أرجو إذا كان لابد من نقل الموضوع ... ذكر اسم صاحبة الموضوع لأنه اجتهاد شخصي ... وشكراً
بنات حبيت أنقل لكم بعض الأفكار المجربة واللي نستخدمها في ترغيب عيالنا بالمدرسة للإستفاده
وبما إن ما باقي وقت طويل على المدارس فحبيت أشاركم بهذا الموضوع ... علشان تعم الفائدة بإذن الله
إذا كان ممكن تاخذين الطفل على المدرسة قبل لايدخلها بعام،،، في السميستر الثاني في آخر شهر كمستمع ،،، خذيه للمدرسة ولا تترددين.... لأنه بيسهل عليج دخلته كثير في السنة إللي بعدها....
تكلمي كثير عن المدرسة وإن هو بيتعلم فيها الكثير من الأرقام والحروف وبيصير مثل أبوه يعرف يقرأ ويكتب .... وإن الأبو وإنتي كنتوا تسيرون المدرسة وتكلمي عن مغامراتكم فيها .... لكن هاااااا المغامرات إللي تشرف أكيد ;) .... وإنه بيكوّن صداقات كثيرة وبيلعب مع الأطفال أشياء كثيره يحبها ... وألعاب جديده بيعلم أصدقائه وهو بيتعلم بعد ألعاب جديده منهم وبيعلمج إيها يوم بيرجع من المدرسة علشان تلعبون مع بعض .....
قولي له قصص عن الطفل الشاطر إللي يسير مدرسته فشوا كسب في حياته ... والطفل الكسلان إللي ما يحب المدرسة وشو من بلاوي جت له .... بس تحملي يكون هو بطل القصة وإن هو الشاطر .... تدرين ليش؟؟؟؟ لأنه إذا باجر قال ما بسير المدرسة ... فتقدرين تقولين له ... لكن بطل قصتنا فلان بيسير المدرسة ... ومامته فرحانه ... وأكيد إنت بعد تبغي تفرحني مثل أمه وتسير ... ومن هذا الكلام....
مثلي معاه تكونين إنتي المعلمة وهو التلميذ .... وبعدين إعكسي الأدوار ... فيكون هو المعلم وأنتي الطالبة .... واشتري بعض الوسائل التعليمية اللي تكون فيها حروف وأرقام وحيوانات علشان تكتمل التمثيلية .... ولا تنسين القصص المصورة ... و اللي تكون بأصوات مثل هذي اللعبة.... وفي اثناء اللعبه ارفعي يدج كأنج تستأذنين إنج تبغين تسيرين تشربين ماي .... أو وانتي بكرامة تبغين تسيرين الحمام .... علشان يفهم إنه ممكن يستأذن لهذي الأمور والمعلمة تسمح
وممكن تحولينها إلى 
أو هذي النوعية
وطبعاً في أشكال كثيرة ... بس حبيت أعطيج الفكرة .... وفي نص الحصة أقصد اللعبة إرفعي صبعج وكأنج تستأذنين تشربين ماء أو تبغين تسيرين الحمام ... علشان يعرف إنه ممكن يستأذن لهذي الأمور
خذي له بعض الأشرطة التعليمية إللي ترغب الطفل في المدرسة والأشياء التعليمية مثل
هذا عن السلوكيات الجميلة
هذا عن الحيوانات
الأرقام
اسالي طفلج المساء ليلة المدرسة شو يحب يفطر الصبح ... وشو يحب تحطين له في اللانج بوكس .... وجهزي له إللي قال لج عليه....
أهم شي تعلمينه قبل لا ينام يقول الإذكار ... ويوم بتصحينه علميه يقول بسم الله الرحمن الرحيم .... ويوم يطلع من البيت ويوم يدخل الصف كله يقول ب
في أول يوم المدرسة اصحي من نومج بدري وحضري له فطوره وخليه يفطر ... وإذا رفض ... لا تجبرينه زكلمي أبوه أو اخوانه الكبار أو حتى كلمي نفسج إنج بتاكلين لأن الأكل يقوي ويخلي الواحد يصير مثل الأبطال واسم شخصية كرتونية هو يحبها....
يوم بتوصلينه المدرسة لأن ضروري تكونين إنتي الموجوده ... وإذا تعذر وجودج وصي اقرب إنسان لقلبه ... عمته خالته جدته اي أحد و تكلمي معاه إنه هو كبير وعاقل وإن إنتي دايماً تتكلمين عنه وتفتخرين فيه جدام الناس بأنه ناضج ويفهم .... فيمكن يشوف أطفال في صفه يبكون .... فلازم يكون له دور بأن يسكتهم ويطمنهم إن المدرسة حلوة ... وإن أمهم وأبوهم ما بيتأخرون عليهم ... وإن هم جايين المدرسة علشان يتعلمون لأشياء الحلوة ... والكلام الحلو المعسول إللي إنتي تبغين توصلينه له بس بطريقة غير مباشره ..... وفهميه إنج بتكونين على الموعد في نهاية الدوام فلا يتأخر عليج .... علشان يفهم إنج بتكونين تنتظرينه قبل طلعته فيتطمن أكثر .... أهم شي ما تتأخرين عليه في اول الأيام
قولي له إن إذا احتاج شي أو بغى أي شي فلا يخجل ... يرفع يده بكل أدب ويطلب من المعلمة أي شي يبغيه ... والمعلمة بتلبي طلباته ... لأن المعلمة تحب الأطفال وبالذات اطفال الحلوين المؤدبين إللي ما يصيحون ... ولا يسوون فوضى في الصف .....
أول يوم مدرسة حاولي توصلينه لين باب الفصل ... وضميه بقوة ... بس لا يشوفج أحد من الطلاب وإنتي تضمين طفلج .... جايز يكون فاقد أمه ... أو أمه من فصله عن أبوه وحروم منها ... أو ما تهتم فيه ولا تفكربأن تضمه لصدرها ... فيحز في خاطره ... وبالتالي تكونين تسببتي في كسر خاطر طفل .....
اشرحي لطفلج إنج تركتي رقمج ورقم والده عند إدارة المدرسة .... وإذا احتاج أي شي يقدر يكلمكم .... واتفقي مع إدارة المدرسة على هذا الشي علشان يتطمن قلبه الصغير...
يوم بيرجع البيت احضنيه بقوة وقولي له إنج اشتقتي له كثير .... وافتخري فيه ... واسئليه كيف قضى يومه في المدرسة ... وإنتي كل حواسج معاه والإبتسامه خليها تشق الوجه ... واطبي منه معرفة الكثير عن الفصل والطلبة والمعلمة وغيره وبكل حماس فيه .... خليه يفضي كل اللي في جعبته .. لين يمل ويقول خلاص... ورجعت البيت .... وامدحيه قدام ابوه وخلي الأبو يحضنه ويطبطب على كتفه كنوع من الفخر ... ويقول له اليوم الطلعة على مزاجك لأنك بيضت وجهي ... أو هذي هديتك ... لأنك رفعت راسي أي شي ... بس المهم يحس الطفل إنه سوا شي يعجبكم ويرضيكم ....
لا تنسين بين فترة وفترة تفاجئينة بهدايا يحبها... أو أكله ... أو طلعة ... وتفهمينه إن الطفل إللي يحب المدرسة يستاهل ... كل خير ... علشان ما يربط الهدية بالمدرسة .... ويعرف إن في أشياء ثانية ممكن تقدم له ....
في النهاية أتمنى أكون قدمت لكم شي مفيد