عندي اكتئاب شديييييييييد

السلام عليكم اخواتي
من زمان ما دخلت المنتدى او كتبت او علقت ما الي نفس لاي شي بهاي الدنيا...عندي اكتئاب شديد جدا وبحس يوم عن يوم بزيد عم بحس لو اموت وارتاح من هاي الدنيا بكون ارحم الي
انا قبل هلمرة كتبت بالتفصيل عن مشكلتي ماراح اعيد الكتابة بس راح احكي باختصار اني بعاني من الاجهاض المتكرر وفي امل بالعلاج بس بابر تسييل الدم كل يوم ..الله يرزقني هالشهر ويرزق كل محرومة يا رب..ومشكلة زوجي متفنش من وظيفته صارله سنة تقريبا بعد زواجنا بكم شهر بس
انا مشكلتي هلا جديدة هي انو زوجي من شهرين بس بلش بشغل مفروض يكون بارت تايم يعني بس 4 ساعات باليوم حكالي بروح بشتغل فيه وبغير جو بدل اعدت البيت وبالمرة بطلع ولو مبلغ قليل نسدد فواتير البيت وانا وافقت حكيتله بضلها احسن من اعدت البيت ومفروض يكون الشغل من 2 - 6 المغرب ..وياااااااااااريته ما اشتغل
صار كل يوم يطلع من 2 الظهر ويرجع 12 بالليل تخيلو كل يوم واجازته يوم الاثنين بحجة الروحة والرجعة بالباص الباص بياخدهم وبرجعهم ولازم يستنى كل الموظفين ليخلصوا عشان يروحهم وخدوها ممكن ستنى 5 ساعات بعد الدوام وهو يستنى الباص يخلص وما في عنا امكانية حاليا انا نطلع سيارة والمواصلات العمومية غالية جدا يعني من مكان شغله للبيت بتكلف مش اقل من 100 يعني طار الراتب على مواصلات بس ..انا دورت على شغل اني الهي حالي واطلع مصروف ايدي على الاقل وشغلي كمان طويل من 8-5 ولما حكالي على هدا الشغل انا حكيت ممتاز هيك بدل اعدت البيت بغير جو وبشوف عالم لين الله يرزقه الوظيفة المناسبة وعلى الاقل بخفف من عصبيته وضيق خلقه من اعدت البيت ...بس للاسف شغله هدا دماااااااااااااااار ما بنشوف بعض نهائيا نهائيا يعني ساعة باخر الليل انا بطلع الصبح هو بكون نايم برجع العصر هو بكون طالع انا ببلش شغل وتنظيف وطبيخ وبضل استنى برجع على 12 او 12 ونص واذا بكيييييييييييييييير بكون 10 ونص بس تعبان ومهدود ومكتئب وعلى 1000 بس بالشهر بحكيلو وين احنا ووين هالوظيفة يعني لا راتبها زي العالم ولا وقتها زي العالم ولا هي من مستواك بحكيلي بضلها ارحم من اعدت البيت...حتى بالاجازة انا اجزتي خميس وجمعة بضل اعده لحالي بالبيت طول اليوم كل العالم طالعة وبتغير جو وبتشوف الاهل الا انا لحالي بين 4 حيطان وانا بستنى الاجازة بس تيجي اني اشوف زوجي اعد معاه نطلع مع بعض نشوف الدنيا وانا شغلي كل الي معي هنود مافي حد لا احكي معاه ولا اغير جو ولا اشي ...ويوم الجمعة بروح فيه بدري بطلع مع اصحابه بحجة هدا اليوم الوحيد الي بطلع فيه يشوف اصحابه وانا بالجمعة ما بشوفه غير وهو بغير اواعيه عشان يطلع ..حتى بترجاه طيب على الاقل افطر معي كل معي لقمة اعد معي ساعة بحكيلي معلش بستنوني ....حكيتله بستقيل من وظيفتي وباعد بالبيت بس نشوف بعض احس حالي متزوجه بحكيلي مش وقته ابدا محتاجين الراتب تاعك على الاقل اطلعي مصروفك لاحصل شغل يصرف علينا
عم بحس بالوحدة وبالفرااااااااااغ بجد فراغ كبير حاولت الهي حالي بكل اشي بشغلي بالبيت حتى بقراءة القران قربت احفظ سورة البقرة لاني كل يوم سرت اقرءها واعد استغفر بالساعات و بالطبيخ حتى بطلع على السوق مع اخته بس محتاجه زوجي محتجاه كتير ..بطلت احس حالي متزوجه ..بحس حالي بشتغل عشان اصرف على حالي وبروح على البيت اطبخ وانظف للضيف الي جاييني اخر الليل...
بعدين بحكي حرام الله يعينه عليه مصاريف وشغل وفواتير من وين بدنا نصرف ونسدد الله يعينه
عايشة بصراع كبير كبير مرة بتحمل ومرة بعيط امي بتحكيلي اصبري وزوجك وقفي جمبه وراعي ظروفه ..وحماتي اتصلت فيه بتحكيلي وقفي جمب زوجك وراعي ظروفه وتحملي وضعه وخلي الساعة الي بروحها تكون جنه يدخلها وبستنى يروحلها..وهو بحكيلي محتاج زوجتي تدعمني بدي اطمن وضع البيت مستقر عشان اقدر اقاوم الحياة بره البيت
وانا ماحد لا واقف جمبي ولا ساندني بس بضل الكل يحكيلي اصبري ...صبرت على كتيييييييييير اشياء ..بس محتاجة لزوجي يكون جمبي ..محتاجة للحظات تكون موجوده بينا زي زمان...صايره احس زواجي عبارة عن ساعة باليوم وبس ومافي اي تعويض او اي شي...ومن جواتي بحس حالي كل يوم بموت اكتر من قبل

تقاتلت مع زوجي اكتر من مرة انو حرام عليك هيك ما بنفع بطلت اشوفك هاي مش عيشة ..بحكيلي اعطيني حل ..يا اشتغل هيك لين ما الله يفرجها علينا بوظيفة تانية يا اعد بالبيت لا شغلة ولا عمله والفواتير تتراكم

في كتير حكي وكتير شغلات بس بعرف طولت عليكم..بدي دعوة منكم تخفف عني ..بدي خواتي يكونوا جمبي يساندوني ويدعموني ..خايفة اضل اكتم جواتي اروح اخرب كل صبري هالمدة واضيع كل اشي استنيت كتير ..خايفة بس ينفد صبري اخرب بيتي بايدي ..ادعوالي الله يصبرني ويثبتني ...

خواتي كلامي مجرد فضفضة ..كنت محتاجة احكي الي بقلبي خوف ما انفجر