عندي رعب من شي أسمه ولادة

حبيت أستشيركم في شيء ماعرف إذا هو طبيعي ولا لا...أنا مب متزوجه لين ألحين وأكيد مثل أي بنت أتمنا أتزوج الأنسان المناسب...لكن عندي رعب أزلي من شيء أسمه ولادة رغم أني مب صغيرة ولا مراهقة يعني أخر العشرينات..بس أحس هالشي مثل العائق اللي يسبب لي رعب من الزواج أحس ممكن أتحمل كل شيء إلا وضع الولادة. غير القصص المخيفة أللي سمعتها..يمكن غلطت وسويت شي ما كان لازم أشوفه بس من باب الفضول شفت فيلم طبيعي عن الولادة وما تتخيلون شو صار فيني..أنواع من لوعة الكبد والغثيان ما قدرت أتحمل ما كملت..هالشي صار من فترة طويله هذا غير أن أخت زميلتي فالجامعة كانت طالبة تمريض وقالتلي أنها إجباري حضرت ولادة وبعدين أغمى عليها لان ما تحملت!!. هالقصص زادت الوضع سوء..يعني ماتخيل نفسي عندي القدرة على تحمل هالنوع من الألم إذا كان وجع الدورة يذبحني فما بالكم بالولادة والآلام والطلق..أنا حتى أحس بنفسي جاهله ماعرف كيف بولد وشو لازم أسوي ومتى لازم أولد..وبعدين قريت وايد في هذا الموضوع قلت خلني أثقف نفسي يمكن الخوف هذا يزول..بس شفت نفسي خفت أكثر وأنا أقرا عن الأضرار الجانبية اللي ممكن تستوي من تمزق مهبل وسلس البول ونزول المثانة وتفور الزوج بعد الولادة من الممارسة الزوجية...

طبعا اللي زاد من خوفي كله تجربة خواتي ..أختي الكبيرة كل ما تي بتولد يمكن تنحبس يوم أو يومين ولو تشوفون أمي أنواع القلق والضغط يرتفع وتقعد تتحرطم وتتأففف وشوي بيوقف قلبها..يعني هي بنفسها تسويلنا قلق أكثر من اللازم وطبعا هي تكون في البيت لان رجولها ما تشيلها تروح المستشفى وتشوف أختي وهي تولد..وأختي الوسطانية نفس الشي لما تزوجت تبهدلت في الولادة ولما رحنا نزورها وسألتها قالتلي ما تتخيلين كيف الولادة شي صعب ويبهدل وكيف مؤلم صدق إن الحريم مساكين! هاللشي زاد إحساسي بالرعب كيف بتحمل أن كل هالممرضات يشوفوني وأنا عرياته و فاتحة ريولي و يشوفون أماكني الخاصة أحسها صعبة صعبة بشكل...ماعرف تيني فترات أقول ما بتزوج دام أني ما تحمل هالأشياء ولا أقول دام أني مب قد الشي ليش أغامر وأسويه...مب واثقه من قدرتي على تحمل هالشيئ...ظنكم هالشي طييعي قيني ولا لا..وإذا هالرعب موجود هل بينفع أني أتزوج؟ أحس أني بطلب أولد قيصري عشان ماتعرض لها الوضع الفظيع فالولادة الطبيعية...ماعرف يعني أتمنا أتزوج بس الخوف يمنعني لما أتذكر أن الزواج فيه حمل و ولادة ...هل في حد مثلي ولا أنا الوحيدة اللي أفكر بهاي الطريقة؟ وشو الحل