عمتي وبناتها!!

السلام عليكم..

أنا عرضت قصتي هون قبل فترة.. إنو أنا ××× وامي ××× وانفصلوا ماما وبابا لما كنا أنا وأخوي صغار.. وربيت ب××× لحد ما صرت بالجامعة، بعدها ماما تزوجت تحت ضغط أهلها وبابا أصر إنو أرجع ع ××× ، وسكنت عند ستي مع عمي والخدامة بس، ولانو بابا تزوج وما كنت حابة أسكن معو هو ومرتو.. وأخوي برا ال××× مشان يكمل دراستو.

أنا كتير متضايقة ويلي زاد الوضع سوء هوعمتي الكبيرة، ساكنة قريب من بيت تيتى، وكتير بتنام عند تيتى لانو زوجها بسافر كتير... عمتي قوية وما بطيقني مع إنو والله بعاملها بكل احترام وبناتها كمان نفس الشي ما عدا بنتها الوسطانية كتير طيبة، ولما بيجوا عند ستي بيضايقوني بالحكي مثلا أنا بحاول أحكي باللهجة ال××× فبقوموا بيضحكوا وبقولوا متل عدنان.. بعدين عرفت من بنت عمتي المنيحة إنو عدنان كاين ييجي في مسلسل طاش! بطنش وما برد.. ومش حابة أشكي لبابا من أولها.. بقول لحالي بلكي يبطلوا لحالهم بدل ما يصير مشاكل لانو مو ناقصني هم فوق همي والله :(

وكمان لما مثلا يسهروا عند ستي، عمتي بتشغلني أنا بس.. على جيبي وحطي وغسلي وارفعي مع إنو بناتها خمسة ما شاء الله وفي منهم أصغر مني، وما بتنادي عل خدامة بالمرة، أحيانا بتناديني من غرفتي.. عادي أنا بشتغل مو مهم بس مبينة الشغلة مقصودة حركشة.. ومش عارفة أحكي لعمتي لأ..

وكل ما ييجي نسوان عند تيتى إلا ما تجيب سيرة ماما أنا ما اتحملت مرة من المرات قلتلها عمتو بكفي لا تحكي عن ماما هيك قامت ما خلت كلمة وبتقول هاي طالعة لامها لسانها طويل.. ولو صدفت وكنت بحكي مع ماما عل تلفون وهي موجودة بتقول الله يعينو أبوكي ع فواتير تلفوناتك، مع إنو والله عل أغلب ماما هي يلي بتكون رانة علي!
وكتير من المرات بلاقي غرفتي وأغراضي حدا مفتش ولاعب فيهم لما ييجوا عنا..

عماتي التانيين كتير مناح وطيبين كتير وعندهم دين بس مو كتير بيجوا متل عمتي هاي..

أنا كتير متضايقة ومش عارفة شو الحل مع هل وضع ومع عمتي ومع الكلام الجارح والمسخرة..
وتيتى كتير طيبة بس هي كبيرة وسمعها خفيف ومش عارفة شو عم بصير أصلا..
بابا دايما مشغول بالدنيا وناسيــــــــــــــــني!
وأنا دايما بطنش حكيهم وما برد أبدا، بس بكون كتير متضايقة من جوا! وخايفة أبطل أقدر اتحمل! وما بدي يصير مشاكل لانو لسا ما صارلي زمان جاية هناك...

بدي نصائحكو يا جماعة ودعواتكو.. واعذروني بس والله برتاح لما أفضفض هون، شو أعمل بهل حالة؟؟ :(