عونكن يا بنات

السلام عليكم ورحمة الله وبركاته



شحالكن يا بنات....



ملجتي عقب اسبوعين ان شاء الله.. :27:



صبروا خلوني اخبركم بالسالفة من الاول..


طال عمركن انا من بوظبي .. وخطيبي من الشارقة .. واقترحت عليه نسوي العرس في الشارقة لان ناسه واهله وربعه اكثر مني بوايد .. يعني العرس هناك بيكون احلى وعلى اصوله.

ولان انا ربعي واهلي هني قليلين .. قلنا نسوي لهم حفلة صغيرونة في بوظبي يوم الملجة .. لان بعضهم يمكن ما يقدر يحضر العرس في الشارقة.


والحمدلله لقيت صالة مناسبة تكفينا ........ طبعا بعد طلعة الروح لان كل الأماكن محجوزة حق راس السنة :(



المهم..

ابا اسوي حفلة حلوة .. بس ما ابا شي مبالغ فيه .... لان الملجة مب مثل العرس مثل ما تعرفون..

وسؤالي..

شو المفروض اسوي في الحفلة؟؟

يعني انا ادري ان الفستان ما بيكون لونه ابيض طبعاً .. لكن هل لازم يكون فيه موديل وحركات؟؟ .. انا سويت فستان وردي بسيط جداً ما فيه اي موديل لان القطعة نفسها فيها حركة ولمعة .. وطبعا سويته واسع .. فهل هذا مناسب؟؟


و شو عن السوالف الثانية؟؟

يعني مثلاً .. هل لازم اتحنا؟ .. هل لازم امسك مسكة ورد؟ .. هل لازم خطيبي يدخل الصالة نفس العرس؟

والمكياج؟ :( ..... انا بطبعي ما احب المبالغة في المكياج .. والكل حولي يقولون سوي مكياج عروسة .. بس رسمة العين الكبيرة اللي تطلع وايد برا حد العين مب حلوة علي واحس بعمري جنية فيها لان ويهي طويل.

فهل لو رسمت عيني بشكل ابسط بيكون مناسب لي كوني عروس؟؟ والا لازم الحركات اللي يقولون لي عنها مع اني ادري انها ما بتطلع حلوة علي لاني جربتها فعلا وكرهت عمري.

طبعا هذا غير الألوان :( .. كلهم يبوني احط الوان شدو وروج غامقة .. مع اني ما احبها ومب حلوة علي اصلاً .. خاصة الشدو لانه يخلي عيني غايرة لداخل .. وانا افضل الالوان الفاتحة لانها احلى علي.




بصراحة كلهن التموا حولي وكل واحدة قامت تقول شي: لازم تصممين الفستان .. لازم تسوين مكياج عروس صدق .. لازم تتحنين .. لازم الورد .. لازم .. لازم .. لازم :44:

وانا صراحة مب عارفة .. يعني في اشياء احسها ممكن تصير .. وفي اشياء احسها مبالغ فيها حق الملجة .. وفي اشياء احسها مب حلوة على شكلي.


فهل اسوي اللي اباه مثل ما يريحني والا اسمع كلامهن؟؟





يا ليت ما تبخلن علي بالراي.