عيالكم أمانه

عيالكم أمانه
السلام عليكم ورحمة الله وبركاته
عندي موضوع مهم جدا جدا
وهذا الموضوع ما طرحته الا لاني خضت تجربه ومن هالتجربة ما ود احد من عيالي يمر فيه..
النقطة المهمة اللي اريد اوصلها انه البيئة اللي يعيش فيها الاطفال تأثر عليهم كثير كثير
ولهذا لازم الام والاب ينتبهوا ان اي مشاحنات تصير بينهم يكونوا بعيد عن اطفالهم بحيث اما يتناقشوا او يتشاجروا في مكان مغلق حتى ما يحسسوا اطفالهم انه فيه شي يصير بين الاب والام .
ولو لا قدر الله وصار لابد الانفصال ؛ افضل ومن وجهة نظري يوضحوا لاولادهم انه هالقرار من كان الا لاسباب معينه انتوا مالكم اي دخل فيها وحاولوا انكم تحسنوا صورة الاخر امام اطفالكم لا تغرسوا الحقد والكراهيه ان كان للاب او للام
الطفل يمر في مرحلة تأسيس واذا كان اساس البناء ضغيف راح تكون البناية ضعيفه ومهدده ..
راح اخبركم قصتي ومعاناتي من وانا صغيره ولوين وصلت ؛
انا البنت الكبيره فالاسرة وكنت جدا اخاف من ابوي لانه كان جدا جدا قاسي علينا في كل شي
كان يستخدم اسلوب التهديد والوعيد ما عمره ضربنا لكن اسلوبه فالتهديد فقط وهالشي غرس فينا الخوف منه ... تعرفوا ليش كان شخصيته كذا .. كان راتبه ضعيف جدا وكان مصاريف البيت زائد مصاريف بيت جدتي عليه وكان جدا مضغوط فالعمل والمصاريف فكان متنفسه الوحيد انه م يحب الاطفال وازعاجاتهم فيصرخ علينا ويهددنا انا ي ويلنا اذا عملنا ازعاج لكن بعد ما تحسن ظروفه وصار منصبه كبير تغيير ١٨٠ درجة فعرفت السبب ليه،

هذا الاب
نجي للام
أمي واسفه ي بنات اني راح اذكر امي بشكل ممكن الغير م يعجبه لكن والله ثم والله اني عانيت كثير والحمدلله على كل حال
امي كان مسيطر عليها الوسواس والشك بشكل كبير وكانت كثيره الكلام وما تخبي شي ابدا يعني لا تعطيها سر ابدا مستحيل تخبيه
هي اجتماعيه بشكل كبير وصريحه جدا
وفوق هذا شديده جدا
امي ومن انا صغيره غرست فيني معلومات خاطئة عن ابوي وعن اهل ابوي عطتني معلومات انهم صفر على الشمال
وانهم ناس مش زينه وشحنت راسي كلام تشيب الراس الين صرت اكرههم مع اني م اختلطت فيهم عشان اقول فعلا كلام امي صحيح كرهتهم سنين و سنين
امي وابوي كان كله مشاحنات وشجارات وصراخ ووعيد قدامنا
ومن يترك ابوي البيت تجي امي وتنفس غضبها علينا تضربنا تهددنا <<<< وهذا اكبر غلط تسويه الام من وجهة نظري لانه تبين لابنها او بنتها انهم هم السبب فالمشاكل اللي قاعدة تصير فالبيت ....
كبرنا ووصلنا لسن المراهقه والوضع مثل ما هو مشاحنات وشجارات وصراخ يوصل اصواتهم لجيراننا
المشكله ما في ناقش بهدوء في قاموسهم ابد
تقولوا لوين وصلنا
وصلنا انه كل فالبيت يصرخ صار بينا مسابقه من صوته اعلى انا اصرخ ابوي يصرخ امي تصرخ اخوي يصرخ اختي تصرخ... م عمرنا جلسنا جلسه محترمة وكلن تكلم اللي بداخله بهدوء
بامانه انا عمري م صرخت على ابوي لكن امي ايه صرخت عليها وهنا بقولكم ليه
ابوي صح عصبي جدا لكن لما يعاتبني او يصرخ علي كان يلوم نفسه بعدها ويجي بعدها يعتذر او انه يجلس ويتناقش معاي لكن نظرته غير وكلامه فيه حنيه ربما لانه وقتها صرت كبيره
لكن امي لا ابدا تصرخ علي وتضربني وتدعي علي بعدم التوفيق ومرات تقول لي انتي من وين بتدخلي الجنة وتهجرني ايام واسابيع مع انه المشكلة وربي ممكن تنحل باسهل واهدئ من كذا ولو رحت لها واعتذرت لها بترد علي م اريد اشوف وجهك ثاني ، متى بفتك من وجهك وبرتاح منك ،
وفوق هذا تحرجني كثير قدام حريم اهلي قدام بنات عمي وعمتي اللي اعمارهم نفس اعماري تحرجني تنزل من مستواي قدامهم تقارني بينهم وفوسط جمعتهم يعني تخليني ولا شي قدامهم بالله لما احد ينقص من قدرك قدام قريب ونفس العمر وصحبه كيف يكون شعورك فالمقابل اشوف امهاتهم وربي مثل الصديقات اللي تمدح بنتها او على الاقل ما تنتنقص من قدرها قدام احد ..
ثالث ثانوي قررت انه لازم اجيب نسبه مع انه كانوا ابوي وامي يقولون لي شفتي فلانه ولوين وصلت جامعه ووظيفه وكلن هاب عليها يبغى يتزوجها ووو وشفتي الفلانة الثانيه جالسه فالبيت لا دراسه ولا وظيفه وعانس فانتي عاد وشطارتك لوين تبغي توصلي
والله ي بنات انه حز بخاطري الكلام هذا تضايقت منه كثير ليش المقارنه كل شخص له قدارته وكلن ورزقه فالحياه
المهم كانت نيتي انه اجيب نسبه وادخل الجامعه مش عشان ابوي وامي والله م فكرت فيهم
كنت افكر انه اطلع من هالبيت لاني تعبت كثير
بيت مش هادئ ابدا
شديت حيلي كثير وكنت اقوم وقت السحر اصلي وابدا اذاكر
لين الله فرجها علي والحمد والشكر له جبت نسبه ودخلت الجامعه
وعشت حياه من انطوائيه الى الانفتاح
انطوائية لاني كنت م احتك كثير بالناس لانه امي حطت سمعتي ولا شي
الانفتاح انه تعرفت على صديقات وحياة جديده وعشت في سكن داخلي وخرجت من عالم الازعاج لفتره لكن الانفتاح هذا اثر علي بشكل سلبي جدا
صرت ابحث عن الاهتمام وعن الحب وللاسف بحثته في اماكن خطا لكن ولله الحمد انتبهت على نفسي مبكر وتركت هالشي وكلن فهم وش اقصد
وربي م اريد ابرر لنفسي ليه عملت كذا لكن الله العالم ممكن م حصلت هالاهتمام داخل البيت ولكن ممكن حصلت الاهتمام الخارجي موجود وبشكل مفرط جدا لكن له مقابل بالطبع والمقابل هذا ممكن يوديك لوراء الشمس
الحمدلله انه تراجعت بسرعه قبل لا اضيع وانغمس اكثر لكن رجعت لحياتي السابقه اذيه من امي كثير
شكت فيني كثير ، شكت في شرفي كثير ، شكت في صديقاتي ، كنت ايام كثيره م اصرف على نفسي كثير عشان ادخر لنفسي وكنت حيل حيل ضعيفه بسبب سوء التغذية لانه كنت اريد اكون مش اقل عن صديقاتي وفجاة امي شافت انه مخبيه مبلغ ورب الكون انه هذا المبلغ كنت انا ادخره لاشتري ملتزمات لنفسي اكثر من انه اهتم اشتري اكل لنفسي
شكت فيني ي بنات انه احد يصرف علي وبالحرام
وربي بكيت بكيت لين تقطعت روحي اقولها وربي واحلفلها بالمصحف انه هذا مصروفي اللي تعطوني اياه انا اتدخره الا مصره انه فلوس حرام وتروح توسوس لابوي وللاسف ابوي على كثر شجاره مع امي الا انه صدقها وقالي من وين لك هالفلوس قلتله والله ابوي فلوسي قالي اذا كذا سوالفك ما اريد تدرسي وتجلسي فالبيت بدل الفضايح
ي الله ليش
غلقت على نفسي بكيت لين تقطعت روحي اااه ي ناس لما احد يشك فيك وانتي مظلومة شعور جدا صعب
ولله الحمد قدرت اني اقنعهم انه هذا فلوسي بعد تعب وشلت من راسي انه افكر ادخر لنفسي او احرم نفسي عن الاكل لانه هالعايله فيها شك وسواس ،، رجعت لدراستي وامي تستفسر عني من وراي وعن اخلاقي هناك والحمد والشكر لربي مليون مره م سمعت عني بسوء
كانت تحبطني كثير على شكلي تقولي انتي قبيحه شوفي شكلك فالمرايه تاثرت من كلامهاكثير وحسيت بالنقص وشكيت همي لبنت عمي وقلتلها انا قبيحه وامي تمدحكن كثير لكن بنت عمي شجعتني وقالت والله انك بنت حلوه وانيقه ويلفتنا ذوقك واناقتك ارتحت من كلامها كثير وصرت م اثق براي امي...
وم زالت معاناتي مع امي مستمره وصرت في سن الزواج امي خططت مع ولد خالتي انه يتزوجني وتحمس الولد وقال اريدها جات تدور ابوي وتمدح فالولد وترفع من مقداره قال ابوي م عندي مانع اهم شي راي البنت جات تمدحلي الولد لكن انا رفضت لانه م عنده وظيفه وقامت القيامة عليها وصارت سبني وتلعني وتقولي انا م راضيه عليك لا دنيا ولا اخره حاولت افهمها انه هذا قسمة ونصيب عجزت ترضا ودعت علي وانهرت ليه ليه طيب الولد بلا وظيفه بلا شهاده وانا العكس طيب ليه مستعجله على زواجي ،، م كنت اعرف انه هي خططت معاه واني هي عرضتني له ،،، وفنهايه يأست مني وجات خالتي تعاتبها ليه تاملي الولد بالبنت وترفضوه وصارت مشكله بين خالتي وامي وتكلمت خالتي عني بسوء وقالت بنت فلانه شايفه نفسها المهم تضايقت كثير ف تلك الفترة وتعبت نفسيتي بسبب هالسالفه طيب ليه هي تخطط وتعمل اشياء هاذي من وراي ليه
انتهت السالفه هاذي وتطلع لي سالفه ثانيه
بالصدفة ولد خالي شافني لما كنت بيت جدتي
وطلب من امه وخالي انهم يخطبوني له وخالي كلم امي بالاول عني لاني كنت ففتره دراسه هل عادي يتقدموا ولا لا ،، وطبعا امي ماتت من الفرحة ،، بس هالمرة م فتحت السالفه لابوي مباشرا فتحت السالفه لي وكالعادة جلست تمدح ولد اخوها هذا قلت لها انا افكر بالدراسه حاليا م افكر اتزوج
تضايقت من ردي وقالت ليه ترفضي اللي بتقدموا من اهلي قلت لها اهلك ونعم فيهم لكن انا م اريد ارتبط وانا على دراسه ولا هي سالفة غصب !! قالت انتي فبالك احد معين تبغي تتزوجيه او احد ضاحك عليك بالحب والغرام تضايقت كثير من ردها
قلت لها لا اطمني مش راعية هالسوالف لكن ابغى اركز على دراستي باقي سنتين تقريبا واخلص
المهم هي قالت لخالي انتظروا سنتين ليما تخلص من الدراسة ...
وصح نسيت اخبركم في فترة عشت مع جدتي وبيتها ملازق بيت ابوي ،، عشت معها لاني تعبت من مصايقات امي وجلست مع جدتي وعمي فتره بسيطه
وبيت جدتي يتجمعوا فيها اعمامي وابوي واجلس معاهم والله انهم يوسعوا الصدر متئالفين متحابين سوالف وضحك وفزعات والله ابوي يصير انسان ثاني وارتاح لجمعتهم وسوالفهم وكذا مع انه امي كانت تقولي كلام يشيب الراس وانا صغيره تقريبا كان عمري ١٠ سنين هذاك الوقت كانت تالف قصص عن اعمامي وربي انهم غير غير ولما سالتها ليه تقولي انه عمي فلان كذا وكذا قالت سمعت من الناس والناس م تكذب
ي الله ي الله حقدت عليهم من كلامها لما كنت صغيره وربي انهم غير اخلاق وطيبه وراعين فزعات
المهم اكثر فتره عانيت فيها من امي بعد انتهاء دراستي
والحمد والفضل لله بسرعة توظفت ومرتب ممتاز جدا الكل بارك وفرح لفرحتي
لكن م سلمت من مشاكل امي
كل مره تطلعلي بسالفه ، مره قالت لي لازم ترجعي فضل ابوك عليك ، لازم تتسلفي له ، لما فتحت الموضوع مع الوالد قلت له ابوي تبغاني اخذ لك سلف من البنك لك قال لا حشى ما ابغاك تقربي من البنوك والربا ومش محتاج ، استغربت من كلام الوالده شو الهدف من طلبها.
المهم ما زال الضغط من الوالده علي وصارت المشاكل فالبيت م تهدا ابدا وفتحتلي موضوع ولد خالي اللي ينتظرني قلت لها بستخير وبرد عليك م عجبها ردي وتضايقت وقالت هالولد كل البنات يتمنوه وانتي تقولي بستخير وانا املتهم فيك سنين وهذا ردك وجلست تضغط علي قلت لها بستخير رب العباد ممكن نصيبه وحده ثانيه ،،
استخرت ي بنات وحلمت رؤيا واضحه وضوح الشمس انه هالولد مش نصيبي وتصلت فيني فالدوام تنتظر ردي قلتلها من ارجع البيت قالت لا احين تخبريني قلتلها امي استخرت وشفت رؤيا والولد مش من نصيبي قالت ومن قالك رؤياك صادقه انتي كل احلامك احلام شياطين وانا شفت محاضره فاليوتيوب لشيخ يقول انه الاحلام كلها وساويس شياطين وشيطان يبغى يفرق وما يبغى يجمع وتصارخ وتدعي علي وقالت اصلن ربك مش راضي عليك وتكلمت كثير وهزأتني كثير،،، بنات انهرت فالدوام وبكيت
لا مستحيل هاذي امي مستحيل مستحيل تقول انه احلامي شياطين!! وربي مش راضي علي،،!!
لا مش صاحيه ابدا،، !!
حسيت بغصه عالقه فيني ،، نفسيتي مهزوزه ،،، اعصابي تالفه ،،، م ابغى ارجع البيت ،،، زن وصراخ ورنين صوتها فاذني ما امر بيوم بسلام ابدا ،،، وبعدها تحاول تضغط علي وفتحت الموضوع لابوي تاملت ممكن ابوي يساعدها لكن ابوي مثل م خبرتكم سابقا بعد م تحسنت اوضاعه صار انسان ثاني متفهم كثير بس م زال عصبي وينفعل بسرعه مثل الشرار لكن معي صار اقل بكثير ..
فتح الموضوع معي وهي واقفه وراه وعيونها شرار علي
قلت له ابوي انا استخرت وم ارتحت خلاص الا اذا تغصبوني عليه فهذا كلام ثاني لكن فنهايه ممكن يصير انفصال لانه احد الاطراف مش راضي لهزواجه
وصاحت امي تسب فيني وتلعن وتهزأني وتقولي مين انتي عشان ترفضيه مين انتي وصاح ابوي على امي صراخ وصياح وصارت مشكله بين ابوي وامي بسببي ...
امي كرهتني من هالسالفه وقالت انت تبغين تعملي مشاكل بيني وبين ابوك وانت ابليس وانتي وانتي
طنشت للموضوع لانه ولله الحمد ابوي كان واقف جنبي
مرت الايام وامي تسمع من قرايبها فلانه انخطبت فلانه تزوجت وفلانه فلانه ،،، وتيجي تكسر باب غرفتي وتفتحلي محاضره طويله عريضه وتلعني وتسبني كثير وتتهمني بشرفي بطريقه غير مباشره وانا ساكته فالبدايه وبعدها انفجر وصرخ عليها ،،، م اقدر امسك اعصابي خلاص صرت مع الخيل ي شقرا م صرت اعدها مثل امي ،، الام على حسب م اشوف وعلى حسب م تعلمت وسمعت الام غير غير م اعتقد الامهات كلهم كذا لا مستحيل ...
تقدملي ولد عمتي وجاء ابوي وفتح الموضوع لي وقال فلانه خذي من وقتك لا تتعجلي فالقرار وجلس يمدح فالولد فوق ساعه
كذلك جاء عمي مسكني فالمجلس وجلس يمدح فالولد ،،، طبعا الولد م عليه كلام بس انا رفضته لانه كبير جدا وكان يبغى وحده من العايله بس هي رفضت ومنها عاف الزواج سنين واحين صحى وفكر يلحق على عمره وشاف نص عمره راح وتقدملي
المهم امي سمعت السالفه وقالت لي مثل م رفضتي المتقدمين من اهلي ترفضي ولد عمتك
وطلعت عليه كلام كثير الله يستر عليه ضاقت بي الحال وحسيت حولي نيران
مسكني ابوي وقالي هاه وعيونه فيها فرح شكله الرجال متامل اني اوافق
قلتله عطني وقت افكر اصراحه خفت من نظراته
وامي من جهة تقولي انسان عليه كلام والناس تتكلم عنه بالسوء
المهم جيت لابوي وقلت له ابوي لا تزعل علي وما ابغى مشاكل او تفرقه لكن ابوي انا مش مرتاحه ومش موافقه وسامحني سكت ابوي م تكلم يوم يومين وعدت الامور وامي كانها انتصرت على ابوي مدري كيف بس كان في عيونها انتصار وفرح
المهم صار زواج احد الاقارب وحضروا معازيم كثير وانا كنت لابسه وكاشخه وجوني خطاب كثير بعد هالمناسبه
ولله الحمد وافقت على شخص وكان خارج عن العايله مش من قرايبنا
جاء ابوي وفتحلي موضوع هالشخص وكان ردي اسالوا عن الولد زين وانا بستخير
استخرت وارتحت كثير وفتحلي ابوي الموضوع مره ٢ وقلتله انا استخرت وارتحت لكن برضوا اسالوا عن الولد كثير اذا ارتحتوا له فانا موافقه واذا لا فانا لا طبعا
سالوا عن الولد وما سمعوا عنه غير كل طيب وتقدموا وصارت الامور ي بنات سبحان الله بسرعه بسرعه والله لو اتذكر كيف مدري سبحان الله الخطوبه المهر الملكة الزواج كانت الامور تمشي بسرعه تزوجت والحمدلله
طبعا امي فهذيك الفترة طارت من الفرحة مدري ليه وف زفافي مع انه اول بناتها الا انها م بكت لما زفوني كثر م بكت جدتي علي ،،. يالله طول بعمرها واشفيها واحفظها لي
الان اعيش فبيت غير عن بيت ابوي
بيت هادي جدا جدا
الناس تتناقش وتتفاهم بدون صياح
زوجي يناقشني وما يتخذ قرار ابدا الا بمشورتي
كثير يمدحني
كثير يعزز من قيمتي
حطينا ايدنا ببعض
وتعاونا على المسؤليات وتقاسمناه مع بعض
عشت حياه غير
زوجي انسان مثقف وهادي ولو صارت مشكله بينا يمسكني وياخذني لغرفتي ويفتح الموضوع بكل هدوء ويفهم مني وافهم منه ي ناس حياه غير غير
اهله كثير يحترموا الاب والام اللي هم عمي وعمتي شخصياتهم غير
م عمري سمعت عمي يصرخ على عمتي ولا عمري سمعت عمتي تصرخ على عمي
فيه سلبيات موجوده فهالعايله لكن انا ركزت على هدوءهم وتفاهمهم لاني نحرمت من هالشي
بتقولون كيف صارت امك
امي بداية زواجي حاولت تتدخل بحياتي
كان تسالني عن كل صغيره وكبيره فزوجي
فيه اشياء كنت اخبرها واشياء لا
م علمت غيرت انه هالمواضيع هاذي تنتشر على لسان قرايبي عن اسرار بيتي م عادت اسرار صارت على لسان قرايب امي
قلت ف نفسي بعدك م تعلمتي ي فلانه
حاولت اقلل جلساتي معها يعني لو بغيت اجلس معاها اكون مخططه انه اروح ازور جدتي واعمامي وبعدها اجلس معاها ساعه ساعتين وارجع بيت زوجي م اكثر الجلسه لاني م ابغى تعرف عني كثير
كانت تقول لي كانه غشونا هالعايله اللي زوجناك واقولها ليه شفيهم ،، قالت م دري م عاجبيني ونحن ونحن وتجلس تمدح نفسها واهلها كانها تستنقص من قدرهم لكن م اهتميت لكلامها ابدا ..
اجتمعت يوم من الايام مع قرايبي وبنات اعمامي وعماتي وامي كانت معانا
تقوم امي وتقول باعلى صوتها كانها توصل معلومة لقرايبي والبنات انه انا مقصره " فلانه اللي هي انا من تزوجت وهي اذا جات تزورني جلست ساعه ساعتين وتختفي مدري هاذي زياره ولا وشو " ردت وحده من قرايبي " البنت طارت من لسانك اجل من يقدر يتحملك " حسيت امي تضايقت من قريبتي كثير وانا بامانه تعاطفت معاها مدري ليه لكن الناس اللي حولي حاسين بالوضع اللي مريت فيه ..
الان كل م افكر الماضي واشوف بناتي اقول في نفسي
ي الله لا تحطني مثل صورة امي ، ي الله اعيني على تربية بناتي ، ي الله اصلحني واصلح زوجي ،
ما اتمني يعيشوا في بيت مزعج
كنت اخاف اخذهم معاي لبيت ابوي اخاف يتاثروا من ازعاجهم ويتعقدوا مثل ك تعقدت
وهنا انتهت قصتي
عزيزاتي
كل بيت وله اسرار وكل بيت م يخلو من المشاكل لكن التفاهم والحب والاحتواء والاهتمام اغرسوه فابناءكم
حاولوا تبعدوهم عن مشاكلكم الزوجيه
لو انه فيه دورات تحافظ على الجوانب الاسريه ورعاية الطفل فالمنتدى هذا فانا اول المشركين لانه صار فيني رهاب انه يعيشوا بناتي مثل م عشت مع انه العصبيه م زالت موجوده معي لكن زوجي دايما ينبهني انه اهدى شوي ماله داعي العصبيه الزايده ..
اهم حاجه؛:
* لا تقللوا من قدر اولادكم ابدا عززوا الثقه فنفسهم
* لا تفرغي غضبك من زوجك لابناءك لانه الطفل يعتقد انه المشاكل بسببه وانه ممكن هو سبب الطلاق اللي صار بينكم
* واذا احد منكم حابه تضيف معلومة كيف نهتم بمشاعر وسلوكيات ابناءنا فتتفضل ومنكم نستفيد ...


وعذرا على اطالة موضوعي