السلام عليكم ورحمة الله وبركاته..
مساء الخيييييييير يا حوائيات.... وحشتوني وااااااااااااااايد وصارلي فترة طويلة انشغلت فيها عن المنتدى بس والله انشغلت في الصيفي والطلعات والمشاوير لكن ××× كل يوم يمر وما اتصفح منتداي الغالي احس ناقصني شي واليوم ان شاء لله اتوفق في عرض هذه المشاركة البسيطة والمتواضعة امام مشاركاتكم الرائعه والمميزه وارجو من الله من خلال مشاركتي هذه اني اقدر افيد بعض الاخوات العزيزات ولو بشي بسيط وانا اعتذر وايد وسامحوني على رداءة التصوير لانه من كاميرا الجوال..
العناية بالوجه :
- صابونة Acne Aid اول ما اصحى من النوم اغسل وجهي فيها وهي صابونة اكثر من رائعه وانا نزلت موضوع عنها من قبل وصارلي اسبوعين بالضبط وانا استخدمها والنتيجه رووووووعه ما شاء الله تبارك الله صارت بشرتي نظيفه والحبوب ما طلعتلي والآثار خفت وصحيح احس بشوية حراره وجفاف بوجهي لكن هذا طبيعي لانها تعالج وتجدد خلايا البشره.
- اسكينول الشفاف باااااااارد عالوجه وينعش كل صبح استخدمه بعد تجفيف وجهي.
- سائل اولاي للتجميل يرطب وجهي بفعاليه وما يترك اثر دهني.
- مناديل جونسون للتحكم بالدهون لازالة المكياج وهذا امر ضروري خاصه بعد المناسبات اللي تحتم علي وضع مكياج لاني الحمد لله ما العب بوجهي بالمكياج بكل وقت.
- كريم جرجنز استخدمه لتنظيف مكياج العين لو كنت حاطه كحل وماسكرا ضد الماي وهو ممتااااااز وما يحرق العين ويزيل مكياجها بسهووووله عكس مناديل جونسون تتطلب تكرار مسح العين.
- غسول نيفيا عميق المفعول لازالة بعض الشوائب من المكياج او المناديل او كريم جرجنز وارجع اغسل وجهي بصابونة Acne Aid وترجع بشرتي نظيفه ومنتعشه.
- كريم سموديرم لإزالة آثار حب الشباب والزيوان وبقع البشره استخدمه مره وحده يومياً ويفضل قبل النوم بعد ما اغسل وجهي بصابونة Acne Aid واجففه بربع ساعه.. وهذا الكريم تحفه وعجبني وايد الحمد لله واحس بشرتي بدت تتقشر وتخف البقع والآثار مع احمرار وتهيج بسيط في البشره بسبب تقشرها واشوف الجلد الميت الباهت يتقشر اليوم الثاني.
- كريم كليراسيل لمحاربة البقع المكثف كنت استخدمه لو طلعتلي حبه كل شهر عشان (....) لكنه بصراحه يزيد احمرار الحبه وما يخفيها وانا صورته عشان احذركم من استخدامه لانه والله ما فادني.
- ماسك هيمالايا المكون من الخيار واللوز لجميع انواع البشرة كل اسبوع تقريبا استخدمه واحس بعد استخدامه بنعومه وليونه وطراوه في بشرتي.
- تونر هيمالايا المنعش بالليمون والياسمين لازالة شوائب الماسك ريحته تجننننننننننننن ومنعشه.
- لوشن هيمالايا مرطب للوجه بالصبار وزيت بذرة جنين القمح وفيتامين E استخدمه بعد ما يجف التونر لان وجهي يحتاج ترطيب بعد الماسك والتونر واحس هاللوشن مريح لبشرتي وتمتصه بسرعه وما يترك اثر دهني وريحته ريحة اعشاب هاديه.
العناية بالفم والاسنان :
- معجون كولجيت مناسب لاسناني وينظف بجد لانه عباره عن معجون كريم مثل سيجنال وما افضل معاجين الاسنان اللي على شكل جل لانها تصفر الاسنان وما تنظف وتعطي نفس منعش فقط.
- فرشاة كولجيت للاسنان تناسبني ومريحة الاستخدام وكان مكتوب على باكيتها بالنعناع المنعش والجزء الخلفي منها لتنظيف اللسان لكن مو واضح في الصوره.
- غسول كولجيت للاسنان والفم منعش وما يحرق وما يحتاج تخفيف مع الماي.
- خيوط اورال بي لتنظيف الاسنان وحده بدون نكهة والثانيه بالنعناع كلهم ممتازين.
- مرطبات الشفايف الاول من اليمين ياباني بنكهة الخوخ حلوه ريحته كأنه حلاوه وجنبه مرطبات لابيلو الفراوله والعسل مع الحليب واللؤلؤ كلهم حلوين والاخير بالفراوله من شركة golden rose احسه اروع من لابيلو ويرطب اكثر ويكسب الشفايف لون طبيعي.
وعشان احافظ على اسناني بعد الاكل لو كنت طالعه برا البيت ما استغنى عن حلاوة اكسترا وعلكة سمينت وعلكة اكسترا بالفراوله انصحكم تشترونها والعلبه الوحده فيها 60 حبه والعلب الثلاث الي جنب بعض هي علكة ما اذكر اسمها بالجريب فروت والنعناع والتفاح الاخضر وكلهم منعشيييين.
العناية بالأذن :
الاحظ للاسف شريحه كبيره من الناس تتجاهل نظافة الأذن رغم ان نظافتها مهمه جداً واستخدم في تنظيفها اعواد الأذن للاطفال مناسبه حتى للكبار ولخلف الأذن ارش ديتول المخفف على عود التنظيف وانظف الأذن من ورا واحس بنظافه وانتعاش وحتى لما ارش عطر او دهن عود خلف الأذن احس الريحه واضحه وثابته لنظافة المنطقه اساساً.
العناية بالشعر :
- شامبو لوريال ضد القشرة وانا ما فيني قشرة الحمد لله لكن مكتوب عليه يناسب الشعر الدهني مثل شعري.
- شامبو لوريال للاطفال بالبرتقال الصيفي احسه خفيف ويجفف الشعر.
- شامبو ألبيرتو بالنعناع والشاي الاخضر يخفف دهون الشعر وريحته تجنن ومنعشه.
- البخاخ عباره عن سدر مطحون مع ماي معدني ارش منه على شعري كل اسبوع بعد استخدام اي شامبو والنتيجه ولله الحمد خفت دهون شعري بكثيييير وصار شعري طبيعي ما يدهن بسرعه.
- السيروم الشفاف لمنع التقصف استخدمه للاطراف فقط لانه زيتي وايد وريحته مثل ريحة عطر cool water الازرق القديم.
- زيت الخروع من شركة النحاس استخدمه احياناً لما يكون شعري جاف وناشف خاصه لو كثرت من السدر.
- كريم دابر فاتيكا بالليمون وزيت شجرة الشاي واللوز ريحته منعششششه واحب استخدمه لشعري كامل بس عشان ريحته الحلوه.
إزالة شعر الجسم :
- كريم فيت بزيت اللوز للبشره الحساسه استخدمه لإزالة شعر الساقين والذراعين والله يشهد انه مريح وبعكس كريمات إزالة الشعر الثانيه اللي تهيج البشره وحتى ريحته حلوه وغير مزعجه مثل الباقي وما احس باي حرقه معاه وكاني ادهن بكريم او لوشن عادي واتركه لمدة 7 دقايق وبعدين امسحه بفوطه مبلله ويطلع الشعر بعد 3 اسابيع خفيييييف وناعم.
- شرائح فيت الشمعيه بزيت اللوز للبشره الحساسه استخدمها لمنطقة تحت الذراعين واعتبرها اهون عندي من الحلاوه صعبة الاستخدام وتجيب لي حساسيه وحبوب، هالشرائح الحمد لله تزيل الشعر بسرعه لكن مشكلتها تترك اثر الشمع يلصق بالبشره واللي يزيل هذا الاثر مناديل التنظيف المرفقه مع الكريم لكنها ما تكفي وعباره عن 4 مناديل بس والشرائح تكون 20 وانا اكتشفت اللي يزيل الاثر الشمعي هي المسحه الطبيه اللي في اخر الصوره نوعين لكن نفس الشي تقريباً وممكن استخدمها لتنظيف الرقبه لكن لبشرة الوجه ما عدت استخدمها لانها حسست وجهي مره وحده ومن بعدها صارت محظوره على بشرة وجهي.
- اسكينول بالليمون الاخضر والبابايا الخضره مع القطن للحفاظ على بياض منطقة تحت الذراعين امسحها قبل وبعد الشاور.
يتبع يا حلوين...
سوائل استحمام / مقشر جسم :
- سكراب المشمش لتقشير الجسم استخدم هذا النوع ممتاز وما يهيج بشرتي مثل سكراب ستيفز.
- شاور جل ديتول بالنعناع او لايف بوي للعناية بالبشره استخدمهم للنظافه الاكيده خاصه في الصيف.
- سائل استحمام دوف اشراقة حريرية استخدمه بعدهم واحس يرطب بشرتي ويخلي ملمسها حريييييييييير وريحته فخمه وجذاااااااابه ومميزه والله لو احصل منه عطر انا اول وحده اشتريه.
- سائل استحمام لوكس بالاملاح المعدنيه المنعشه والاعشاب البحريه وانا جربت الابيض والاخضر من قبل لكن هذا افضل واحد جربته وهو ومناسب للصبح لان ريحته تنعش وطبعاً استخدمه بعد شاور جل ديتول او لايف بوي.
صابون الجسم اللي اداوم على استعماله :
- صابونة نيفيا بزيت اللوز الغني رغوتها فظيييييعه وتنعم بشرتي بفضل زيت اللوز.
- صابونة دوف بالخيار والشاي الاخضر يمكن صارلي 10 مرات استخدمها ولا ازهق منها لان ريحتها الروووووووووعه وتترك البشره رطبه وناعمه.
- صابونة دوف بالخوخ وعشبة الزنجبيل حلوه وريحتها قويه وايد.
- صابونة لوكس بكريمة البندق ثاني مره استخدمها ريحتها تجنننن واحسن من كريمة الفراوله او الخوخ.
- صابونة لايف بوي بالاعشاب احسن نوع من انواعها لان ريحتها هاديه مو قويه مثل الباقي.
- صابونة ديتول للبشره الحساسه مرتاحه عليها من زمان.
- صابونة المسك من شركة الدليمي والله العظيم ان ريحتها مسك مركككككككز ونظااااااااافه وتمسك في الجسم ساعات طويله وحتى في التواليت (تكرمون) تلزق فيه ريحتها واستخدمت قبلها من نفس الشركه صابونة بالورد الطائفي والعود وكلهم ريحتهم ثابته لكن هذي اكثر وحده اعجبتني واروع وحده فيهم.
- صابون بيبي جونسون امووووووووت عليه واللي في الصوره من اليمين بالزهور المنعشه ريحتها نظافه واللافندر ريحتها هاديه وتساعد على الاسترخاء وبزيت اللوز تعجبني ريحتها وايد تذكرني بذكريات حلوه وبالعسل ريحتها تجننننن ومع استعمالي المتكرر لصابون جونسون احس بشرة جسمي ناعمه الحمد لله.
مزيل العرق / البودره / سبراي الجسم :
- ريكسونا البنفسجي للبشره الحساسه والوردي بالبودره وكلهم ريحتهم هااااااااااديه وممتازين ضد التعرق.
- ليدي سبيد ستيك غني عن التعريف احبه واحب ريحته الحلوه ومن سنين استخدمه.
- بودرة انشــانتر البنفسجيه ريحتها هاديه والخضره ريحتها مميزه وقويه.
- بودرة جونسون ما قبل النوم ريحتها رووووووووووووعه وطفوليه.
- سبراي الجسم من فكتوريا سيكرت الوردي اسمه My desire ريحته جريب فروت وياسمين ومانجو وفانيلا ومسك والاصفر ريحته ليمون منعشششششش والاحمر من شركة ما اذكر اسمها بريحة الكرز حلو وريحته ثابته عالجسم والملابس.
- سبراي pucelle بريحة الورد ورغم انه رخيص بــ 4 ريالات بس والله ريحته رووووووعه وثابته عالجسم اكثر من سبراي فكتوريا سيكرت.
كريمات / لوشنات :
- لوشن فازلين للعنايه الليليه ممتاز ويطري اليدين وايد وريحته خفيفه لافندر وفيتامينات
وانا احطه جنبي عالكوميدينو عشان ما انسى احطه قبل النوم.
- لوشن فكتوريا سيكرت اسمه garden ريحته تجنننننن عالصبح واحب احطه على منطقة الصدر
وفوقه بودرة والله ما احتاج اي عطر مو قوة الريحة.
- لوشن جرجنز بزبدة الشيا مناسب اكثر شي في الشتا وريحته ريحة كيك.
- لوشن بيبي جونسون الوردي خيااااااااااااااااااااااااال واموت على ريحته الطفوليه وغالبا احطه الصبح
ينعشني ويفتح نفسي على الدوام>>>خاصه لو كنت مغصوبه على دوام الصيفي.
- زيت جونسون باللوز والصويا روعه للمناطق الجافه في الجسم.
- كريم الجمال من دوف ريحته رووووووووعه كانها ورد على بودره.
- كريم جونسون ترطيب 24 ساعه ممتاز من ناحية الترطيب وريحته مثل ريحة كريم جونسون بزبدة الشيا.
- كريم نيفيا لليدين سريع الامتصاص ويعطي طراوه لليدين يحافظ على لونها عكس فازلين الوردي.
- معقم هاي جين بالليمون لليدين ما اتخلى عنه برا البيت.
العناية بالمنطقة الحساسة :
- لازالة شعر المنطقه استخدم هذا النوع من امواس الحلاقه النسائيه ما اذكر اسمه لكنه فعلا روعه وسلس الاستخدام ومريح والحمد لله ولا مره سبب لي جرح او حساسيه .
- البخاخ الاخضر هو ديتول الشخصي المخفف ارش المنطقه اكثر من مره في اليوم والحمد لله ما احس باي ضرر منه واحس بنظافه وانتعاش وتعقيم.
- بودرة بيبي جونسون استخدمها بعد محارم التجفيف.
- غسول كيرفري استخدمه كل يومين لان ما ناسبني استخدامه كل يوم.
- مناديل بيبي جونسون ريحتها طفوليه ومنعشه استخدمها واحتاجها برا البيت.
- مناديل كيرفري اليوميه ما نتخلى عنها طبها في كل وقت واحس بنظافه وراحه وانتعاش باستخدامها سواء العاديه او المنعشه.
- كريم بيبي جونسون روعه لترطيب المنطقه وبين الفخذين وهو سريع الامتصاص بس احط طبقه خفيفه منه ويحسسني بنعومه وكاني حاطه بودره.
العنايه بالقدمين :
- في البدايه انا مستحييييييييييل اترك اظافر رجولي طويله او حتى متوسطه مثل بعض البنات الله يهديهم والله ما يدرون ان منظر اظافر الرجلين الطويله مقزز ومنفر حتى لو كانت نظيفه احس قرف لما اشوفها طويله ولازم اقرضها كل اسبوع لان تركها طويله يجمع الجراثيم والبكتيريا فيها بسهوله.
- الحجر الوردي ابرد من خلاله الكعبين وبعدين انقعها بماي ساخن اضيف له ديتول الاخضر عشان يعقمها لمدة ربع ساعه وافرك بالفرشاة من تحت ومن فوق وبين الاصابع.
- انقعها بماي جديد يكون دافي او عادي واضيف سائل هاي جين المعقم بريحة الزهور الزرقاء هو اصلاً للجسم واليدين لكني احب استخدمه لرجولي وريحته قويييييه وافرك مره ثانيه بالفرشاه لحد ما اشوف رغوة الصابون تغطي كل الحوض.
- والخطوه الثالثه انقعها بماي بارد مع زيت الصويا اللي لون علبته ابيض وكان حق امي ماخذته من لندن لكن ما عجبها وانا خذته وعجبني وايد ويرطب بشكل فظيييييييييع لدرجة يخلي الكعب يدهن من كثر الترطيب.
- والخطوه الاخيره اجفف رجولي بمنشفه قطنيه جافه واتركها ترتاح وتتنفس 5 دقايق بعدها ابتدي ارطبها بفازلين بالاعشاب او كريم فازلين بالخيار والصبار المنعش.
وللامانه هذي العنايه اطبقها كل اسبوع فقط... اما يوميا اكتفي بمسحها بمناديل ديتول المعقمه خاصه لو رجعت من برا وتجفيفها عدل بعد الوضوء وترطيبها قبل النوم والحمد لله احس بنظافتها وانتعاشها وصارلي فتره نسيت فيها خشونة الكعبين وجفاف الرجلين.
واخيراً.... اتمنى يكون برنامج عنايتي البسيط حاز على رضاكم واستفدتوا منه
وانا اعتذر مره ثانيه على رداءة التصوير وسامحوني عالقصور حبيبات قلبي..
(فــي امـــان الله) :26: