عمليتي لشحوم بطني انتهت

تذكرون خبرتكم قبل عن وزني وبطني كل ماله يكبر
طلع فتاق يابنات وقلت للدكتور دامك بتخدرني شيل شوي من شحوم البطن قالي هالعمليه ماهي تجميليه انتي معدتك باقي شوي والفتق يسير كامل وتلتهب قلت له انا اخاف من دكاترة التجميل اكثرهم تجاريين وانا بهالسن ماتحمل وحتى زيارات ماروح خجلانه من بطني يادكتور ويلوموني انتي ماتجينا واستحي اقولهم بطني كبير
والدكتور يسمعني قالي بشيل جزء صغير لاني خايف عليك ينقص عليكي الاكسجين بعد العمليه قلت طيب الي انت تقدره وتشوفه
يابنات تعبت لا رياضه فادت ولا شرب مويه كثير ولا اعشاب
قالي تشاوري وانا موجود لوقت العمليه ، وهالدكتور استشاري جراح قديم ، استخرت ياحبيباتي ودخلت المستشفى من ثلاث اسابيع قبلها عملت فحص الكورونا وشافني دكتور التخدير وبعد يومين دخلت العمليه الصباح
وتركت العيال الي نايم ولي بشغله مابغيت اخوفهم واشغلهم بس قلت لشيبتي هو الصبح على الست راح الزرع وانا رحت المستشفى وقلبي بين ايدي ودفعت يابنات 62 ألف ريال ، لانهم عمليتين في بنج واحد
دخلوني وبعدها اسمع الممرضه تناديني اصحى خلصتي وتميت ارجع هذا عادي من البنج وبعدها مدري بكم دخل علي الدكتور والستاف الدكاتره الي معاه وقالي الحمدلله امورك طيبه
شق البطن مكان القيصريه كامل وشال كيلوين شحوم وخيط فتاق المعده وقرب عظلات البطن المرتخية
قالي حطي ايدك على بطنك قلت لا اخاف
قال شوفي ماعاد لك بطن بارز كل شي تساوى وعدلنالك حتى خياطة قيصريتك القديمه بحيث ماتبان
وركبولي انبوبتين بالخاصره يسربوا الدم والشحوم المتبقيه وكل يوم الممرضه تفضيهم زي القسطرة لكن من الخاصره
وظليت نايمه على ظهري يابنات ١٤ يوم اتحرك بس للتواليت بمساعدة الممرضات
تأخرت بالمستشفى لان الدم ماهو راضي يوقف مستمر
واخر يوم لبست عباتي قالوا ضروري تمشي حتى مايسير تجلط في الساق لاحظت عباتي شوي طولت لان ماعاد به كرشه
وبالليل استوحش اخلي الممرضه تساعدني تحط على صدري مخده اشوف الجوال ادخل عالم حواء ودي اكتب وماقدر لان يدي اليمين مثبت فيها ابرة المسكن
والم يابنات ووحده بس كنت ادخل اشوف سوالفكم مايجيني نوم لاني ماتحرك نايمه على ظهري ممنوع انقلب على جمب لان الانبوبتين مثبتات على خاصرتي يمين ويسار
ولبسوني المشد حتى تثبت عظلات المعده والخياطه الداخليه
والحمدلله الحين انا بالبيت واقدر البس جلابيه بدون ماشوف بروز في البطن صار سيده
المشد ضاغط على انفاسي لكن لازم اتحمل ثلاث شهور