ما يصح إلا الصحيح :

الله يكون في عون الحريم ياارب شوفي أختي حاسة بمعاناتك لأني عايشتها وحاولت أنظم وقتي والحمد لله ارتحت، أحيانا يحصل لخبطه وأنضغط لكن الأكثر أن الشغل ماشي تمام والأمر يحتاج تعود، الخطوات اللي ريحتي وشفت لها نتيجة هي: 1- قبل النوم اتبع وصية الرسول صلى الله عليه وسلم وهي قول (سبحان الله33 والحمد لله33 والله أكبر34) وأنام. 2- ثلاثة أجهزة مهمة جدا جدا وهي غسالة الصحون وغسالة الملابس الأوتوماتك ومجفف الملابس. 3- الشغل اليومي: بالنسبة للمطبخ كل ما توسخ شي أصفه في غسالة الصحون وإذا ماكان من النوع اللي يصلح في الغسالة أغسله مباشرة وأضعه على الشبك (صابوني جاهز على المجلى) على آخر اليوم تكون الغسالة امتلت أقوم أشغلها واللي ع الشبك أدخله في أماكنه وأنظف المطبخ على السريع (مسح الأسطح والطاولة ومسح الأرضية بالفتلة أما الفرن فأنظفه كل أسبوع مره وأغلفه بقصدير والوعد الأسبوع الجاي 4- كل جمعة تنظيف خاص للفرن والمطبخ بصفة عامة وبكذا نكون خلصنا من المطبخ وأغراضه. 5- الملابس مخصصه يومين أغسل فيها ملابس الصغااار اللي ماتخلص :( طبعا بالأتوماتك وبعدها سيده على المجفف، وأول ماتخلص أطبقها وهي ساخنه فما تحتاج كوي أبدا (باستثناء بعض القطع وهي قلييلة جدا) 6- بالنسبة للبيت مجالس الضيوف بعد ما يطلعون أنظفها وأرتب التحف في مكانها وأجيب أكياس الملابس الرجالية اللي من المكوجي >> هذي ماااا أستغني عنها أبدا أقصها من النصف عشان تصير مربعة وأغطي بها الطاولات بالتحف اللي عليها وبعد عندي تحفة زاوية طويلة نظفتها ولبستها كيس الغسال بدون ما أقصه من النص وبكذا تكون نظيفه وجاهزة لو جاني ضيوف بس أشيل الأكياس. 7- بالنسبة للكنبات مفصلة لها تغليف وممكن تلقينه جاهز وإذا مالقيتيه اشتري طاقة قماش رخيصه تلقينها بالراحة في سوق القدس لأهل الرياض وافرشيها على الكنب بعد ما تنظفينه، بس اختاري قماش ثقيل مايتزلق وما يدخل غبار على كنبك. 8- بالنسبة للحمامات حاطة في كل حمام مكنسة لها عصا وشطافه وعلبة ومطهر، وتقريبا بشكل يومي إذا دخلت أخلط مويه وديتول في العلبة و أدلقه على الأرضية والبرج والبانيو ثم فرك سريع بالمكنسه ثم شطف بالشطافه،، طبعا ماتخذ منك ولا دقيقتين. 8- تنظيف عميق للحمام كل جمعة. 9- الكنس مره غالبا بعد الوجبة مباشره غير الكنس والترتيب الكامل للبيت مع مسح السيراميك كل جمعه. 10- أما التنظيفات الثانيه مثل دواليب الصغار ودواليب غرفي والتسريحه ودواليب المطبخ وغيرها فهذا تجي مع الفرغه أحيانا كل شهر إذا يوم زوجي مو موجود والأولاد لاهين عني. هذا اللي عندي، الله ينفعنا به..

الله يكون في عون الحريم ياارب شوفي أختي حاسة بمعاناتك لأني عايشتها وحاولت أنظم وقتي والحمد لله...