بسم الله الرحمن الرحيم
كــــــــابه احسها وعيش فصول معاناتها بهذا القســـم ليش يا اخواتي وحبيباتي ليه
كلن له همومه وكلن يشوف همه جبال بس ماتضيق الا تفرج
فلما ضاقت واستحكمت حلقاتها فرجت وكنت اظنها لاتفرج
تدرون ماني مطوله عليكم امثال الصبر واجد ومواقفه اكثر
انا اكبر الاولاد والبنات درست وتخرجت بالثانويه وربي مارزقني بمجموع ادخل فيه الكليه مع انه سبحان الله ذكيه
ودائما من الاوائل بس سبحان الله اراده ربي فوق كل شي حلم حياتي اصير طبيبه وربي ماكتب
جلست في البيت وصرت مثل ابي بنت ابي اتزوج واشوف كل الشله بدات تتزوج وصديقاتي بعد الزواج يتنكرون لي
لانه الوضع اختلف مع انه الحال بالاول واحد ما انكر اكتئبت وزعلت ولازمت غرفتي شهرين اصبحت خيال في خيال
بدا الخطاب يجون وسبحان الله ربي مايكتب نصيب كل من دخل طلع كنه سراب واللي يفتحون موضوع خطوبه يروحون
لغيري سبحان الله
اختي اصغر مني تقريبا بسنه وسبعه اشهر تزوجت عن طريق صديقتها اعجب الولد من كلام اخته وجا خطب اختي
مابكذب واقول عادي فرحت لا والله زعلت وتضايقت وحسيت اني من جد بموت وصرت اعامل اختي معامله
غريبه وسيئه للغايه وبس دموعي على خدي تقولون مجنونه رغم اني احاول اخبيها
اروح الحمام وابكي بكاء ماتتصورن
اصبحت من جد كائن بشع حاقد ناقم ليش انا اجمل وافضل ليه وليه نسيت انه قدر
لين انعقد عليها اصبحت شرسه اكثر حتى مع امي صرت اتهمها هي السبب انه اللي تقدموا ماكانوا يوافقون
يتشرطون مابقى الا انا ليش وليش لدرجه قلت لامي مره انا مو قاعده على قلبك لانها قالت ربي يزوجك وارتاح تخيلوا
حبست فرحه اختي كله عشان لا ازعل تحاول مماتبين انها فرحانه
حياتي اختي وربي
ولين اخذت مهرها حسيت بغصه وهي تقول بسوي واجهز واعمل وانا اتنصت زي البريصي من ورا الباب وابكي
تخيلوا لاي حد لاني كنت اتخيل كلام الناس واهلنا وهم يتصلون يباركون ويقولون وفلانه ليه من جد كني مريض
بوباءونظراتهم ويوم حفله الملكه بدات المصادمات القويه الا اصمم فستان عاري جدا >> ربي يسامحني
والحناء ابي حناء عرايس ومكياج فخم لمخطوبه ومن هالكلام ولين يرفضون ابكي واقول انتي حاقده واني
مو حاضره الملكه
واتمنى من قلبي كل شي يخرب ولا شماته الناس واقلت لامي شمتي الناس فيني ليش ربي يسامحني
امي حبيبتي اذيتها من جد
المهم قبل الملكه باربع ايام وانا ماجهزت ولاشي جلست مع نفسي وعرفت انه اللي اسويه غلط بغلط صليت
واستغفرت ربي دعيت انه الله يرزقني ويغنيني بحلاله عن حرامه
وقفت جنب اختي وديتها لاحسن صالون ورتبت لها حفلتها والكل استغرب سبحان مغير الحال
ولبست وكشخت ورحت الحفله والحمد لله طلعت نجمه بالحفله ورقصت ورقصتها معاي فرحانه فيها وكنت لها
اقرب من امي حتى الكل يفكرني انا الاصغر حتى قلت لا وبكل فخر انا الاكبر يستغربون عاد تخبرون النظره
ماعادت تهمني والحمدلله سجلت بكليه صحيه وعزمت كل البنات وقلت لهم اختي اللي اصغر مني ابيكم
تجون زواجها ويطالعون اصغر اقول ايه بكم بسنتين ورافعه راسي وماهموني واتكلم معهم بعد اختي تجهز تسوي
ابي محلات كوافير تجهيز صالات فنادق كنه زواجي ووديها دكتورات واعملها خلطات راح كل الهم اللي بقلبي
وقلت نصيبي جاي ولو بعد مليون سنه وربي عنده خير كثير لي
تزوجت اختي واشهد بالله اني بكيت مو بكيت فقدتها وبس لاني ودي اعوضها اللي سوته يوم عقدها
حسبي الله عالشيطان حتى لولشه وحده مالولشت لها حتى مشاكلها مع زوجها احل لها
وانخطبت بعد ملكتها حول اربع مرات بس الصراحه مايصلحون لي باي شكل من الاشكال وكنت اقول ربي يعوضني
بعدها بسنتين تزوجت زوجـــي وربي عوض صبري خير بخير من اول يوم شافني فيه لي عنده محبه وغلا الدنيا
حتى يوم الشوفه اكرمني وماجا اللي يده مليانه وهذي صفه حبيتها وشفته وارتحت رغم انه مو اجمل من اللي
جوني بس والله انه بعيني اجملهم الكل قال لا مايصير بس القلب عاد وامر ربي واستخارته دلوني
وسويت حفله وصرت اخيرا عروس وانا الان قريب التخرج وصرت من ولا شي كل شي والحمد لله
وعلى مشاكلي معه والله انه اهون من باقي الرجال ولله الحمد ومشالله تبارك الله ولاحول ولا قوه الا بالله
قصـــــــتي ودي ابعث الامل في نفس اللي ماتزوجت للان واقول صبرك دورك جاي لاتزعلي ولا تياسي من رحمه ربك
قضي وقتك بدراسه بهوايه ترفعك مثل ماسويت انا واستغفري
اللي تحس اني بقصتي رجعت لها الامل تدعي لي وبس ان الله يفرج همي
تحياتي لكم:27:
يلزم عليك تسجيل الدخول أولًا لكتابة تعليق.
الصفحة الأخيرة
الله يوفقكم ويسعدكم ويهنيكم ببعض :26: