السلام عليكم ورحمة الله وبركاته
أتمنى كلكم تكونو بخير وصحة وعافية
قبل لا تقرؤو الموضوع أتمنى كل وحدة تجهز انكم تجهز لها فشار أو مسليات خفيفة كذا لانه الموضوع اشويتين طويل وبالتفصيل الممل تقريبا 😁
نبدأ الموضوع >>>
أنا يا طويلات العمر كنت أعاني من التهاب اللوزتين المزمن تقريباً طول عمري.. من يوم كنت صغيرة 😰
طيب ليش ما شلتها 😅 أتذكر لما كنت صغيرة المستشفى كان دايم يقول لازم تشيلو اللوز عشان ترتاح وكذا.. بس أهلي كانو يرفضو يخافو عليي... وأنا بعد كنت خايفة من كلمة عملية وكذا.. المهم تعايشت مع الوضع ذا التهابات متكررة ما أبالغ إذا قلت من 5 لين 7 مرات تلتهب عليي بالسنة وأتعب ومرات أكثر
وكبرت وما تحسنت 😭 تزوجت بعمر ال18 وخلاص خلاص متعايشة مع الوضع ذا اللي هوه التهابات متكررة ومضادات وتعب وجبت عيال وتقريبا كبرت العيال 😅 أصغر وحدة صار عمرها ست سنوات >> طبعا للي ما يعرف نزلت مواضيع قبل عن حالة بناتي ومحاولة أطفال الأنابيب الفاشلة قبل كذا>> طيب هاذا ما موضوعنا يلا نرجع على موضوع اللوز😂
مرة من المرات كان عند بنتي موعد بالمستشفى وبنفس الوقت كان عندي احتقان شديد باللوز.. بعد ما خلصت من موعد بنتي قلت بطوف على أخصائي أنف وأذن وحنجرة.. ماكان عندي موعد ولا شي بس مرات لما يكونو فاضيين يدخلو بدون موعد عادي.. الحمدلله على حظي كان دكتور فاضي 😁 ودخلت عليه وكشف عليي وقااال.. يوووووه واايد ملتهبة وحجمها كبير كثير الله يعينج.. المهم كلمته انه دوم تلتهب عندي وكذا.. واقترح عليي اني أشيلها وأرتاح بدال كل هالعذاب.. قال بتتعبين بعد العملية ثلاث أسابيع وبترتاحين بعدها خلاص.. على طول بدون تفكير قلت له تم خلاص أبا العملية>>ما أدري وش فيه مخي ذاك الوقت حتى زوجي ما كان عندي ولا له علم😭 قال لي متأكدة ومن هالكلام قلت اي اي.. وجهز الأوراق وسويت تحاليل وتحدد وقت العملية
وبعد ما طلعت من عنده أول شي كلمت زوجي تفاجأ بس ترا كان شايف معاناتي لما تلتهب اللوز واقتنع وكذا والحمدلله وافق 😁
<<يوم العملية>>
بتاريخ 11/نوفمبر 2020..
كان لازم أجيهم من الصبح الساعة سبع ونص.. ولازم يكون معي نتيجة فحص كورونا يديدة والا ما أدخل.. ولازم أكون صايمة
دخلت عالجناج وأخذو البيانات وبدلت ملابسي وانتضرت لين جو وسحبوني على غرفة العمليات.. بالبداية كذا غرفة كبيرة فيها مرضى بين كل مريض ومريض ستاير>>اللي هيه نفسها غرفة الافاقة اللي بروح لها بعد العملية
المهم جاني دكتور التخدير وبعدين جا الدكتور اللي بيسوي لي العملية >> وسحبوني لين غرفة العمليات.. طبعا كنت مرتبكة اشوي وكانت الأجواء هادية وباردة.. وخلوني أنط من سريري لين سرير العمليات.. وبعدين جاء دكتور التخدير وقال بحط لج البنج بالابرة المغذية.. وجلس يسولف ويسألني.. شو تشتغلين قلت له ما أشتغل >> بعدين سألني انتي أم قلت أيوه.. قال اشلون تقولي ما تشتغلين الأم تعتبر وظيفة>> احلف انت بس توي أدري.. شكله كان يبا يلطف الجو اشوي 😂✋
واشوي الا حطو هاذا القناع على وجهي واشوي أحس اني دخت ورحت في سبات عميق.. طبعا اللي أذكره اني قريت الأذكار ودعيت وذا القناع بوجهي... واشتغلو الدكاترة وشافو شغلهم وأنا ما دريت عنهم .... وفجأة يصحوني الا وأنا بغرفة الإفاقة.. والله تضايقت منهم ليش صحوني كانت نومة حلوة وعميقة مرة.. المهم لما قمت خفت يألمني بس شكلهم عاطيني مسكن قوي.. حسيت بكذا شي يضايق بالبلعوم مثل الجفاف كذا.. وسألوني فيه ألم.... قلت ايه 😂 عشان يعطوني مسكن... وكملت نوم اشوي وقالو بيودوني الغرفة.. زوجي كان برع ينتظرني.. المهم رحت الغرفة وكملت نوم 😂 جابت لي الممرضة ماي بارد قالت لي لازم اشرب.. حاولت أشرب حسيته كذا ما ينبلع.. بصعوبة شربت اشوي.. وبعدين كملت نوم.. وكل اشوي تجي الممرضة وتصحيني.. مرة تقيس الضغط ومرة الحرارة.. وجابت لي آيسكريم ما قدرت آكله أحس بألم لما أبلع..عطيته لزوجي ياكله.. ونمت >> يهالنوم
وبعد خمس ساعات جا الدكتور اللي سوا لي العملية يكشف على حلقي وقال الحمدلله كل شي تمام وانقهرت مرة يوم كتب لي خروج بنفس اليوم >>كنت أبغا أناام طيب.. جابو لي أدويتي اللي هيه عبارة عن 3 أنواع مسكن ومضاد حيوي ونوعين غرغرة
وبدلت ملابسي وخرجت من المستشفى أمشي على رجلي الحمدلله رب العالمين
<<ما بعد العملية>>
ألم شديد أثناء البلع.. لما يجي موعد الدوا وربي أحس بضيق لاني ما أقدر أبلعها.. ومرات ألم يصحيني من النوم >> أقوم آخذ مسكن وأرجع أنام 🙂
الأكل ما أقدر آكل 😭 يعني أكون جوعانة وكذا.. بس ما أقدر أبلع
آكل أشياء مرة خفيفة مثل الآيسكريم والمهلبية والزبادي
بعد الأسبوع الأول يخف الألم كثير وأصير آكل أشياء أكثر مثل العيش والخضار المسلوقة والشوربات وكذا
الألم ما يكون كانه احتقان بس.. ألم يمتد لين الأذن أحيانا أحس بضغط شديد بالاذن كانها بتفجر.. ولساني أحس يوجعني اشوي اذا حركته.. يمكن لانه صار لي فترة ما مضغت أكل قوي وكذا فضعفت العضلات.. لانه أحس حتى الفكين يوجعوني مرات
الحمدلله أنا الحين صار لي تقريباً عشرة أو 11 يوم من سويت العملية وكل يوم يمر أحس بتحسن ولله الحمد.. صح لسه ما تعافيت بس حالتي أحسن بكثير من بعد العملية على طول
وان شاء الله كلها كم يوم وأرتاح وتصير اللوز فقط من الذكريات
وأي سؤال أو استفسار أنا حاضرة
سلاااام ♥️
يلزم عليك تسجيل الدخول أولًا لكتابة تعليق.
الصفحة الأخيرة
حبيت ادعيلك ما عندي سؤال والحمد لله تعبك بعد العملية ما كان كبير والحمد لله لأن والديك رفضا إجراء العملية لما كنت صغيرة لأني جربتها في صغري ولا أنصح الأمهات بها.