عندى حق ازعل من ام زوجى ولا لأ ؟؟

السلام عليكم يا بنات فى موضوع مزعلنى وابغا اعرف رأيكم فيه هل انا عندى حق ولا لأ ؟؟

السالفه ان زوجى اخته الكبيرة متوفيه وولدها دحين ريحيين يخطبوا له وايلى هيروح يشوف البنت( الشوفه ) مرات ابو الولد وطبعا ام زوجى قالت هتأخد معها فى الشوفه بنتها الاتنين وبس علما ايلى هيروح مرات ابو الولد وكمان امها وعماته وحريم اعمامه طبعا هتقولوا كتير بس البنت تقرب له بنت عمته
وام زوجى تكون خالتى اخت امى يعنى تقربلى
المهم زوجى زعل وقال ل امه ليه ما تأخدى زوجتى او زوجة اخويا الكبير معاكى قالت لا خليها فى قرأة الفاتحه زوجى قال لها العيله كلها هتروح على الاقل زوجة ولدك الكبير قالت طيب اشوف .....
وتقريبا اتصلت على بنتها الكبيره وقالت لها لأ مو ضرورى احد يجى من حريم اخوانى
وزوجى مره زعلان قال ليه ما يبغوكم انتى و زوجة اخويا احنا ولدين بس ويبغا يكلم امه تانى ويقول لها لازم احد يروح من حريم اولادك على الاقل مرات الكبير وانا قلت له ما نبغا نروح لا انا ولا سلفتى انتو بتعملونا على اساس اننا اغراب والله يا بنات حددوا الموعد ولا حتى قالت لنا وانا عرفت من بنت اخته الصغيره بالصدفه مع انى كنت عندها واتغدينا انا وهى ولا قالت لى انهم راييحين يخطبوا لولد بنتها ولما زوجى قال لها ليه يا امى ما قلتى ل فلانه قالت معليه نسيت...... الدنيا كلها عارفه ومحددين الموعد من اسبوع ونسيت تقول لنا انا وسلفتى مع اننا ساكنيين معها فى بيت واحد ونزليين طالعين فى اليوم اكثر من مره عندها
وطبعا كل شئ تحكيه ل بناتها بالتفاصيل الممله جدا والله يا بنات حتى لو رحت البقاله تقول لهم اسم البقاله ايلى بنروحها حتى الاكل كل يوم بناتها يعرفوا ايش هنتغدا علما لما اسألها عنهم تقول ما ادرى
وطبعا بما اننا ساكنين معها فى بيت واحد كل تفاصيل حياتنا تقولها لهم والله يا بنات لو زوجى اخد اجازه ورحنا نتمشى وكلم احد من اولاد اخواته يقولوا له ايوه يا خالى امى عرفت من ستى انك رحت المكان الفلانى
المهم زوجى يبغا يكلم امه تانى ويقول ليه الكل يروح وانتو لأ ؟؟هادا حق والاصول تقول انكم تروحوا وانا قلت خلاص لا تسوى مشكله مع امك ما نبغا نروح وزوجى يقول ليه نسكت :mad:لازم اكلم امى ليه تروحوا مثل الاغراب فى الرسميات فقط !!!!!!!!!!

ايش رأيكم اخليه يتكلم مع امه ولا اطنش ؟؟؟؟؟:angry:مع انى زعلانه من حركتها وزوجى يقول لازم اتكلم ما حنا صغاار !!!!!!!!!!