عندي لكم طبخة كبود ...لكن .....شيييييييييي!!

السلام عليكم .. إشلونكم حبيباتي..
عندي اليوم لكم اليوم ناشف كبود صج حلو وجربته ليلة أمس تدروون شنو قالو بيتنا
أبوي: حاسبوا بتاكلون أصابعكم ..كل واحد يشوف صبعه وهو ياكل!
أمي:وايد حلو حبيبتي .. تسلم يدج.
أختي: ما كلت لأن ماتحب الكبود .
زوجي .. وإنتوا طبعا عندكم راي زوجي أكيد أهو الأهم ..تصدقون زوجي إتبعت معاه خطة حلوة وهذي دايما إتبعوها علشان تعرفون الطبخة الي تسونها تعجب أزواجكم ولا لا ..
طبعا كل وحدة تعرف قيمة العيش أو كم قطع تحط حق زوجها يعني كل وحدة تعرف إشكثر ياكل زوجها.. دايما حبيباتي حطو زيادة عن الكمية الي ياكلها لما تسوون طبخة جديدة وإذا أكل الكمية كاملة بغض النظر عن المديح معناه إنج نجحتي في الطبخة ..وآنه سويتها مع زوجي ..تصدقون تعب وهو ياكل حتى لما كان ياكل كانت أمي قاعدة جنبه ..كل ساعة يوقف الأكل ويلتفت على أمي ويقول لها .. عمتي تعبني طباخ بنتج وايد حلو وهي حاطة وايد ولازم أخلصه ما أقدر أوقف من حلاوته..
طبعا كل وحدة تستانس إذا تعب زوجها من روعة طباخها.
على العموم حبيباتي ما راح أطول عليكم .. الي زوجها أو أهلها يحبون الكبود لا تتردد تسويه والمقادير التالي:
كمية من كبود غنم أو بقر ما أدري بس مو دجاج .
بصل + ثوم + بزار + ملح + حبة طماطم مهروسة عدل ويفضل إنك تحطينه في الخلاط + صلصة طماطم + زنجبيل+ فلفل أسود مطحون + فلفل أحمر مطحون

الطريقة : تقطعين البصل إلى قطع صغير جداً وتحطينه على النار مع كمية كافية من الزيت ، وتهرسين الثوم مع الزنجبيل وتحطينه مع البصل ، وتحركينه على النار ولكن حاسبي ما نبي البصل يحمر بس شوي ينقلي ويصير نوعاً ما أبيض شفافي حتى تضيفين عليه الكبود ويفضل إنك تكونين مقطعته إلى قطع صغيرة وتغلقين الجدر وتخلينه على نار هادئة جدا لمدة خمس دقائق.وبعدين تضيفين جميع المقادير السابقة وتحركينه عدل
ملاحظة:ما تحطين فيه ماء أبدا لأن بروحه راح يصير فيه ما ء من الكبود ومن عصير الطماطم الطبيعي.

وتتركينه على نار هادئة جدا لين ما يصير موعد التقديم وكل ما حطيتيه أكثر أستوى الكبود ألين وأحلى. وبالهناء والعافية .