماتوقعت عمتي بهالسطحيه هذا وانا والكل ماخذينها العاقله الحكيمه
بداية زواجي ما اروح مكان الا وعمتي مرافقه معي وين ما اروح هي معي ومبسوطه لين انكشفت شخصيتي لها مع تكرار زياراتنا وروحاتنا
انا شخصيتي هادئه هادئه هادئه عاد كذا ربي خلقني ما اقدر اخلق لنفسي شخصيه مو شخصيتي
وتدرون عاد الهادئه فينا مجتمع الحريم مايرحمها ووشلون يستوطون حيطها اقصد الهادئه والمسالمه
صارن بعض الحريم يذبون ويرمون علي حكي وانا ارد عليهم ما اسكت بس ردي ركيك وضعيف لاني بطبعي مسالمه وهادئه وما احب المشاكل
حسيت عمتي بدت تنفر مني لاتقولون يتهيألك او انتي حساسه لا ادله كثيره تدل ان عمتي صارت تتفشل مني وتستعر وصارت تحس اني بدال لااكون زوجة الابن العزوه لها صرت سبب لفشيلتها وتطييح وجهها واني وحده ضعيفه كلا يذب عليها
صارت لو احد رمالي كلام ينقلب مودها وتصير عصبيه مره تولع من القهر مني وتتحاشى الجلوس جنبي

زوجي صار يلمحلي ان امه ماعاد تبي تروح معي اي مكان وانا بقلبي قلت بسلامتها بس اكيد حسيت بغصه واهتزت ثقتي بنفسي وهذه اول الشغلات اللي بدت عمتي تستعر وتتفشل وتبعد عني بسبتها
بعدين حملت وجاني ولد وانتم حريم وخابرين وش يصير بالوزن بعد الولاده زااد وزني لاتقولون سوي رجيم اكيد اني قاعده اشتغل على نفسي ويوم اخبص ويوم اشد الهمه بس تدرون الرجيم يبي له اراده من حديييييد المهم عمتي صارت تزاور الناس لوحدها و ماتحب تتواجد معي بمكان واحد يحمر وجهها ويصير الوان خصوصا يوم العيد لان الايام الباقيه تقدر تهرب مني وتروح لوحدها اما العيد اجباري راح نتصادف انا وهي ببيت اي احد لانه عيد وفعلا هي كانت تعايد احد البيوت وانا مدري وطبيت على نفس العايله اللي كانت تعايدهم يوم دخلت كانت تضحك مع الحريم ومتشققه من الفرحه وبس شافتني دخلت ياربي تغيرت ملامحها لعصبييه كن احد صفقها كف والله يا اخوات الصيحه وقفت بحلقي خنقتني ولو مو العيب بكيت قدام الناس الله لايذوقها لوحده منكم المهم سلمت وهي قامت راحت و جلست بعيييد ووجهها مقلوب ولونه احمر احمر ومعصبه وانا اناظرها ابي اكذب ظنوني وعيوني لكن ابد وفجأه صارت حركه غريبه شفتها تناظر وتتأمل وحده قريبتي بنفس عمري متزوجه وعندها 3اطفال وجسمها نحيف انا اراقب نظراتها للبنت وشوي لفت وناظرتني بعصبييييه وقهر واضح كانت تقارن جداا واضح كانت تناظر جسم البنت من فووق لتحت وتركت المجلس كله والتفتت علي انا من دون كل الحريم والله شفت الحسره والتفشيل بعيونها
واذكر صار موقف بالعيد كنا انا وهي بوحده من البيوت وطبعا ماتكلمني وبعيده ومطيره عيونها وحواجبها وكلمتها على شي ردت بدون نفس انا احترمت نفسي وقضبت ارضي ولاكلمتها خلاص صرت العب بجوالي وهي عيونها مبققه عالبنات المتزوجات اللي بنفس عمري وتناظرها بحسره اقسم بالله العظييييم اقسم بالله ما اتوهم المهم اتصل زوجي قال اطلعي انا عند الباب سلمت على الحريم وعليها وهي تتحاشاني وبس ركبت السياره قال زوجي يوووه نسيت ارجعي و عطي امي هالكيس نسيت اعطيها اياه قلت طيب دقيت الباب ودخلت عالحريم مره ثانيه و اتفاجأ بعمتي انها صارت بدوني وحده ثااااااااااااااااااانيه! وجهها منشرح وتضحك بصوت عاااااالي والابتسامه والثقه شاقه وجهها عرفت اني مفشلتها بهدوئي ووزني الزايد
كرهتها كرهتها كرهتها بهذيك اللحظه كره ما يتصوره عقل بشر وحقدت عليها من قلب تدرون وش يعني من قلبي حقدت؟ يعني تستعر مني بس عشان شخصيتي ووزني زاد بعد الولاده ؟؟؟؟ يعني هالانسانه سطحيه لابعد حد
وحلفت لا اكون علاقات وصداقات واسويلي عزوه عشان تعرف اني مو بحاجه لها واني مو انا اللي الواحد يستعر مني
قهرتتتتتني قهرتني عمري ما انقهرت من احد ولا عمري احد تفشل مني كذا

على فكره عمتي صغييره بالعمر لسه لانها تزوجت صغيره يعني جدا صغيره ويهمها الشكل والكشخه والجمال بشكل كبير

ومواقف كثيييره تصيرلي معها ما ابي اغثكم