السلام عليكم ورحمة الله وبركاته
أخواتي حبيباتي في عالم حواء الغالي
هحكي لكم موقف صعب على قلبي
من يومين البيت فاضي من الجبن واللبن والبيض
يعني حاجات التلاجة ومفيش لا عشا ولا فطار بس في غدا
قررت أنزل لوحدي أتقضى للبيت لأن زوجي مسافر واستحيت كل شوية أطلب من عم الأولاد طلبات للبيت وكده ورحت سوبر ماركت كبير عشان أسرع
اتمشيت فيه وبضعت وأنا عند قسم الأجبان اهتز قلبي وخفت واقشعر بدني
شفت ولد صغير يعني بالكتير والله خمس سنوات ملابسه جدا قذرة وأرجله سوداء وكمان إيده سوده ووجهه مغبر تماما معاه كيس بهارات وواقف عينيه هتطلع على تلاجة الجبن
البياع سأله عايز إيه قاله عايز حتة جبنة أنا هنا بكيت لأني من كم يوم زعلانة إن البيت فاضي ومش عارفة نتعشى إيه ونفطر إيه
المهم سأله تاني جبنة إيه أشار للجبنة الرومي وهي غالية عندنا شوية فاستغربت أنا والبياع مارضاش يدي له لأن شكله معاهوش فلوس فعلا
فجيت جمبه وقلت له أنت بتشتغل ياحبيبي قال أيوة طيب بتشتغل إيه قال ميكانيكي
ميكانيكي عنده خمس سنوات:06:
قلت ليه فين بابا قال لي ماااااااات والله والحزن على وجهه تماسكت طب وماما
قال مش هنا مسافرة:confused:
طب عندك إخوات أيوة واحد كده وواحدة كده يعني بيشاور طولهم أد إيه
مش عارف عندهم كام سنة
فرجعت قلت له طب عاوز جبنة رومي هي غالية إنت معاك كام قال لي عشرة جنيه وأنا شايفة 20 في إيده التانية وقلت له طب دي بتاعة مين قال ست بشتغل عندها والبهارات دي ليها قلت طب خد جبنة بيضاء أرخص قال أنا عاوز من دي
فقلت للبياع هات له ربع كيلو وإديت الولد 15 جنيه ومشي
وأنا الأرض بتلف بيا وفجأة جريت وراه وخدت تلات علب جبنة زي الكيري وعلبة بسكوت ولقيته عند الحساب فحاسبت له وهو حاسب على البهارات وبعدين سألت البنت اللي على الكاشير قالت هو بيشتغل عند ست وبتبعته دايما يجيب لها طلبات يعني معروف قلبي وجعني يعني عينه هتطلع على الحاجة ومش قادر يجيب ومش فاهم ليه هو مش قادر وليه مش بيلعب وليه مش بيدرس وليه مش بيلبس ليه بقى مسؤول من طفولته
لأن احنا مش واخدين بالنا من الناس دي
صحيح هتقولوا لأ احنا بنتصدق كتير بس دول ماحدش يعرف عنهم حاجة
نفسي ننزل الأحياء الفقيرة وناخد بالنا منهم
أنا صدعتكم بس والله بكيت من قلبي طول اليوم وبصيت في وجوه أطفالي يارب احفظهم يارب من كل مكروه الأطفال نعمة تحتاج إلى شكر والزوج نعمة يحتاج إلى شكر والبيت نعمة والأكل نعمة والصابون نعمة والنظافة نعمة
هو كل همه الأكل واحنا من كريم لكريم ومن خلطة لخلطة ومن ماركة لماركة
الله المستعان عفا الله عنا
كل وحدة مهمومة أو مكروبة أو محرومة تنزل الشارع وتشوف الناس
أنا من يوم ماسافر زوجي وأنا قلبي بيصحى عربية توديني وتجبني طلبات في الطالعة والنازلة فواتير كتير محمول وبرضو لسه محتاجة نفسي في بيت ملك نفسي في عربية كبيرة لا حول ولا قوة إلا بالله
وقسم الأسرية مليان مشاكل بس والله مهما كان لو كل وحدة فكرت شوية هتلاقي نفسها ملكة زمانها
لا أنسى الشيخ ابن عثيمين رحمه الله يوم قال الشكر نعمة تحتاج إلى شكر
حسيت جدا بكلمته النهاردة
حبيت تشاركوني صحيان قلبي
أحبكم في الله
بينارشاي @bynarshay
عضوة فعالة
يلزم عليك تسجيل الدخول أولًا لكتابة تعليق.
جدة مملكتي
•
لاحول ولاقوة الابالله
الصفحة الأخيرة