عمره سنتين ونسبة هيموجلوبين الدم 8 !!!!!!

خواتي ساعدوني بمشكلتي

ولدي عمره سنتين و5 شهور

من اسبوعين تعب جاته كحه ببلغم وزكام وحرارته ارتفعت

ووديناه المستشفى وعطوه ادويه للزكام والكحه والسخونه .. المهم تم اسبوع الحراره تروح وتجي .. وديناه المستشفى مره ثانيه .. شافته دكتورته ( وهي تتابعه من يوم صغير ) قالت لي ولدج صاير لونه اصفر خليني اسوي له تحليل دم عشان نتطمن لانه شكله غير عن اخر مره ولونه متغير
قلت لها انزين
سوت لها التحليل اطلعت نسبة هيموجلوبين الدم 8 ... والله اني استخفيت .. قالت هالنسبه مو طبيعيه لولد عمره سنتين ..
وقالت عشان نتطمن انه مافي عنده مشاكل بالدم بنسوي له تحاليل زياده
والحمدلله والشكرلله التحاليل اطلعت كلها طبيعيه وسليمه وحتى الحديد نسبته طبيعيه
فقالت الدكتوره يمكن انه يوم مرض الفيروس دخل على دمه وسبب له نقص في كريات الدم الحمراء
وان شاءالله بتعيد له التحليل بعد اسبوعين

والدكتوره اسألتني عن بوله اذا غامق قلت لها لونه فاتح وطبيعي واسألتيني عن بياض عيونه اذا مصفر قلت لها لا .. اسألتني اذا هو كسول بالحركه وخامل قلت لها ماشاءالله دايما يتحرك ويلعب .. فقالت لي لاتحاتين يمكن بس بسبب المرض قل عنده الهيموجلوبين وان شاءالله يوم نعيد التحليل يرجع طبيعي

خواتي بسألكم شنو الاكل اللي يساعد ان كريات الدم الحمراء تزيد في دمه ؟؟؟
هو فترة مرضه قل اكله وايد .. تدرون مع السخونه فديته ماكان يشتهي شي
الحين الحمدلله بدا ياكل بس للحين مو مثل قبل
وجنني ماياكل خضره .. لا بطاط ولاجزر ولاكوسا ولاطماط .. بس يحب الخس والخيار والزيتون
ومن الفواكه بس يحب الكيوي والفراوله والموز

انصحوني بأكلات اسويها له .. وشنو الخضره والفاكهه اللي تزيد دمه وتفتح شهيته مثل قبل
حاولت وياه عسل طبيعي ابد ماحبه ولاتقبله
وهالايام اعطيه فيتامينات .. هو شراب سائل احطه له في العصير .. سألت الدكتوره وقالت مايضر

بنات ريحوني والله قلبي ماكلني عليه .. انصحوني .. وقد صار هالشي مع عيالكم ورجع الدم طبيعي عندهم ؟؟؟

جزاكم الله خير