عناصر طبيعية من خلطة خسرتني شعري انتبهو يابنات

السلام عليكم ورحمة الله وبركاتة

بداية انا عضوة جديده اتابع المنتدى بشده
كنت احلم بشعر حريري وناعم وزي البلسم
لكن ااااه على شعري اللي خسرته

كان شعري جاف ومتقصف قليل وخصوصا عند الاطراف
شعري مموج

كنت اذا اخلي فيه الشامبو
تفوح منه ريحة الشامبو ونظيف مره مره
حتى بعد الاستشوار ريحة الشامبو باقيه وكنت اجن على ريحته

وبعدين شوفو طمع الانسان
مايرضى باللي الله معطيه

جيت اشوف ثلاث خلطات من هنا
ودمجتهم كلهم في خلطه وحده
كان في خلطة زبده وجرجير وماادري ايش وتضربينهم بالخلاط
والثانيه بيض وعسل او زبادي
والثالثه مجموعة زيوت وماسك الخيار

اااااااه على شعري والله مقهوره

دمجتهم بخلطه وحده وخليتها فوق راسي

وخليتها تقريبا ساعه ونص

جيت ابغسلها ماتنغسل
مافي رغوه

خلطة دهون دسمة حسبي الله على شيطان مخي

وغسلته كم مره لغاية ماجت الرغوه

مافيه ، الشامبو نشب في شعري لأن الدهون اللي فيه تخزنه
يااااربي

وبالتالي تعبت وانا اغسل وتهيأ لي ان كمية الزيوت خفت

قلت يالله كل مره اجي اغسل فيه راح يخف

وانا غبيه اللي فكرت كذا
لأني راح اشبه لكم تشبيه شايفين زيوت المتراكمه بالمطبخ ؟
مع الايام تقسى بقوه ويصعب تنظيفها حتى بااقوى المنظفات

الحين انا شعري صارت فيه الدهون كذا بس على الاقل الشعر
راح يتجدد

لكن فروة راسي ؟؟؟؟؟؟؟

طبعا الي صار لي
ان فروة الراس تشكلت عليها طبقة الدهون الصعبة
والتهبت مره وفيه مناطق صلعت فيها

والشعر ماينغسل وريحتها عفن
لأن الدهون اللي تجمدت تجمد معها البيض والخيار
فهذي مواد تتعفن

الان اعالج فروة راسي بشامبو وقطرات
وشعري كل ماطال اقص فيه علشان مافي مجال
تروح منه الدهون القاسيه

جربت حنا وسدر وصبغ وقطران وادويه وغيرها
ماخليت شي وبتكرار لكن مافي فايده

ويقولون ان صار عندي اكزيما مزمنه والله اعلم
تفج بعد فتره طويله يمكن لو راحت ترجع من جديد
لازم التزم بالعلاج

واذا مافاد العلاج مادري شنو راح يصير
بس اشوف ان في تحسن
بس من جد يابنات شي مؤم اتوقع الزبده هي من اقوى اسباب تجنبوها
وربي هذا اللي صار لي واي ريحة زي قلي وشوي السمك مثلا
تنشب في راسي ، معاناة لاقصى درجة
ودمتم سالمين