مرحبا من جديد
كيفكم صبايا حابة اشكركم كتير ع الردود الحلوة لموضوعي الاول
ومتل ما وعدتكم ما تأخرت عليكم وليكني جيت لنكمل سلسلة العناية
صبايا متل ما حكينا المرة هديك بشرتنا بتتشابه بتركيبها التشريحي لكل الناس
بس الاختلاف هو :
سعة المسامات يلي بتتفتح على سطح البشرة
وكمية الافرازات يلي بتنتجها الغدد الدهنية .
وحكينا عن الانواع الاربعة للبشرة { العادية ، الجافة ، الدهنية ، المختلطة }
في ناس بعتولي ع الخاص انه بدهم معلومات اكتر لحتى يبين نوع بشرتهم
لانه في ناس لهلأ ما بتعرف شو نوع بشرتها
نحكي بشكل سريع وملخص ونزيد شوية معلومات للتوضيح
حكينا انه البشرة العادية من صفاتها :
افضل انواع البشرة
اقلها وجودا
تتميز بـــ :
لونها الوردي وعندها حيوية وما فيها اي شوائب .
متجانسة ولينة وناعمة وافرازاتها الدهنية معتدلة ومنظمة
نشاطها قوي لانه بتتجدد باستمرار
مساماتها بتكون متوسطة ومش ظاهرة
{لهيك هي نادرا ما تتعرض لأي مشكلات}
نجي للبشرة الجافة
بتصير جافة لانه بينقصها يا اما ماء او دهون او الاتنين
بتتميز بـــ :
سعة مساماتها صغيرة وضيقة
ملمسها خشن
سطحها بيتقشر احيانا
هلأ لما يصيبها نقص بالماء بتصيبها حالة نقص رطوبة وين؟
في طبقتها القرنية يلي بيغطيها في الاحوال الطبيعية غشاء مائي دهني متوازن
وهاد الغشاء بيتكون من جزئين :
الاول يلي بيشتمل على الدهون يلي بالخلايا وافرازات الغدد الزهمية
التاني يلي بيحب الماء وبيتكون من احماض امينية وعامل مرطب طبيعي
ومركبات وعناصر اخرى متلا { كاليوريا واملاح معدنية }
لما ينقص البشرة الجافة ماء بيختل التوازن بالغشاء المائي دهني يعني بيختل بين بروتين الجلد والدهن
وهالشي بيأثر على اداء الجلد لعمله
وبيقلل عملية التجديد المستمرة لخلايا الجلد وهيك بيصير جاف {حبيت اوضحلكم }
لهيك لازم لازم يا صبايا يلي بشرتكم جافة تشربوا ماء كتير وتستخدموا كريمات مرطبة لجلدكم
اما لما ينقصها افرازات دهنية فهالشي بيعرض الطبقة القرنية للمحيط الخارجي مباشرة وكمان بيزيد من فقدانها للماء فبزيد سمكها وما بتعود بتجدد الخلايا لهيك هي اكثر بشرة بتتعرض للتجاعيد
راح اذكر شوية اشياء بتسبب جفاف البشرة لازم تبعدي عنها
الشمس لما نتعرضلها باستمرار والهواء والبخار
انه تستعملي صابون قلوي
سوء التغذية وقلة تناول السوائل مثلا : الماء والعصير
اكيد التقدم بالعمر اله دور كمان
انه تستخدمي كريمات واقنعة بتجفف البشرة
كمان في بعض الادوية بتجفف البشرة
البشرة الدهنية
تكون سميكة ومساماتها واسعة ومبينة
افرازاتها زايدة
بيظهر فيها زيوان وحب شباب
الشي الحلو فيها انها بتتأخر حتى تتعرض للتجاعيد
ليش بزيد فيها الدهن ؟
بتعتمد ع العوامل الوراثية
ع الجو الحار والرطب
والاضطرابات الهرمونية يلي بتزيد في افراز الغدد الزهمية
هاي الافرازات بتغير درجة الحموضة العادية للجلد
لهيك بيظهر زيوان وحب شباب عليها
اخر شي البشرة المختلطة
فيها اجزاء من البشرة الدهنية واجزاء جافة
وبموضوعي الاول حكيت عنها اكتر صح؟
هلأ بدي نحكي عن الفيتامينات متل ما هو مبين بالعنوان
الفيتامينات صاروا مكون رئيسي لكريمات البشرة
يعني صاروا بالفترة الاخيرة يدخلوهم بالكريمات وبالمكملات الدوائية
يلي بتحفظ النا توازنا الصحي وبتعطي اجسامنا عناصر غذائية ما بتتوفر باكلنا
كمان شركات التجميل صاروا يحكوا انه التحسن يلي بصير للبشرة من منتجاتهم
سببه هاي الفيتامينات
لانه بتخلصنا من الحبوب والبثور وحتى بتوقف التجاعيد
طيب معقول هالحكي صحيح؟
الاخصائيين بيحكوا : انه كل فيتامين اله دور بالمحافظة على جمال وتألق بشرتك
طيب خليني اعطيكم اسماء هاي الفيتامينات واحكيلكم عنها
فيتامين A او {الريتينول} :
هاد الفيتامين بيستخدموه بالعلاجات الطبية
لهيك صاروا يستخدموا كتير بمستحضرات التجميل يلي بتوقف التجاعيد وخاصة الكريمات
د . دانييل ما ايه رئيس قسم البحث والتطوير بشركة إستيه لورد
بيقول :
{ هاد الفيتامين من العناصر يلي بتنشط الانتاج الطبيعي للكولاجين بالجسم اي يؤدي الى الحد من ظهور التجاعيد والخطوط العميقة }
وبينصح انه نوزع الكريمات المضادة للشيخوخة على الوجه والرقبة قبل كريم الترطيب
فيتامين ج :
هاد الفيتامين بيجدد الخلايا
يعني بيخلي بشرتنا اكثر شفافية والها بريق
سليم محمد من مستشفى رويال فري الانجليزي
بيقول :
{اذا اخذنا هاد الفيتامين عن طريق الفم بيفيد الصحة العامة بس في حالة عدم احتفاظ الجسم فيه بسبب اخد جرعات كبيرة بتزيد عن الجرعة اليومية المسموح فيها ما اله اي فايدة }
فيتامين هــ :
بيحكوا اصحاب الشركات العالمية للميك اب انه هاد الفيتامين بيشفي الجروح
وبيزيل اثار هاي الجروح
واله قدرة على مقاومة التجاعيد واثار الشيخوخة
د . نيقولا لووي باحث في عيادة كرانليك
بيقول :
{ ما في اي اثباتات علمية بتدل على انه هالفيتامين بيشفي اثار الجروح بس هالفيتامين بيسبب حساسية ومع هيك انا بنصح بأستخدامه بانتظام للحد من التلف يلي بتسببه الجزيئات الحرة يلي موجودة باشعة الشمس والتدخين وهالشي بيخليه فعال لمقاومة الشيخوخة }
مجموعة الفيتامينات :
تعتبر مثل " الكوكتيل الصحي "
بس السؤال هو :
هل تحتاج بشرتنا فعلا لهاي المجموعة من الفيتامينات ؟
احد الباحثين في شركة بووتس
بيقول :
{ اذا كان غذائك بينقصه كتير عناصر غذائية فتناول مجموعة الفيتامينات بانتظام بيضمنلك انه تتمتعي بصحة عامة منيحة وهالشي بينعكس ايجابيا ع بشرتك }
بتمنى تكونوا استفدتوا
موضوعي القادم عن اسلحة سرية لبشرتك 4 كريمات بيضمنولك جمال دائم
وبدي اتناقش معكم باشياء غلط منتشرة بالمنتديات
ع فكرة موضوعي هاد اهداء للعضوة &جــــــــــــودي&
رذاذ انثى @rthath_anth
عضوة فعالة
يلزم عليك تسجيل الدخول أولًا لكتابة تعليق.
الفراشه الاسيره
•
يعطيك العافيه على المعلومات بس موضوعك الجاي متى تنزليه ياليت ماتطولي علينا
الصفحة الأخيرة