عندي عزيمة وآخر من يدري أنا..&مشورتــــكم&

السلام عليكم..
كيفكم بنات..
عندي مشكلة عجزت اكلم فيها زوجي لكن مافيه فايدة
زوجي كريم لكن على حسابي وحساب راحتي ونفسيتي..
الاسبوع اللي طاف قلت له ابي السوق بكرة اذا ماعليك كلافة
قال:بكرة عازم زميلي وزوجته للعشاء..بلعتها وسكت قلت الله يحيهم فرصة اتعرف عليها بس المفروض خبرتني اول مرة تجي وابي لي بعض الاستعدادات قال صلحي الميسور وﻻ تبدينها بكلافة علشان تدوم صداقتكم..بس مهما كان وحدة اول مرة تجيك تبين تبيضين وجهك يعني لو ماقلت ابي السوق كان ماقال لي وﻻ فكر..مع اني بطبخ كل شئ بس الشكوى لله..
بعدها بيومين قلت بتصوم بكرة قال عازم رجاجيل قهوة للمغرب..مع اني كنت تعبانة وﻻ فكر وﻻشاورني عادي اعزمهم
واللي طق كبدي امس مستعدة ومحمل اغراضي بروح لاهلي ماشفتهم اسبوع ونصف واتفاجأ برسالة من اخته تقول خلاص ان شاء الله..قالي شكل اهلي عزموا يجون اني مكلمهم يتعشون عندنا هنا ثارث ثايرتي..اذن العشاء ومستعدة بروح ﻻهلي قلت اذا كانوا بيجون قل راحت ﻻهلها اول شئ ليش ماردوا عليك مبكرين وثاني شئ ليش ماأخذت رأيي واذا  مستعدة ﻻستقبالهم..وانت عارف ان اليوم اجتماع اهلي.
.وصارت اخته تتكلم عن سالفة ثانية وقالي لو كسبتي معروف وانك بتستقبلينهم كان افضل..وزعل علي يقول اهلك يمديك عليهم مع العلم خواتي مجتمعين ومن زمان ماشفتهم واهله شايفتهم قبل يومين..والله يحييهم جوني كم مرة بس المفروض مايعزمهم وهو عارف اني مرتبطة بس مايهمه آخر تفكيره انا..مع انه طيب في اكثر النواحي..
بس عنده اللي بتزينين لي زيدي فيه مو ﻻزم تدرين..
وش رايكم اراضيه واﻻ اسفهه انا ماأخطيت من حقي يأخذ رأيي بالامور اللي بيقدم عليها..احيانا ادري من اهله عن بعض الامور..مرة عازمهم باستراحة واعتذروا ويسألوني يقولون ليش بتحطون عزيمتكم باستراحة..
مادريت عن العزيمة ادري عن الاستراحة..وزعلت عليه قلت حطيتني بموقف بايخ عند اهلك..
قالوا ماتدرين..صرفتهم قلت تغيير عن البيوت
وغير هالمواقف كثير بس ماقهرني اﻻ انه زعل وعصب
مع انه من المفترض اني انا اللي ازعل