عمي دمر حياتي00

بسم الله الرحمن الرحيم

السلام عليكم ورحمة الله وبركاته والله ياخواتي مدري كيف ابدا بقصتي انا من كثر ماني ضايقة وحاسة ان الدنيا ضاقت

فيني قلت اكتب واطلع اللي بخاطري شوي علشان تخف اعصابي وتهدا نفسيتي شوي وربي يا بنات احس ان بيصير

فيني شي علشان كذا ابكي كثير مابي اكتم بداخلي اخاف يصير فيني ضغط ولا تصير فيني حاجه لاسمح الله من كثر

ماني كاتمه بقلبي المهم يابنات انا مو صغيره عمري 28 وجامعيه ومحاضرة في الجامعه والحمدلله على قدر من الجمال

والكل ودة فيني يخطبني لولدة لاخوها المهم انا ماكان في بالي احد نهائيا وكنت رافضة فكرة الزواج من القرابه بسبب

الل صار لخواتي الكبار من زواجات القرابه المهم لي ولد عم اصغر مني بسنه مركز ومنصب ماشالله عليه اذا زرنا عمامي

بس يمدحون فيه قدامي وسوا وسوا يعني اسمعي وشوفي المهم انا بصراحه ماانتبهت حيل فهمت انها تلميحات بس

طنشت في الزيارة الثانيه شفت اهتمام الولد بعيني اهتمامه باهلي باخواني حفاوة لنا اذا زرناهم هم في منطقه ثانيه

بديت انتبه للولد وتصرفاته وعجبتني رجولته بديت افكر فيه شغل بالي ليش اذا زرنا يسوي كذا ويرز عمرة وحالته حاله

المهم مسكتني عمتي ولمحت تلميح بالعربي قالت اننا نبيك له وهو دايم يسأل عنك ومن هالسوالف انا بصراحه لزمت

الضمت استحيت مدري شقول المهم رجعنا من السفر وقعدنا تقريبا شهر ولا الولد دق على اخوي جوال وقال انا ابي

اختك فلانه بالاسم وانا سمعت انها تخطب وانا ولد عمها وأولى فيها من الغريب وانا ابي رايها هي قبل مانتقدم رسمي

لاني سمعت انها ماتبي قرابه قال اخوي طيب قال ابي الرد بعد ساعه بالكثير انا مافيني صبر قال طيب بجس نبض البنت

المهم جاني اخوي وقاللي الولد قال كذا وكذا والرجال مافيه شي ينعاب واذا رفضتيه تراك بالعربي خبله بصراحه انا

الولد دخل قلبي من حركته وجرائته بالاتصال وبعدين فيه شهامه وكرم وانا احب بالرجال كرمه المهم قال اخوي وش ارد له

جلست افكر قلت نسبيا البنت موافقه بس لا تقول ايه وافقت قل تقريبا مابي يقول انه فرحت على طووول المهم كلمه اخووي

وقال البنت موافقه تقريبا بس فيه اشياء يمكن انت ترفضها قال ماارفض لها شي لو تبي تروح امريكا رحت معها قال الولد

خلاص انا برتب اموري مع اهلي وابوي ونتقدم رسمي بس انت اصبر علي....وربي اني اكتب وانا ابكي مقهورة مقهورة


المهم انا بصراحه تعلقت فيه بقوه وحبيته مره طبعا اهلي عرفوا الموضوع وامي وخواتي وكلن فرح لي وفي يوم من ايام العيد

جاني مسج معايده كل عام وانتي بخير ومن الكلام وبالنهايه ابن عمك فلان بن فلان انا بصراحه انصدمت يوم شفت

المسج ترددت كثير انا ارد له المسج بس قلت بحكم انه ولد عمي برد مسج معايده عادي رديت عليه بالمسج وبعدها كتب لي انها ابيك وشاريك وانا فاتحت اهلي بالموضوع واهلي مره يحبونك وفرحوا كثير يوم اخترتك انتي بس انتظر ابوي يجي من الخارج بعد اسبوع وافاتحه بالموضوع ونجي اخطبك رسمي ونملك انا بصراحه كانت الدنيا مو سايعتني من الفرحه كان جدا لبق ومحترم حتى برسايله لي المهم جلست بعد العيد بفترة انتظر جاء عمي من الخارج مر اسبوع اسبوعين شهر شهرين محد اتصل ولا حس ولا خبر استغربنا التاخير ليش تقدم لي شخص ثاني بنفس الفترة
وراح اخووي كلم الولد قال انت تبي البنت ولا لا فيه ناس متقدمين لا انا ابيها ومدري كيف بس عندي شوي ظروف اخووي ضغط عليه بالكلام وهو يرتاح لاخوي مره قال بالعربي ابوي رفض ورافض بشده قال اخوي والسبب ليه قال بدون سبب وقعد الولد يبكي عند ااخوي قال تعبت لي شهرين وانا مع ابوي مشاكل ولا هو راضي يعطيني سبب مقنع تكفون ابيكم تصبرون علي وانا امووت لو ما اتزوجها المهم قال اخوي يصير خير انا بعد الموقف هذا زاد تعلقي فيه وصرت ابيه بشده وقام ارسل لي رساله قال انا اذا ماتزوجتك يحرمن علي الحريم بعدك وربي قعدت ابكي بعد المسج المهم قعد يحاول بابوه سبع شهور كل خناق وهواش ومشاكل وابوه مصمم لا حاولت اعرف الاسباب لقيت ان بينه وبين ابوي مشكله بسيطه وانحلت ماتستاهل كل العناد واصلا ماعرفنا بالمشكله اللي بينهم الا بعد ما قعدت امي تستدرج ابوي بالسبعه شهور عانيت معناه مع اهلي واللي يتقدمون لي وقبل اسبوعين قال الولد بروح بحاول بابوي محاوله اخيرة وحصلت مشكله كبيره وقال له عمي انا اخيرك بيني وبين هالزواج ومن بعدها احبط الولد احباط شديد وكان بنفس اللحظه متقدم لي شاب خلوق وطموح وماعليه كلام وانا من القهر وافقت عليه وانا للحين احب ولد عمي وابيه بس ابوه حسبي الله عليه وقف بطريقنا والله يابنات لدرجه يتصل عل جوالي الولد واسمع صوته وهو يبكي كانه بكاء طفل ويسكر لاتقولون لي ماعليه من ابوه عمي طاغي وقوي ويسوي اي شي والولد مايبي يجيبها بمشاكل والحين يابنات انا كل ليله ابكي وادعي ان ربي يشيل غلاه وماني قادرة اعيش احس اني بظلم اللي بتزوجه تكفوووون ياخواتي ساعدوني كيف انساه وكيف اعيش حياتي طبيعية مرة ثانيه حسبي الله على الظالم حسبي الله على الظالم