السلام عليكم ورحمة الله وبركاته
كيفكم حبوبات مرتادات مجلسنا عساكم بخير يارب
بنات في خاطري كلام واكيد سبق وكتب زي كلامي كثييييييير بس من باب النصح مافي حرج اني اعيد وازيد لعل الله يصحي فيه ضماير او ينبه به عقول غافله.......
الموضوع يخص عيالنا وبناتنا جيل المستقبل كبودنا اللي تمشي على الارض......
انتم شايفين وملاحظين وش اللي حاصل لعيالنا من انفتاح ماله اول ولا تالي شي يحز بالخاطر شي يبكي القلب والله العظيم ابذكر مواقف شفتها او حصلت قدامي واعلق عليها
**************************************
بنتي بالمتوسطه وعندها زميلتها بالفصل تقول هالبنت اول ماتطلع من المدرسه تعالي شوفي وش تصلح بعباتها ترفعها وتفتح ازرار مريولها مع الصدر وانواع الغنج بالمشيه طبعا هي تروح مشي لبيتها وانا بنتي تروح مع ابوها تقول يمه كل يوم وهي لازقتلي ابيك توصليني للبيت ؟بنتي تسألها طيب اهلك مايهاوشون انك جايه مع غريب؟ترد عليها اهلي مايسألون عني عادي امشي ولا اركب مع احد مايدرون ولا يدققون؟؟؟؟؟؟؟؟؟
لااله الا الله هذي بنت في عمر الزهور وطعم جاهز للي مايخاف الله هذي مراهقه وبنتي تقول للعلم امها موجوده وعندها بعد اخوان اكبر منها !!!ياناس وين امها ليش مهمله بنتها ليش مطيحه هيبتها بهالشكل قدام بنتها والبنت بتنجر للغلط من ورى اهلها لاحول ولا قوة الا بالله هذي بس نموذج وغيرها الااااااف.....
السالفه الثانيه لولد شباب بعمر 18 اواكثر شوي يقول زوجي جاي ينتظر اخته تطلع من المدرسه ويشيلها ويقول بكل برود اعصاب لابس شوووووورت لفوق الركبه وينتظر بالشارع قدام البنات اللي رايحه واللي جايه لاحول ولاقوة الا بالله وين الحيا ياناس يعني اذا الواحد ببيته ويستحي يلبس كذا شلون قدام امة الله واغلبهم بعد بنات ولا استحى ولاخجل مين ورى فتور هالخجل مين ورى تربيته ان هاللبس عادي ترى ومافيه شي وش هالثقافه اللي معشعشه بدماغه ياترى اهله ماشافوه يوم طلع يجيب اخته؟؟؟؟؟
مناظر اشوفها دايم بالمستشفيات وبالذات المستشفيات الجامعيه قسما بالله تقولون اني رايحه حفله اخر مره مترقده بولدي بمستشفى الملك فهد وجا الدكتور وبعد ماكشف على ولدي استأذني يجيب طالباته يشرح لهم على حالة ولدي ياالله قسم بالله بردت يديني من اللي شفته ايش اقول وايش اخلي مكياج كامل-عدسات-طبعا مافيه غطى على الوجه الا من رحم ربي -ولا العطور قسم بالله تخنق خنق من ريحتها كلها ماركات وقويه وكلن تقول الزين عندي وهات ياضحك مع دكتورهم وعادي فاااااااااااالين ابوها؟؟؟الله لاجابه من طب بيخلي الوحده تجمع ذنوب بهالشكل يعني ماينفع اجمع علم وحشمه؟بالله هذولي وين امهاتهم واباؤهم مومعقول كلهم ايتام ولا كيف يعني يتفاخرون اهلهم فيهم بهالشكل مافيه ام وحده فيهم ناظرت ببنتها وقالت على وين مصيرك يابنتي وانتي كذا ؟؟مافيه اب قال وين الرجوله ومخافة الله وبنتي كذا ؟ياربي كيف بس بيلاقون الله وش حججهم لها التساهل في تربية عيالهم
اللي طرحتها نماذج ناس شفتهم ولا الاسواق والشاليهات والمنتزهات ولا الزواجات حدث ولا حرج حتى الاطفال مارحموهم من هالشخلعه صار اللبس الساتر مو على الموضه وراعيته قرويه ماتعرف تلبس عيالها
طيب نسأل انفسنا ليه هم صاروا كذا وش فرقهم عن غيرهم من المحافظين والمتربين واهل الدين
اكيد كله ينصب بالبيت اولا واخير
يعني ياام واخص الام لانها الاقرب لعيالها ولانها هي اللي تزرع بعيالها اسس التربيه الصحيحه من الصغر
وش القنوات اللي عيالك منطقين عليها 24ساعه وش اللي يصلح يشوفونه ووش اللي لا
اصحابهم مين بالمدرسه هل فيه حوار بينك وبين عيالك هل يجون يقولون زميلي ولا زميلتي الفلانيه فيها وفيها وانتي تتصححين لهم وتقولين هذا غلط وهذا لا
لبسهم مين يختاره هل يهمك الشكل وتناسيتي المضمون ولا تحرصين على الاثنين
ياترى عيالك المراهقين كيف اهتمامك فيهم بالبيت ومراقبتهم مثلا عادي يسافر مع اخوياه وهو توه بالمتوسطه وش حدود السهر المسموح فيها خارج البيت الاغاني وماادراك مالاغاني عادي يسمعون قدامك عادي يفرطون في صلواتهم ويتساهلون فيها.........
اخر شي وهو يخص اهل الشغالات بصراحه اكثر مين اقرب لعيالك الشغاله ولا انتي؟؟؟؟؟
*********************************
لازم نعرف ان التربيه مسؤوووووووليه حطوا تحتها الف خط عيالي هذولي بصمتي اذا انا احب نفسي مره فعيالي احبهم الف مره ولا عندي استعداد في يوم اني اشوف بنتي ولا ولدي ممسوك من هيئه ولا داخل مركز شرطه لاقدر الله ...... وماابيهم فشيله لي وسط الناس ابي ارفع راسي فيهم وماابيلهم حياه مشتته طلاق في المستقبل لاقدر الله ولا عدم احساس بالمسؤليه مافيه اهل اعتقد ماراح يوجعهم قلبهم لاصار ولدهم ولا بنتهم كذا
الله يصلح عيالي وعيال المسلمين ويحميهم ويكفيهم شر من به شر .....
واوصي نفسي واوصيكم لااازم ننتبه ونعي حجم كلمة ام موبس حمل وولاده والدعوه سايبه لاوالف لا الا تعب وسهر وتخطيط لحياتهم واهم شي نضع اللـــــــــــــــــــــه وخشيته نصــــــــــــب اعيننا
والسلام عليكم ورحمة الله وبركاته.......
فعلا من اسباب اهمال البنت وتخبطها هم الاهل
واسال الله العافية والسلآلآمة