عندي موعد في مركز للإخصاب وخايفة

السلام عليكم

انا متاخره عن الحمل سنتين

ولا مره حملت وكل اللي تزوجو معاي وبعدي حملو وولدو
الحمدلله على كل حال
سويت فحوصات من سنه وكلها سليمه وكل شهرين ثلاث اشوف التبويض والحمدلله ممتاز

فقررنا انه زوجي يسوي تحليل وطلع عنده ضعف بسيط فالحركه والعدد وشوي تشوهات

اخذ علاج ٣ شهور ورجعنا سوينا تحليل والنتيجه نفسها

مع انه قاله الدكتور انه حالته ماتعتبر عقم وانه لو ما كان يسوي التحليل عشان تاخر الحمل كان قاله الدكتور انت طبيعي ما تحتاج علاج

الحمدلله حالنا احسن بكثير من حال ناس كثيره وهذه نعمه من رب العالمين دايما احمد الله عليها

المهم الدكتور وصفله ادويه ثانيه من شهرين تقريبا

ولكن حسينا انه بعدنا ضايعين مانعرف شنو الخطوه الثانيه وبس ننتظر

فقررنا ما نضيع وقت ما دام انه نعرف المشكله ونروح عند مركز اخصاب نعرض عليهم تحاليلنا ونشوف شو خياراتنا

هذه اول مره اروح عند دكتوره متخصصه في العقم والاخصاب
وخااااايفه
اول مره اخاف بهشكل ماعرف ليش
والموضوع مأثر على نفسيتي وزوجي لاحظ بس اتعذر بأسباب ثانيه

ما ابغيه يتحسس من الموضوع لانه حراام يظل متلوم وحاس بالذنب وانا ما ابغيه يحس بالذنب

المهم خواتي اللي راحت عند دكتور متخصص
شو الاجراءات وشو ممكن اتوقع حاسه بخوف
ومتوتره
ماعرف ليش صابني هالاحساس، يمكن لاني خايفه من هالمرحله والابر والعلاجات او يمكن لاني
ابداً ما توقعت انه نوصل لهالمرحله
كل شوي اشوف بطني فالمرايه وتنزل دموعي واتعوذ من الشيطان

الحمدلله على كل حال

انصحووني وخففو عني

على فكره ولا احد من اهلي واهل زوجي يعرف بالموضوع
ولا احد يعرف عن الفحوصات وعن زوجي

دايماً نقول الرزق بيد الله و الله ما كتبلنا
واحاول دايماً ما اتكلم فهالموضوع وما اعطي مجال لأحد بأنه يستفسر لانه تبدأ تطلع الاستنتاجات والكلام والقيل والقال وكل واحد يفسر حالتي على كيفه حتى امي مابغيها تحاتيني بس اقوللها نحن بخير وسليمين وبحمل يوم الله بيكتبلي

فالافضل اظل غامضه وكاتمه ومرتاحة كذا

فما عندي احد افضفض له غيركم

طولت الموضوع بس حبيت اقول اللي فخاطري

انصحووني وخبروني شو ممكن اتوقع وشو بيصادفني وشو لازم اسوي عشان اثبت واظل قويه وصابره

انا الحمدلله ملتزمه بقيام الليل والاستغفار والصدقه والاذكار

ادعوولي احمل طبيعي بدون علاج وادويه وحوسه مستشفيات

ربي لاتذرني فردا وانت خير الوارثين
ربي هب لي من لدنك ذرية طيبة انك سميع مجيب الدعاء