عندما فرض علينا النفاس 40 يوم في بيت الأهل!!!

النفاس وماأدراك مالنفاس ,,,
المتعارف عليه في المجتمع انو الزوجة بعد ولادتها تروح تسجن نفسها عند اهلها 40 يوم ,, يعني ماتطلع الا وهي طاهرة وعلى سنقة عشرة
وتعرفون الوحدة راحتها في بيتها وبالقرب من زوجها وخاصة اذا معاها أطفال ,, بس مدري ليش هالشي مستنكر بالمجتمع هذا غير الانتقادات اللي تجيك
نفسي أعرف مين اللي طلع هالقانون الله لايوفقه لا دنيا ولا آخرة ,, بصراحه مو اي أهل يتحملون نفاس بنتهم وازعاج بزارينها وانا مقدرة هالشيئ
غير الناس اللي طابين كل شوي وتجهيزات الاستقبال من والى من حلا وقهوة ومعجنات وقرف ,,
بالنسبة لي اتمنى اتمنى أولد واروح لبيتي واتحمل الشقا والكرف والغثا كلله على راسي ,, والزوج المفروض يشارك زوجته هالمسؤولية ويحس فيها
ووقت النفاس اكثر وقت تحتاج الزوجة زوجها بقربها يحس فيها وبتعبها ,, وينسيها حزنها ويوسع صدرها واحنا هنا عندنا العكس تبعد عنه 40 يوم
ومو بس كذا بعد بعض الازواج يستغل الفرصة ويسافر ,, رامي غثا زوجته وصجة ععياله وازعاجهم على كاهل اهله الزوجة ,,
نفسي اذا حملت وولدت قعدت ببيتي ,, نفسي زوجي يقولي مافي نفاس عند اهلك وتعالي عندي بس طبعا مستحيل هالشي ,,
لانه متعود ان اخواته يتنفسون عند امه وهو يستنكررر ان الوحدة تتنفس ببيتها ولا تروح لأهلها يحس الوضع غلط ,, وانا بنفس الوقت استحي افرض نفسي بالبيت بعد الولادة
اخاف اسمع منه كلمة ماتعجبني او اخاف يقول مايبونها أهلها أو ,,,,,,,,, الخ ,,, والمشكلة أهلي مايتحملون ازعاج البزارين اذا رحت لهم مجرد زيارة اقعد على اعصابي فما بالك بالنفاس!
وأبوي كبير بالعمر يبي الهدوء وماله خلق بزران ,, واذا سمع ازعاجهم يقعد طول الوقت تعبان ومعصب وانا ماألومه بسبب كبر سنه
وهالناس والزوج مايرحمون ماغير بس انتقادات على كل وحده تتنفس برا بيت اهلهاا ,, ويتسلطون عليها بالاسئلة ليش وماليش اريح لك عند اهلك يهتمون فيك !
وانتي وش دراك ان كل وحدة ترتاح عند اهلها ,, اكره اللي يقيس الناس على نفسه ,, وأنا بالنسبة لي مارتاح الا ببيتي ولا ارتاح ببيت اهلي ابدا
بسبب ازعاج المبزرة يسبب لي توتر واعيش بقلق واشيل هم غيري بدل ماشيل هم نفسي ,,,
حسبي الله على اللي بدت بهالحركة وخلت كل المجتمع يمشي وراها ويتنفس عند اهله 40 يوم ,,
ياليت يعني لو تجلس عند اهلها أسبوع او اسبوعين لااا لازم 40 يوم !! مصيبة صراحه !
,, شوفو المجتمعات الأجنبية الحرمة تولد من هنا وتطلع لزوجها من هناك والاثنين يتحملون هالمسؤولية !


وانتم وش رايكم بالموضوع ؟؟؟؟ تفضلين تتنفسين ببيتك ولا عند أهلك ؟؟ وليش ؟ وهل تسوين اللي براسك وترمين الانتقادات ورا ظهرك ؟؟