عمر جديد لحبيبي

السلام عليكم وصباحكم خيرر ..اكتب لكم قصة حبيبي وعمري وحيدي...اللي اشكر ربي عليها لهالحين اذا ذكرتها...ولدي كان عمره اربعه شهور حبيبي كان عليه جمال يبهر كل من شافه سبحان خالقه وعليه نظرات تسحر اللي علقني فيه تدرون ايش انه كاااان يحبني حيل مره مره كنت اقوم وانا مزفته ولا مصدعه واشوفه الا والضحكه وانا مالاعبته كيف عاد لو لعبته شوفو الوناسه كان يقولولي اللي عندي انتي مدلعته ....اقول كيف مادلع قلبي وهو يحبني غيررر عن كل الاطفال ...لحد ماجاء اليوم اللي ماحب اذكره ...ابدا في معاناته ومناجاتي لربي ....
جاته كحه قويه وصار يستفرغ مره مره لدرجه انه وهو نايم كان يستفرغ تخيلووو ..كنت مانام في الليل اجلس عنده اخاف يشرق وهو نايم..وديناه المستشفى الله يسامح الدكتور حنا اشتكينا عليه فيما بعد....قالنا عادي جايه برد عطوه حليب الاستفراغ..رجعنا جاء اليوم الثاني الا والولد زاد وبدا يزرق خفت وقمنا وديناه حين دخلت اخذوه قالو تنويم ع طول انا هينا قام الخوف يدب في قلبي ورجولي ماعاد شالتني قلت ليش قال الدكتور الاكسجين انقطع عنه انا سكت مابكيت بس سكت....انصدمت.....بس جواتي ناااار جواتي بركان بينفجررر...مااقدر اتكلم عشان مابكي قدام زوجي ..قال زوجي واذا نقص الاكسجين ويش يصير له ..قال الدكتور ياثر ع دماغه تخيلو دماغه؟؟؟؟؟
انا هينا صرخت انفجر البركان اللي جواتي......قلت لا..لا..لا...ولدي يحبني يعرفني يضحكللللللي....هينا وش قلت....قلت ربي ربي ربي انت عطيتنيه ربي لاتحرمني منه ربي انا ارجوووك وادعوك لاتردني وانا ابكي وابكي قلت الهي وانت جاهي خل قلبي لي ربي لاتحرمني منه ..دعيت ودعيت وماكاني دعيت في عمري قلت ربي انامقصررره في حقك ربي لاتجازيني في ولدي...ابكي وزوجي ساكت اطالعه دمعته ع طرف عينه ماااسكها عشان مايزيد الحزن علي.....
اخذوووه وماادري وين هو مرررت سااعه قلت وين هو قالو في الانعاش ..قلت يالله في الانعاااش..ليش حالته خطيره..قال الدكتور مايقدر يتنفس قلت ابشوفه ...خذونا عنده قالو البسي لبس الدخول وفصخي عباتك وعقمي يديك..دخلت الغرفه يالله مافيها غير اربع اولاد وولدي الخامس وكلهم في غيبوبه غير ولدي في وعيه شفته في منظررر...يبكي ..مجردينه بس حفاظ عليه الله يكرمكم ..حاطين له انبوب تنفس صناعي جيته دموعه ع خده قلت للمرضه ليش دموعه نازله قالت مايبي الانبوب ..يوووجعه...مسحت دموعه بيدي وحبيت كفه وهو يطالعني ودموعه تنزل مايقدر يصيح عشان الانبوب...قرات عليه الاذكار والقران وقلت ربي استودعك صغيري ربي انك لاتضيع الودائع..طلعت قلت لزوجي ابي اروح لامي ..رحت لاهلي دخلت امي خافت بكيت قالت وش فيك ماقدرت اتكلم دخلت وارتميت ع السرير وتغطيت وقعدت ابكييي..زوجي علمها جاتني امي تكلمني وتدعيله وتقولي ترى الاطفال يشفعون لاهاليهم كانه بيموووت ...تمهدلي...وانا ابكي زياده ..كانو كل اللي حولي فاقدين الامل منه ..في الليل رحنا له قالنا الدكتور الاكسجين زين وما اثر عليه سجدت ربي سجود الشكررررر ..ونزلت دموووع الفرح بدل الحزن...خبرت امي واخواتي جلسو يبكون معي من الفرحه كانو فاقدين الامل..جلس اسبوعين ع التنفس الصناعي ..بعدها دق علينا الدكتور قالنا تعالو رضعووه رحت انا طايره مسكته شلته في حضني طلعتله صدري الا يمسكه ويشرب تخيلو اسبوعين ع المغذي ماشرب حليب كان يرضع وهو ماسك صدري قعدت ابكي واشكرر ربي ..جاء الليل كلمتهم قالو رجعناله الانبوب قلت ليه قالو التنفس ضعف وبعدها بيومين شالوه وخلوه تحت الملاحظه وانا اروح له وارضعه...طلع اللي معاه انه شرقان ودخل الحليب داخل رئته وسبب له التهاب رئوي .بعدها خرجوه وقالي الدكتور احمدي ربك كتب له عمر جديد قلت ربي كرررريم ربي رحيييم ...قال ماكنا متوقعين يطلع سالم والحين عمره سنه ونص وعندي يحوس حبيبي قلبي الله يخليه لي لو تشوفونه ماشاء الله عليه قمه في الروعه ادعولي ان ربي يخليه لي هو اللحين يمشي ويناديني ماما ماما...............
اللهم مااصبح بي من نعمه فلك الحمد ولك الشكر ...صرت اردد هذا الدعاء كل يوم...