أتمنى إذا كان لابد من نقل الموضوع إلى منتدى آخر ذكر اسم صاحبة اموضوع لأنه اجتهاد شخصي وشاكره لكم
لاحظت في المنتدى الكثير من الأفكار لإسعاد الزوج أو الزوجة أو العيال ... لكني ما شفت أفكار لإسعاد الوالدين .....
ليش؟؟؟؟
فكرتي في يوم من الأيام تفاجئين من ربوج وتعبوا عليج وسهروا عليج
نعم أمج وأبوج ... أغلى ما في الكون... مافي داعي تنتظرين 21 مارس من كل سنة ....
لأن الحمد لله نحن مسلمين وكل يوم عندنا يوم الأسرة .... كم يسوى يوم تشوفين الفرحة في عين أمج وأبوج ... وكم لج أجر عظيم عند الله .... يالله تعالي معاي أعطيج بعض الأفكار إللي عندي ....
بس أكيد أي شي بتسوينه يتطلب غياب أمج وأبوج عن البيت .... علشان تكون مفاجأه
1- غيري غطاء السرير وإذا قدرتي غيري معاهم الستارة والسجاد.
2- غيري صبغ الغرفة والبورد.
3- غيري معلقات الغرفة.
4- غيري ديكور الحمام وخلي فيه مناشف جديدة إللي تجي مع الروب والشبشب وحطي لهم مجموعة لوشنات وصابون الجسم والشامبو وتقدرين تحصلينهم مثلاً في باريس غاليري أو أريج.
5- اشتري لهم هدية وحطي لهم في زاوية من زواية الغرفة بس تكون بارزة وحطي حوالين الهدية شموع معطرة وأوراق ورد مجفف أو طبيعي إنتي وذوقج .... وقبل لا يدخلون الغرفة حاولي تولعين الشموع لأن شكلهم بيكون أحلى.
الهدايا ممكن تكون عن : عطور – موبايل – كريمات جسم – بيجامات – جوتي – شيلة + عباية أو غترة + ثوب – ماكينة حلاقة للأب أو اي شي ثاني يخطر على بالج
6- اشتري كيكة وحطي عليها أسمائهم واكتبي لهم عبارة تعبر عن اللي في خاطرج ، وجهزي معاهم معجنات ومشاوي وعصاير فريش ... وجهزي الهدايا مع كل واحد من اخوانج الصغار أو الأحفاد وخليهم أول ما يدخلون البيت ينشدون لهم اليهال أي نشيدة عن الأم والأبو .... ويصفقون لهم ويعطونهم الهدايا .... وتبغين تكملينها ... سوي نثور ونثري عليهم ورد + حلاوة + فلوس .... يستاهلون الدلع ... والا شو رايج؟؟؟؟
7- احجزي لهم غرفة في فندق 5 نجوم لو ليلة .... وجهزي لهم الغرفة بهدايا ... أو أي تجهيز عندج .... أو اكتفي بالحجز .... وتكفلي بمصاريف الغدا والعشا ... واتفقي مع الفندق إنج بتكونين مسؤولة عن أي شي يطلبونه ... وإذا بغو يدفعون يقولون لهم الحساب مدفوع مقدماً....
8- احجزي لهم تذكرة سفر وفندق على حسابج ... وعطيهم مصروف السفر ... أكيد ما بيرضون ... بس لو أصريتي وحلفتي عليهم أكيد بيوافقون.....
9- ركبيهم معاج السيارة وقولي لهم أني محتاجتنكم تجون معاي ضروري ... وهم أكيد بيفز قلبهم شو فيها بنتهم ؟؟؟ وخليج في السيارة ساكته والأفكار تودي وتجيب فيهم شوي ... لأن لو تكلمتي ممكن تزلين بلسانج وتقولين لهم وين ما خذتنهم ... وكل ما يقولون وين موديتنا ... قولي ألحين بتعرفون .... ولين توصلين معاهم يا البر أو البحر يعني مكان مجهزة لهم فيها جلسه وشوي ومشروبات ... والعايلة كلهم تنتظرهم... لأن أحياناً يحتاجون تغيير جوّ
10- إذا ما عندج امكانيات لكل هذا ... مب مشكلة ... دخلي الغرفة وغيري ديكور الغرفة يعني حركي السرير والكبت ... بس أكيد غيري للأفضل والا خليه مكانه
11- طلعي ملابسهم ودخنيهموعطريهم وعيدي ترتيبهم بشكل منسق أكثر
مب شرط أمج وأبوج حتى أم وأبو زوجج يستاهلون ... وكم يسوى إنهم جابوا لج الرجال اللي يستر عليج وربوه
وحتى الجد والجدة لا تنسينهم....
في النهاية أتمنى إني أكون أفدتكم بموضوعي