:: سميرة :: @smyr_2

عضوة فعالة

عملوها الصغار و وقعوا فيها الكبار ((مشكله بين بناتي وبنت صديقتي))

السلام عليكم يا بنات،،

أنا محتاجه مشورتكم في موضوع يخص بناتي
أنا عندي بنتين في سن 13 سنه وفي 14 سنه من كم سنه مرضت بمرض ماله علاج إلا عند الرحمن والحمدلله وتبهذلت كثير مع مرضي وجلست كم سنه على كرسي متحرك و سويت عمليات عشان أقدر أمشي وأنا ساكنه بعيد عن أهلي وناسي والشئ هذا تعبني أكثر طبعاً بيتي تأثر و أولادي تبهذلوا معاي وكمان زوجي
وبناتي تحملو مسؤليه أخوانهم من يوم هم صغار وصبرو أيام مرت عليهم مايعلم فيها إلا ربي تعلمو الطبخ من يوم هم في رابع إبتدائي وتحملو مسئولية نفسهم والبيت يعني بناتي تدقدقو من هم صغار والناس إلي أعرفهم معجبين جداً ببناتي وصبرهم وبرهم في ورحمتهم لي ودايما يقولون لي يابختك في بناتك حتى بناتهم يقولون لهم شوفوا فلانه و فلانه إيش يسوا لأمهم مريحينها ،،
وزوجي ربي يخليه لي صبر معاي وماخلى مكان أو طريق إلا سلكه يدور لي على علاج طبعاً حبيت أذكر نبذه بسيطه عن حياتي عشان تاخذو فكره عن بناتي وكيف كبروا
المهم بنتي الصغيره لها صديقه تعرفها من 6 سنين والمعرفه صارت عن طريقي لأنه أمها كمان صديقتي وبنتها في نفس عمر بنتي ونفس المرحله الدراسيه ونفس الفصل كمان ويجلسوا بجنب بعض في الفصل طبعاً بسبب طبيعة العلاقه القويه بيني وبين أم البنت و كأننا أخوات صارت علاقة بناتنا قويه و كمان بنت صديقتي وحيدة وبكرية أمها يعني أخوات ماعندها بس أخوان ومتربيه على الدلال وإنه إلي تبغاه يتلبى بحكم إنها ماعندهم بنات غيرها البنت ممتازه في دراستها سلوكها كويس لكن فيها حب السيطره ومغروره حبتين وتشوف نفسها إنها خاليه عيوب و إنها صح وغيرها غلط وكمان فيها الغيره بشكل كبير وتبغى بنتي تابعه لها يعني تقولها لا تمشي مع فلانه لأنه سلوكها مايعجبني على الرغم إنه البنت إلي قالت عليها الكلام هذا أعرفها كويس و أعرف أمها وزوجي يعرف أبوها وماشاء الله عليهم ما ينذكرو إلا بالخير و في أمثله ثانيه كثير و أمها إنسانه محترمه جداً وراعية واجب لكن ماتشوف عيوب بنتها وشايفه إنه بنتها كامله مكمله وكلام بنتها كأنه قرأن منزل والعياذ بالله ومن النوع إلي يدقق في الصغيره قبل الكبيره بعكسي أنا إلي أخذ الأمور ببساطه (( طبعاً السبب مرضي لأنه قبل مرضي كنت حاره وكان الشئ هذا يزيدني مرض وتعب ))وما أدقق في إلي حولي وهذي قالت وهذي عادت وهذي قصدها بالكلام مو طيب وعندي مقوله ماشيه عليها من فتره ومرتاحه عليها لا تهتم لصغائر الأمور فكل الأمور صغائر
إلا شئ يمس ديني وعقيدتي وسمعتي وسمعة عائلتي وقتها لكل حادث حديث المهم من فتره صارت علاقة بنتي بصديقتها متوتره بسبب حب السيطره إلي عند صديقتها والظاهر طفح الكيل عند بنتي وماصارت تتحملها بسبب إنها صارت تنتقد بنتي الكبيره ببعض التصرفات إلي في نظربنت صديقتي غلط ( الحمدلله بنتي الكبيره عاقله وممتازه في دراستها ومحبوبه من معلماتها ودائماً يشكرو في أخلاقها لكن شخصيتها جداً قويه وصريحه زياده عن اللزوم وعنيده جداً وكانت تحصل مصادمات بينها و بين صديقة أختها وبالعربي كانت تعطيها فوق راسها إذا تجاوزت بنت صديقتي حدودها مع بنتي الكبيره) وبنتي الصغيره كانت ترد عليها وتسكتها لكن شخصية بنتي وسط لا ضعيفه ولا قويه
صديقتها إستمرت بالكلام عن بنتي الكبيره ومره تقولها أختك تمشي مع شله خربانه راح يخربونها أختك متغيره أخلاقها للأسؤ وكم مره بناتي تخانقوا وتهاوشو بسببها وكنت أصلح بينهم ويتبين لي إنه بنت صديقتي كان لها دور في الهواشه هذي وتوتر العلاقه بين بناتي لكن عمري ما كرهتها أو كلمت أمها بخصوص بنتها لأن أشوف إن المسأله ما تستاهل إني أكبر الموضوع لأنهم صغار اليوم يتخانقوا وبكره يتصالحوا وهذا إلي كان صاير وكمان يعملوها الصغار ويوقعوا فيها الكبار ويصراحه أنا أشوفها قلة عقل إنه على الكبيره والصغيره أروح أشتكي البنت عند أمها بصراحه أشوفها خفه طبعاً في المسائل العاديه مو الكبيره مره ،،
وكنت حريصه إني أقوي العلاقه بين بناتي وأتكلم معاهم بالساعات عشان أقربهم لبعض و أخلي علاقتهم قويه ببعض والحمدلله نوعاً ما نجحت لكن الظاهر الشئ هذا ماعجب بنت صديقتي لأنه بنتي صارت ترد عليها وتسكتها إذا تكلمت علي أختها لكن صارت بشكل أكبر وفي يوم جات بنت صديقتي لبنتي الصغيره وقالت لها إيش رأيك نروح للمعلمه الفلانيه نسألها عن درجاتنا قالت لها بنتي طيب المهم سألوها وقالت لهم وبعدين بنت صديقتي قالت للمعلمه أبله بكلمك في موضوع قالت لها المعلمه إيش فيه يافلانه فقالت لها في وحده معجبه بفلانه قصدها إنه بنتي الكبيره في وحده معجبه فيها طبعاً الكلام هذا مو صحيح حتى المعلمه ماصدقت الكلام هذا و إلتفت لبنتي الصغيره وسألتها الكلام هذا صحيح بنتي للأسف إرتبكت بسبب إنها متفاجئه وردت على المعلمه ما أدري يا أبله زيي زيك أول مره أسمع بالكلام هذا لكن المعلمه كذبت بنت صديقتي وقالت لها مستحيل أصدق الكلام هذا فلانه وفلانه أعرفهم كويس مستحيل يكونو من النوع هذا المهم خرجوا من عند المعلمه وزعلت بنت صديقتي من بنتي لأنها ما أيدتها وقامت تعيد نفس الإسطوانه المشروخه عن بنتي الكبيره فعصبت بنتي عليها وتكلمت عليها ومن ضمن الكلام إلي قالته لها إنها صارت تكرهها بسبب كلامها عن أختها وفي الأخير تزاعلوا المهم البنت وصلت الكلام لأمها والأم مصدقه بنتها و أنا جاتني بنتي وقالت لي إلي صار وصارت تبكي و أنا هديتها وقلت لها لا تضيقي صدرك ولا تزعلي وأهم شئ إنه المعلمه شهدت لأختك بالخير و أنا ثقتي فيكم كبيره طبعاً في داخلي كنت حاطه الإحتمالات كلها إنه ممكن في شئ خبته علي أوأي شئ ثاني لأنه البنات في سنهم يمرو بتقلبات نفسيه وكمان صغار لكن تفاجئت بصديقتي تتصل علي وتكلمني في الموضوع بطريقة إنه بنتها بريئه وإنه بنتي كانت متفقه مع بنتها إنهم يكلموا المعلمه في الموضوع هذا و إنه لما جاء وقت الجد بنتي إتراجعت عن كلامها يعني غدرت فيها فقلت لها بالكلام إلي قالته بنتي لكن كانت مصره إنه بنتها صادقه وبنتي كذابه طبعاً مو بشكل مباشر لكن كلامها معناه كذا المهم تعوذت من إبليس وقلت لها يافلانه إنتي عارفه البنات في السن هذا كيف يكون تصرفاتهم وتعاملهم مع بعض وكمان صغار الواحد ما يدقق في كلامهم لأنه وقت الزعل يزودوا وينقصوا في الكلام اليوم يتزاعلوا وبكره يتصالح و الأخوات إلي هم أخوات بيختلفوا ويرجعوا يتصالحوا وكمان بالعقل في بنت ترضى الكلام هذا على أختها ولا كمان تتفق مع صديقتها وكمان المفروض أنا إلي أزعل من كلام بنتك على بنتي لكن النقطه هذي ماكانت مهتمه لها وبصراحه إنصدمت فيها ماكنت متوقعه إنها كذا ،،
المهم ثاني يوم وتتصل صديقتي في المعلمه وتسألها عن الموضوع كله وجاوبتها المعلمه بأنه بنتها صادقه >>>>>> هذا كلام صديقتي لي
وبالتالي أنا رحت بنفسي لنفس المعلمه وكلمتها فقالت لي كلام بنتك صحيح وكانت المعلمه مستغربه من إهتمامنا للموضوع وقالت لي تراكم معطين الموضوع أكبر من حجمه والمواضيع هذي عاديه تصير كثير بين الطالبات قلت لها مو أنا إلي مكبرته صديقتي للأسف هي إلي مكبرته وقلت لها أنا جيت لكِ اليوم عشان أتأكد من صدق بنتي ومن القصه كلها والباقي مايهمني وسألتها عن بناتي بشكل عام وسلوكهم في المدرسه ومستواهم الدراسي فشكرت في أخلاق بناتي وقالت لي بناتك ممتازات ماشاء الله عليهم ولا تخافي عليهم و أنا معتبرتهم زي بناتي و أصلاً أنا لو لاحظت عليهم شئ مستحيل أسكت راح أكلمك على طول طبعا شكرت المعلمه وخرجت صديقتي صارت بس تدق علي تبغى تكلمني فمره لقتني نايمه ومره كنت خارجه والمره الثالثه قدرت أكلمها فقلت لها إلا صار بيني وبين المعلمه إيش كان رد فعلها ماصدقت كلامي وقالت كيف تقولي كلام وتقولك كلام فقلت لها إيش قصدك أنا أكذب عليك أو المعلمه تكذب علي قالت لا مو قصدي بس هي قالت لي كذا وبنتي قالت لي كذا المهم عندها تطلع بنتها الطيبه وبنتي الكذابه و أثناء ماكنت أكلمها جاتني مكالمه مهمه و قلت لها عندي مكالمه مهمه وموضوعنا شكله بيطول و أنا عندي شغل أكلمك بكره إن شاء الله نتفاهم فقالت طيب وقفلنا
ما أخفيكم أناقرفت من الموضوع كله لأنه بطبيعتي ما أحب قالت وقالت لي وكمان إلي يهمني في الموضوع كله بناتي والحمدلله والباقي يعتبر عندي من صغائر الأمور وكمان لا صحتي ولا أعصابي تتحمل إني أدخل في مناقشات ما منها فايده
ونقعد نعيد ونزيد في الكلام فا عندي نيه أقولها شوفي يافلانه كثرة الكلام في هذا الموضوع تضييع وقت ومامنه فايده لأنك مصدقه بنتك وعلى كلامك المعلمه تقول إنه بنتك صادقه و أنا نفس الشئ تأكدت من كلام بناتي ورحت بنفسي وجلست مع المعلمه و أكدت لي صدق بنتي و أنها صادقه في كلامها فخلاص الموضوع منتهي لا إنتي راح تقتنعي بكلامي ولا أنا راح أقتنع بكلامك
فأبغى أعرف رأيكم في الموضوع
والله إني أكتب لكم و أنا خجلانه لأني أشوفه مو مستاهل إنه ينعطى الإهتمام هذا كله بنات صغار مراهقات إختلفوا اليوم بكره يرجعوا يتصالحوا والأمهات المفروض إنهم مايتدخلو إلا في الشديد القوي
وبنت صديقتي أحبها و أتمنى لها الخير زي ما أتمناه لبناتي :27: :27: :27:
لكن خلاص حاسه نفسي طفحت من مشاكلهم الثنتين وكمان خلصت مشاكل الدنيا ومابقي إلا مشكلتهم ،،
أنتظر ردودكم أخواتي :angry: ..

يلزم عليك تسجيل الدخول أولًا لكتابة تعليق.

تسجيل دخول

u4me • 20 سنة

السلام عليكم ورحمة الله وبركاتة

هلا باختي سميرة

انا رايي بالنسبة لموضوعك انك تكتفين بالصداقة بينك وبين الام

واذا بناتك مو مرتاحين للبنت بس غرورها او الاشياء الي تسويها مو لازم يختلطون فيها وانتي دايم كرري على مسامع صاحبتك ان البنات في سن المراهقة سوالفهم وخرابيطهم واجدة

صدقيني خلي العلاقة بينك وبين صاحبتك وخلي البنات يختارون صاحبتهم بانفسهم

وترا بكرا البنات بيكبرون ويضحكون على سوالفهم وخرابيطهم<<< مارة بالشي هذا

تحياتي لك واتمنى لك التوفيق انتي وبناتك

:: سميرة :: • 20 سنة

مشكوره أختي u4me
على ردك والكلام إلي قولتيه قلته لبناتي حتى المعلمه نصحتهم إنهم يخلو علاقتهم بالبنت سطحيه لكن شسوي بأمها إلي تعيد وتزيد في الموضوع أنا ماودي إنه الموضوع يكبر لأنه أساساً مايستاهل لكن إذا زودتها ألزم ماعلي بناتي والباقين ما يهموني..
من جد منصدمه في الأم ماتوقعت تفكيرها كذا!!!!
إذا إحنا الكبار نتصرف كذا إيش خلينا للصغار..

فينكم يا عضوات عالم حواء أبغى مشورتكم
لوكنتم مكاني إيش راح يكون رد فعلكم وتصرفكم؟؟

فتاة عالم حواء • 20 سنة

لو كنت مكانك بناتي هم الاهم ,
وصديقتي لو عادت كلام بالموضوع , اقوللها : بصراحة أنا متقززة من كل الموضوع , ومصدومة إنك نزلت مستوى علاقتنا لهالمستوى ,
رجاء , اقفلي الموضوع , بناتي مني لهم بنصطفل , وانا على اطلاع كامل بكل أمورهم ومتواصلة بشكل حثيث مع معلماتهم , وما أسمح لأحد يقيم بناتي او يتدخل فينا . فكيف لما تكون بنتك المراهقة ,
خبريها بحزم: ,إنهي الموضوع ولا تخليني آخذ فكرة سيئة لا عنك ولا عن بنتك .
وبناتك خليهم يطنشوا هالبنت تماما ويهملوها , يصادقوا غيرها, لإن بصراحة اسلوبها ملتوي مثل النساء الفارغات !! هذا وهي بعد مراهقة صغيره !!!

ام رها • 20 سنة

والله انا لومكانك كان قد انهبلت والبنات في هالسن اصلا مايعرفون وش يبغون بالضبط وترددين ومشاعرهم متقلبة بسرعة والحل انك تقولي وبحزم لصديقتك هالموضوع ما ابي افتحة مرة ثانية والكل مقتنع بوجهة نضره وبتنك الصغيرة تجلسين معها جلسه خفيفة تسألينها هل تبغى تستمر في صداقتها مع بنت صديقتك تكون سطحية او رسمية وتعطين بنتك ثقة في نفسها على شان تتخذ القرار وبالنسبة لبتنك الكبيرة تبينين لها ان الوحدة لما تغار ممكن تهدم كل شيء فخليها تكون هاديه ولا تعطي بال لبنت صديقتك وترمي كلامها في البحر0

يعني الزبدة راح تكون في كلامك مع بناتك مو مع صديقتك والله لا يجيب الزعل0