عنايتك فترة الحج..

عنايتك فترة الحج..
" وحج البيت لمن استطاع إليه سبيلا.. " كلنا نعرف أنه الركن الخامس من أركان الإسلام ومن الابتدائي واحنا نرددها. وكنت من صغري أشوفه شيء كبير وعظيم. والحمد الله من الله علي بحج هذي السنة. طبيعي بالفندق الأمور سهالات وانتي جوا البلد ما راح تحتاجين أو تتوهقين بشيء. المهم بالنسبة لي هو أثناء أداء المناسك وقريت وبحثت وقريت كثير وقررت أسوي التالي بعنايتي الشخصية وقلت أفيدكم معي لو حابين أو نذكر بعض لو نسينا شيء.

أدوات النظافة المهمة اللي راح أخذها معي:
شامبو صغير، صابون غسيل الايدي، مزيل عرق، معجون أسنان، مناديل ديتول المعقمة، علبة مناديل جيب صغيرة، كريم مرطب، فازلين صغير.
الأغراض الطبية:
بنادول اكسترا، فكس، حلاو فكس.
الأغراض المتفرقة:
- أخذ عباية أساسية وعباية احتياط والأفضل ما تكون طويلة أو تسحب عشان لا تتوسخ بسهولة أو مع الزحمة تكون سلة الدعس. وبرضو تكون بجيوب عشان أقدر أحط الجوال في الجيب ويكون أسهل لحمله. وممكن برضو تعليقة للجوال لو حابين.
- شنطة ظهر على الكتفين أريح بكثير من شنطة كتف واحد.
- وجبات خفيفة ممكن من هناك أشتريها إذا وصلت مثل معمول وبساكيت او شابورة احتياطيا.
- لحاف خفيف + غطاء مخدة ما أحب بصراحة أغطية الفنادق أنا فناوية أخذ شيء خفيف وعملي.
- شراب + شبشب خفيف للحمام وانتوا بكرامة + حذاء رياضي للمشي أفضل وأريح بما انه راح نمشي كثير بإذن الله.
- كل لبس كامل مع ملحقاته بكيس خفيف مستقل أسهل وأرتب عشان لا تتبعثر الشنطة وممكن كل لبس نظيف تطلعينه تحطين مكانه بالكيس اللبس المتسخ حفاظاً على نظافة أغراضك.
- أغطية الحمام مهمة جداً جداً حرصاً على النظافة وحماية أكبر وأكياس صغيرة احتياط تشيلين فيها الشبشب أو الجزمة أثناء الطواف في الحرم.
- فوطة استحمام وفوطة شعر وفيه فوط الاستخدام الواحد تكون خفيفة مرة وما تاخذ وزن.
هذي تقريباً الأغراض اللي جهزتها لو تذكرت شيء بضيفه بإذن الله والله يجعله حج مبرور وسعي مشكور للي بيحجون ويكتب للي ما حصل لهم هذي السنة.