عنايتي ببشرتي الدهنيه(فرقت معي الحمدلله)

اهلا" بنات
انا بشرتي دهنيه وكل شهر لازم ضيوف جدد ببشرتي من حبوب واثار واحيانا ندوب
اتبعت نظام صغير مايحتاج تعب ولا خلطات والحمدلله ارتحت معه وخفت الحبوب بنسبة 90 بالميه والاثار خفت كثييير
نظامي يتكون من 3 أشياء أساسية
فرشة تنظيف الوجه من بودي شوب سعرها 25 ريال
غسول سيتافيل للبشرة الحساسه
كريم أحماض الفواكه (جليكوليك اسيد ) 10 بالميه ( وصفة من طبيبه) كريم وليس جل
استخدامك للفرشاة يكون مرة وحدةالى مرتين باليوم .. وبعد كل ميك اب... وبعد كل استحمام ومسامات وجهك مفتوحه وراح تشوفين العجب خاصه لما تتحممين بحمام دافي وقبل لا تطلعين من الحمام ووجهك رطب خذي فرشة الوجه وحطي عليها غسول سيتافيل وسوي تدليك بها للوجه بشكل دائري لمدة دقيقه ( كوني رقيقه مع بشرتك ) ولاحظي اللون اللي يطلع بالفرشه .... ونفس الشيء قبل تنامين وبعد ماتصحين غسلي بشرتك بموية دافيه ودلكي بها ( انتعاش ونظااااااافه) راح تلاحظي نتايج هالفرشه العجيبه مع مرور الوقت والاحظ حتى البشره تنشد على خفيف معها وتكون ناعمه وكمية الدهون تخف .. واذا لاحظتي انها تسبب جفاف لوجهك قللي استخدامك لها مثلا خليها مره وحده باليوم او كل يومين
وبالنسبه للكريم يابنات راح تلاقوه بكل الصيدليات انا اللي وصفته لي الطبيبه سعره 270 ريال شريته من نفس العياده ممكن رافعين السعر علي .. ممكن بالصيدليه يكون ارخص
استخدمي هالكريم بعد استخدامك لفرشة الوجه بالليل وقبل ماتدخلين سريرك استخدميه وزعيه على وجهك ورقبتك مع الوقت تتفتح الاثار وتخف الحبوب كثير
باقي حاجه اخيره هذي خاصه للي تعاني من الرؤوس السودا او الحبوب اللي بلون الوجه ( اللي ماتكون ملتهبه بس تخرب شكل الميك اب )
الابره الخاصه بالحبوب .. اللي يستخدمونها بالفيشل .. طبعا هي أنواع خذي من الصيدليه وبعد كل استحمام بالماء الدافي مرريها كانك تسحبينها على وجهك ... مرريها بكل نقطه بوجهك الوجنات .. الانف .. بين الحاجبين .. وشوفي كمية الدهون والجلد الميت اللي راح ينسحب معها .. اهم شي لاتسوين ضغط بها على كل حبه علشان ماتطلع اثر .. اسحبي فقط
اذا اتبعتو هالخطوات راح تفرق بشرتكم معكم كثيرر .. والله أحيانا ببيتي احط بي بي كريم علشان اخفي الاثار والحبوب .. اللحين الحمدلله ماعاد استخدمه الا اذا بطلع
دعواتكم لي يابنات واصبرو على هالخطوات وبتلاقون النتيجه مع الوقت ان شاء الله .. وابتعدووو تماما عن واقي الشمس ترى فيه ماده تسبب حبوب بالوجه .. أصلا احنا مانحتاجه خصوصا اللي تتنقب ترى مايحتاج وهالكلام انا ماخذته من الاستشاري احمد العيسى يقول ماله فايده الا في حاله وحده اذا بتتشمسين عالبحر .. يعني راح يتعرض جسمك للاشعه لفترة طويله