عندي مشكله ومالقيت لها حل..

السلام عليكم ورحمة الله وبركاته..
حبيت اكتب هنا لأني متأكده انكم حتلاقو لها الحل ان شاء الله..
هذه قصه لانسانه جدا عزيزه علي وكتبتها بنفسها لما شافت الموقع وعجبها بس ما عندها كمبيوتر عشان تشترك فيه:
أنا سيده متزوجه ماكملت حتى 3 سنوات..
من أيام فترة الخطوبة والملكة أم زوجي(زوجي ولد خالي) وهي ما تعاملني تمام حتى في الأعياد أقولها كل عام وانت بخير ماترد علي واذا سألتها عن اي شئ ترد بجفاء..
واخت زوجي الصغيره(بنت خالي) حاولت كم مره تفرق بيني وبين اخوها..وخالي انسان صاحب مشاكل لدرجة انه اتخاصم مع والدي تعرفوا ليش لأن خالي وعد ان الزواج بعد ما يشتغل ابنه وانا اتخرج من الكليه..واشتغل ولده واتخرجت ومرت سنه واحنا على كده طبعا بعد تخرجي اما فترة الملكة فأنا أخذت بكالوريوس فيها(4 سنوات) المهم ماحدد الموعد ووالدي شاف انه مره زودها وكلنا صابرين لأنه ولد خالي ماشاء الله ولد حلال..
المهم تزوجنا ولله الحمد ومن تاني اسبوع لنا في الزواج بدأ خالي يتدخل نروح فين ونجي متى رغم اني ماكنت ساكنه عندهم بس لما ازورهم تصوروا حتى بيت اختي كان بيحرش ولده اننا مو لازم نروح عندها..
وبعد كده حصلت مشاكل في شغله حكايه طويله انظلم فيها زوجي وانطرد من شغله (لأنه اشتكى مكتب العمل انهم ما أستلموا رواتب 6 شهور والحكايه طلعت في الجريده)..
المهم طلعوا يصرفوا علينا اهله واهلي يصرفوا علي..وفي النهايه اشتغل عند اخوي في مكتبه..والحمدلله الان لقي وظيفه وسكنا في نفس منطقتهم (جده) لطبيعة شغله ومكانه..
وبدأ القلق الحقيقي كلام زايد عن اسلوب اكلنا ولبسنا وتماشينا وكلامنا حتى يتكلموا قدامي عن اهلي واسكت واصبر احتراما لزوجي ولأنهم ناس ناقصين ..
لدرجة انهم كل غلط يسويه ولدهم يحطوا الغلط مني وانا السبب..حتى الحمل ربي مارزقنا الى الان ومو مني ولله الحمد أنا سليمه لكن زوجي اللي هو ولدهم(لايوجد لديه كائنات منويه) وبرضو يحطوا السبب مني لدرجة انهم مره شكوا انه مني..
رغم اني والله العظيم عاملتهم زي اهلي واحترمتهم وقدرتهم وسويت لهم اللي بنتهم والله ماتسويه لكن لا يحمدوا ولايشكروا وغير كده ابوه اللي هو خالي كل بعد فتره يجي ويقول ردوا الفلوس اللي زوجتكم بها وفلوس فرش البيت واخيرا طلب من ولده مساعده انه يقترض له من البنك وولده حب يساعد ابوه عشان يمكن يعاملونا تمام ويبطلوا اسلوب معاملتهم البايخه لنا لما يشوفونا اننا نبغى نساعدهم وقال له انه هو(ابوه) حيرد الفلوس علما بأن المبلغ 70 ألف ويترد 1500 ريال كل شهر ومع الفوائد يطلع 90 ألف المهم بعد ما أخذ المبلغ عمل نذاله في ولده وقالوا انت سدده حق الزواج و.......المهم زوجي انصدم صدمه جامده في اهله وبعد كده كلهم قاطعوه اخواته واخوانه بعد ما اخذتوا الفلوس وعلى قوله خالي هو ماعنده فلوس وعنده دين لواحد طيب اذا ماعندك فلوس ليش تشتري لولدك بلاي ستيشن 3 بعد ما أخذت الفلوس وغير كده دخل حرمته وبنته نادي معروف في جده ومعروف انه غالي جولدز جيم..طبعا كل هذا بفلوسنا ومشاريعي انا وزوجي في شقة الاحلام والاطفال طارت وغير كده وقتها كان زوجي مدخل سيارته الورشه عشان صدمتها سياره ولاقدروا بس كويس انه السياره كانت في ورشة والدي وقال لنا نسددها بالتقسيط بس حق الاشياء..هذا والدي أما والده كذب عليه وقهره(علما بأن خالي مدرس متقاعد حديث يعني اخذ مكافأة وسنواته كامله وزوجته موجهه لها اكتر من 30 سنه في سلك التعليم يلا احكموا وشوفوا طمعهم يالطيف) لدرجة ان زوجي مايحب يروح عند اهله ويحب يروح عند اهلي لأنهم يقدروه عكس اهله اللي من يوم ما ندخل عندهم يبدأ كلامهم الزفر أنا قاطعتهم وقلت ما حأروح عندهم الا في المناسبات..
وهو قلت له روح عندهم لاتقاطعهم أمك وأبوك جنتك ونارك وبصراحه أنا قاطعتهم لأسباب كتيره غير كلامهم الزفر واللي يقهرني سواء عني أو عن ولدهم أو عن اهلي لأنهم يالطيف ناس كدابين..
وحقوديين وفيهم طمع وحسد يالطيف..
فقولي لي صح اللي انا عملته وايش اسوي مع اهل زوج زي كده كم مره حاول يحرشوا زوجي علي لدرجة مره حاولوا يكرهوني فيه..بس أنا اعرف زوجي اكثر منهم..
ومره امه زعلت منه راحت ماسلمت علي لما جيتهم ولا قابلت ولدها..
بجد انا مره طفشت منهم وما ابغى اسمع شئ عنهم لكن للأسف اخته الكبيره بكره تبغى تجيني وانا ما أكذب عليكم هذه احسن وحده فيهم بس والله ما أبغى احد فيهم بس ما أقدر اقول لا هذه برضو اخته..
بس قولوا لي كيف اعاملها وكيف اعاملهم كلهم ..
أسفه طولت عليكم بس الله لايجعلكم تعيشوا النكد والقهر والقهر والقهر اللي عشته مع اهل زوجي..

هذه اختصار القصه بس والله اقول لكم انه معاناتها اكثر من كده زي ماقلت لكم ساعدوها والله محتاجه لأحد يخرجها من كآبتها وأنا حأصور لها الردود واعطيها اياها بس ساعدوها..:26: