بسم الله الرحمن الرحيم
السلام عليكم ورحمه الله وبركاته ,, : )
كيف حالكم , ان شا الله كلكم بخير وسلامة وعافية ..
*******
طبعاً الحين نادراً مايخلو بيت من خادمة هذا اذا ماكانوا ثنتين أو اكثر بعد
وطبعاً الكثير جايبها لحاجة مع تطور الحياة وصعوبة ارضاء الازواج وشقاوة الاطفال اللي ماكانت قبل
هذا كله عارفينه وكل وحده لها متطلباتها الخاصه اللي جابت الخادمه علشانها ..
المهم مو ليش تجيبونها وتدخلونها بيتكم , هذا عرفنا ليه
الاهم هو المعامله اللي نعاملها لهذه الانسان ..
ملاحظه بسيطه شفتها بهذا المنتدى وماادري عن الاخرى بس اكيد نفس الشي
وابيكم تفرون فره بسيطه على المواضيع اللي تطري الخادمه
كلها شتم وقذف .. استغفر الله فيه موضوع حلو اتذكر قريته عن محاسن الخادمات ,,
الله يجزاها خير اللي كتبته
بس واحد اللي شفته والباقي .. ههه
شي محزن .. شي غريب عن الدين تماماً وعن الاخلاق الانسانيه حتى ..
وحده تقول الله يحرقهم ,, ووحده تقول الكلبه اللي عندي ,, ووحده تمد يدها عليها
ووحده تقولها عيدي شغلك مااعجبني تنظيفك ,, وبعد وحده تقول تراك كذابه وانا مركبه كميرا
وفيه اللي حاشرينها بالبيت مايطلعونها علشان ماتشوف شي ولايخربونها الشغالات
وفيه اللي يدسون عنها الاكل علشان ماتخلصه و و و اشياء كثير ..
طيب هذي مسلمه واذا مهي مسلمه فهي كائن حي له احساس ومشاعر من حقها تعيش معيشه محترمه
ماتغربت وتركت اهلها وعيالها وحبايبها من فراغ
تبي تدور لقمه العيش وفيه اقليه منهم ضاقت بها الدنيا وجت تدور الراحه في بلاد المسلمين
ويمكن يكون دينها وايمانها افضل منك ..
حديث ( لافرق بين عربي واعجمي الا بالتقوى )
الى هنا انتهينا من هذا الجزء ,,
*******
نجي لنقطه ثانيه
فيه اللي يخافون على عيالهم ولابأس من الحرص
اتكلي على الله واحسني الظن به واحرصي على الاذكار والدعاء وخذي بالاسباب ايضاً
حديث ( أنا عند حسن ظن عبدي بي ... )
طيب أول ماتجي بيتك أو حتى قبل قوليلها فيه كامرات مراقبه علشان فيه سرقات وحرامي وكذا لاتجرحين مشاعرها أبد
ماعجبك تنظيفها قوليلها ترا هذا يبيله كذا وكذا ووريها مو تقولين بوجهها برضه فيها جرح مشاعر
خربت عليك شي لاتسوين زحمه وحاله اصلا حتى انت لابد يخرب عليك شي في البيت
بس نبهيها بادب اول ماتجي كيف تتعامل مع المواعين الزينه والاجهزة
واذا خرب كرري ونبهيها برضه بادب
سولفي معاها شوي صح لاتخلينها تمون مره بس لاتخلنها آله لتلبية الاوامر وحشره تهشينها اذا قربت لمك
حطيلها فراش زين مو من الفضله الخايسه وغرفه تقدر تعيش فيها
فيه ناس يرمونها بالمخزن و بعز الصيف مروحه ,,
عامولهم بالحسنى علشان تأمنون شرهم ومكرهم ,,
حسني معاملتك معهم فرحيهم انت مسلمه وتحملين اسم الدين خليهم يشوف الاسلام ويحبونه ويحبونك
علشان اللي مو مسلمه تسلم على يدك بعد هدايه الله ,, واللي مسلمه تتثقف في الدين
حديث ( أحب الناس إلى الله تعالى أنفعهم للناس، و أحب الأعمال إلى الله عز وجل سرور يدخله على مسلم، أو يكشف عنه كربة، أو يقضي عنه دينا، أو تطرد عنه جوعا، و لأن أمشي مع أخ في حاجة أحب إلي من أن اعتكف في هذا المسجد، يعني مسجد المدينة، شهرا..)
*******
آخر شي وادري ان ابطيت عليكم ,,
لاتستعبدين هالانسان مهما كان فهو حر وليس مملوك وعيشي موقفك لو كنت مكانها
فيه مقوله لعمر بن الخطاب رضي الله عنه : ( متى استعبدتم الناس وقد ولدتهم أمهاتهم أحراراً ؟)
فكري في هالنقطه دائماً وتعوذي من ابليس وتذكري بان الله يراقبك فاحذريه ولربما انقلب الحال يوماً
بك أو بذريتك حتى فهل ترضينها لك ولهم ..
أعجبك الموضوع ادعيلي بالشفاء وانقليه بدون ذكر المصدر : ) ,, مااعجبك برضه ادعيلي