عندك غسالة اوتوماتيك؟ تعالي الله يرضى عليك عندي كم استفسار ؟

هلا وغلا شبوشوبة<<<يمديتس ع الدلع مير هع<<<جادعة الميانة هههههههه

أنا عندي منذو مبطي مرة وأنصحتس نصيحة أخت انتس تشترينها اليوم قبل باتسر..

تراها خطيرة أخطر شي ماشاء الله لاقوة إلا بالله..

وهذي أسألتس نبي نرد عليها بس أبي العلامة كاملة ونجمتين في جبهتي هع

أي الغسالات الأوتوماتيكية أفضل بعامود أو بدون عامود؟؟

والله أنا أفضل اللي بعامود عشان ماتتشابك الملابس وبعد اللي بعمود أفضل غسل من اللي بدون عمود حسب علمي..

كيف تنظيفها لملابس الاطفال ؟ والملابس الرجالية ؟؟ والملابس القطنية الخفيفة ماتخربها ؟

رووووووووووعة ....باختصار..

أنا كل شي أغسله بها..

إلا الشمغ أو الملابس اللي مكتوب عليها إنها ماتغسل بالغسالة غير كذا كل شي أحطه فيها..

حتى الجلابيات إذا صار مكتوب عليها دراي كلين(غسيل جاف) أغسلها فيها بس ماأنشفها بالمجفف أعلقها بمعلاق وأخليها تجف..وتطلع تمام بس تبي كوي..

عموماً هي فيها أنواع للغسل القطني طبعاً أثقل غسلة وفيه الحراير والشيفونات وفيه للصوف والتريكو..

يعني لاتخافين إن شاء الله كل شي بيكون تمام..
وش افضل ماركه؟

أنا اللي عندي جنرال إلكتريك مرة عاجبتني وحصل لي ظروف أظطريت أشتري جديدة وشريت نفس الماركة.. وفيه جنرال حلوة بعد وأظن جبسون زينة ..

كم حجمها ؟

أحسن لتس خذي اللي سعة 10كيلو وأظن فيه أوسع لو صدق فيه خذيها لأنها بتريحتس بغسيل البطانيات والمفارش اللي للسراير المفردة..

أنا عندي اللي 10 كيلو أغسل فيها البطانيات ومفارش السرير اللي محشوة بس ماتشيل إلا أبو نفر أبو نفرين ماتضبط فيها لازم غسال..

وكم سعرها ؟

صراحتن نسيت منذو مبطي شارينها بس أظنها بحدود 1800 تزيد شوي أو تنقص مو متأكدة ..

اذا تعرفي النوع المدمج ( يعني تنشيفها ميه بالمية _ ماتحتاج نشر بعدها ) وش رايك فيها ؟

أنا اللي عندي تطلع ندية مو رطبة بس شاريه معها نشاف(مجفف)لو تعرفينه وأجفف فيه وبلا تنشير بلا هم..


الله يحقق امانيكم ويرزقكم من واسع فضله يارب

آآآميـــــــــــن..

ولكم الف الف الف شكر

عفواً دلبو..

الله ييسر أمورتس ويوفقتس..

لاعدمناتس..

ابغى هدوء ماشا ءالله عليهتا وفت وكفت

وانصحك ياختي اشتريها ورب البيت ان ترتاحين وتتحسفين على عمرك اللي راح بدونها خخخخ

ماشاء الله على الأخت أبغى هدوء كفت و وفت
وأضيف إنه سعر النشافة الكبيرة تقريباً 1500ريال هذا من قبل 13سنه خخخخخ مغبرة
وتراها روعة وتريحك كثير...

بسراحة رووووووووعه الاتوماتيك راحة واستراحة
انا عندي سامسونج طبعا اشتريتها غصب مافيها غيرها بالسوق
حجمها 13 كيلوا اغسل فيها بطانيه نفرين
تنشيفها 75 % سعرها 1800 قبل اربع سنوات
بس العيب الوحيد لو عندك قطعه صغيرة وشاذه عن الملابس تحتاج غسلها لوحدها تهدرين كميه كبيرة من الماء عشانها
واذا ماعندك نيه غسيل بطانيات فيها انصحك بالصغيره
بس الكبيرة تخليك دلع كل اسبوع غاسله المفرش ونص ساعة وهو ناشف

انا انصحك تشتري تنشيف كامل اتوقع افضل من النشر والتعب
واخيرا الله يوفقك ويسعدك دووووووووم

بصراحة مررررريحة وماقصروا البنات

ولكن الأفضل تكون الغسالة والنشافة منفصلين تماما

لأن فيه أنواع من الملابس إذا إستخدمت لها الحرارة تكش وتنكمش

يعني لابد تكون ندية وبعدين تنشريها عادي

وأحيانا تستخدمين النشافة بدون غسالة مثل حالتي :)

أستخدم النشافة بدل كوي عبايتي

وأنا أغسل فيها حتى الشماغ ولكن أحط الغسالة على غسيل أكسترا لايت