عمركن شفتن ناس استغلالييين زي كذا ؟؟ وش السوات فيهم؟

هلا خياتي
تسيف الحال؟ عساكن بخير؟

ودي اقولكن عن شي قاهرن وباطن تسبدي من بعض الحريم الاستغلاليات
الله يهديهن

فيه وحده تقرب لنا من بعيد ونشوفه بالاجتماعات
قسم بالله تقهر حيل
تخيلو ماتشوف عليك شي الا تبيه وتحرجك قدام الحريم!

مره كنا باستراحه وكنت لابسه عقد من لايف ستايل وبوسط الحريم قعدت تناظر
وتقول يهبّل العقد ملبوس العافيه بس كان ماتبينه أبيه عندنا مناسبه!
انا طاح وجهي قدام الحريم واستحيت اقول لا
على طول فصخته وعطيتها ومعطته وعلى طول بالشنطه!!
والى يومكم مارجع!! :mad:

ومره شافت معي مجله قالت لاخلصتي تراي ابيها!!!
واخذتها وماشفتها عقبها!!

ومره رجعنا من زواج الا تتصل تبي فستان اختي
اختي استحت وعطتها بلوشي
انا يوم عرفت انقهرت وقلت ليش تعطينها وانتي توّك شاريته ومالبستيه الا بليله ومتخسره عليه
على الاقل خوذي منها لو نص المبلغ
بصراحه ماتستاهل لانها نشبه واستغلاليه بشكل
ماتشوف شي الا تبيه!

ومره تتصل علي دقه وتقطعها
انا طنشتها مو طمع بس مااحب الناس الاستغلاليين
لو مره او مرتين او عشر كان مشيتها
بس دايم كذا
واذا عطتن كولمي ومااتصلت ترسل رساله تتشرّه وتقول وش بك يافلانه صايره صقيره ماتدقين ترا ماعندي رصيد!! <<(صقيره تعني بلهجتنا بخيله لغير الناطقين بالقصمنجيه )

طيب انا وش علي منك اشحني واتصلي انتي صاحبة الحاجه!!
مو دايم كولمي!

قسم بالله يابنات استغلاليه بشكل مع انه ماقاصرها شي!!

8
8
وحده ثانيه نعرفها مجرد معرفه من بعيد
تخيلو دايم تطلب!!
مره اتصلت قالت ابي آلة المطازيز وعطيناها
ومن بكرى تتصل تبي خلاط وارسلنالها
ومن بعده تبي طاحونه وبعد كزينالها
ومن بعد بعده تبي صواني بايركس ومكنسه وطنجره ومقلاة و و و و
على بالها فاتحين محل مواعين ببيتنا:angry:

لعنبو بليستس روحي للسوق عارضن جنبه موتشحذين الناس بكل صغيره وكبيره

واللي يقهر ماعليها قاصر لاهي ولا زوجها ومو محتاجه ابد وماعليها قلّ فلوس! تلبس من اغلى شي وتسافر وتروح وتجي ابد ماعليها..
مره كنت بفشلها ويوم اتصلت معطت السماعه من امي قلت يافلانه ورى ماتشرين؟ لأن بعض الالات والاواني تُستعمل دايم وضروري تصير عندك بمطبخك وحنا دايم نحتاجها يوميا.... واذا عليك قلّ فلوس عادي نعطيك...
على بالي بتستحي وتتوب<< والله قاطه الميانه وماعليها مني!!
واتصلت بعدها!

8
8
8
وبقولكم بعد نموذج ثالث
حنا اذا تواعدنا باستراحه او شاليه كل وحده تجيب معها طبخه
ياحلى او فطاير او كيك او اي شي
وحده كل ماطلعنا وجت معنا تاخذ كل الباقي
تخيلن يابنات قسم بالله اني استحي وهي مو أنا! الله يفشّل العدو
المشكله اذا جبنا مايوكل منه ولا الربع
وبعدين قدام الحريم تقول شكلكن ماتبنّه
وتكحش الباقي باكياس مع المواعين وبدون استئذان وحنا نستحي نقولها لاتاخذينه كله!!
والحريم فوق روسهن علامات تعجب بعذرهن مستغربات

المشكله ليتها محتاجه ماقلنا شي
بس كذا ... طبع!!

8
8
وش رايكم؟ عمركم قابلتو مثل كذا؟
أنا مادري وش يحسون بوه
صدق مايستحن بعض الحريم!!