عملت بأصلي وشوفوا النتيجة

مساء الخير حبيباتي حابه استشيركم فموضوع جدا محيرني مالكم بالطويلة ادخل الموضوع ع طووول 

اهل زوجي ساكنين في الدور الارضي وانا ساكنة فأحد الشقق العلوية لكن مدخل الشقق من عندهم يعني زي ماتقولون بيت واحد مافيه خصوصية ابد وزوجي دوامة من 6 الصباح الى 6 المغرب يعني مااشوفه 
المهم زوجي ماعنده الا اختين وحدة اللحين دخلت الجامعة اول سنة (وكانت شايلة البيت ع رأسها ) وماترجع الا قبل صلاة المغرب والثانية صغيرة عمرها 12 سنة 
وخالتي أم زوجي عمرها 46 الله يديم عليها الصحة والعافية يعني  تقدر تقوم بشغل البيت والطبخ 
لكن انا يوميا انزل عندها وقت الظهر واساعدها في عفسة الغدا واغسل معهاواتغدا معها احاول اعوض نقص وجود بنتها احاول اسوي اللي علي عشان رب العالمين 
بس احيانا يكون عندي شغل فشقتي ومااقدر انزل او احس بتعب وارهاق من طلوع ونزول الدرج هذا وانا حامل في الشهر الثامن 
المشكله هنا انهم خلاص تعودوا ع نزولي عندهم واذا في يوم مانزلت تتغير معاملتهم معي ويكتمون في وجهي حتى فيه مرة مانزلت عندهم وقت الظهر نزلت العصريه ومعي صحن فطاير وكيك الا وخالتي مااادري وش فيها حسيتها متغيرة معي حتى ابو زوجي قال وينك اليوم ؟؟
والبنت الصغيرة تقول ليه اذا انتي ماتبغين تتغدين معنا اليوم ماتنزلين تغسلي اواني الغدا انا هنا انصدمت  وماعرفت وش اقول لكن كبرت عقلي و طنشتها بحكم عمرها  
واللحين محتارة هل انزل لهم كل يوم كالعادة واساعدهم علما اني ماارتاح ابدا وعندي مسؤوليات وشغل وتنظيف كمان فشقتي وانا إن شاء الله في انتظار مووولود جديد ومسؤولياتي تكبر يوم عن الثاني 
وخايفة اذا نزلت عندهم كل يومين او ثلاث يزعلوا ويقولوا هذي قاطعة و .. و .. وانا بصراحة نفسيتي خاصة هاليومين ماتستحمل زعل ومشاكل
حبيباتي اسفة ع الاطالة ويااااليت اشوف ردودكم وحلكم لحالتي 