عيال اخوووي ياربي

هذا يابنات اخوي وهو حرمته متطلقين من فترة اربع سنين
وكل واحد راح بحال سبيله وبقي هالتؤام المساكين بينهم
امهم تزوجت واخوي لسا باقي يخطب
عمرهم ١٠ سنين الحين
امهم تاركتهم ل ابوهم ماتاخذهم الا كل اسبوعين مرة زيارة
واخوي ساكن جنبنا بشقته وهو شغال ب ارامكو والحين سافر بعثة ومخليهم عندنا واخوي تأقلم على هذا الوضع عجبه وصار يعطيني ٥٠٠ ريال مصروفهم كل شهر وراميهم لنا وقالها بصريح العبارة انه ينام مرتاح وهو متطمن على عياله
التؤام ذولي
واحد منهم مريض ب فقر الدم على طول تعبان ونايم ولازم كل اسبوع ابوي او احد منا يوديه المستشفى ياخذ ابر دم وانواع الادوية
والثاني مثل الجني امسكه من مكان يطلع من الثاني مجنني مسؤوليتهم كبيرة علي انا واختي لي بثاني ثانوي بس ما احد يهتم فيهم امي مالها حولهم هم وعيال اخوي لي توفت حرمته كأننا فاتحين دور رعاية
اخواني يرمون عيالهم ويمشون قلت بموضوع سابق اني كنت ارعى ابن اخوي وبنته بعد ماتوفت امهم وبعدين ابوهم خذهم معاه بس ذولي التؤام تمو معانا مافي مكان يروحون فيه
امهم ما ادري وش تحس فيه حسبي الله فيها تقولو تبغى تنتقم من اخوي فيهم
وابوهم مشغول ب عمله واذا رجع تلاقونه ملتفت للضحك وطلعات مع اصحابه هم شايلين نفسهم ونظيفين ومرتبين بس يبغالهم رعاية تامة واهتمام ومتابعة الاول عشان نقص الحديد يكون كسلان وماله نفس يسوي شي وهذا لي مصبرني عليه
الثاني هذا حركي جدا بقوة رايح جاي ماادري الا فتح الباب وطلع وابوه مأمني عليهم يروح بقالة بروحه واحنا ساكنين بمكان مقطوع كله بيوت قدام بعضها
لي قريبة منا هي محطة بعد ٥ كيلو ويروح لها مشي واغلب الوقت تلاقينه راجع منتهي من التعب او احد مرجعه ومرة ابوه شافه وهو راجع صدفة ورجع لي هزئني يقولي وينك عن ابني وحرام عليكي تتركينه كذا وهو مسكين يمكن ينخطف او احد يتحرش فيه وهذا امانةحرام عليكي ايش وانت وامه وينك عنهم جني والله اركض وراه رايحة جاي انا وامي واختي بس عشان يهجد ويقعد بمكانه على السوني ولا نفلح فيه واخوي الثاني ساكن معانا بجناح خاص عجبهم الوضع هو وحرمته صارو يرمون ابنهم وبنتهم لنا ويروحون يعيشون قصة حبهم ومطاعم وفلة ووناسة وانا من وين القاها من عيال الاول ولا الثاني
اقسم بالله وانا اكتب الحين احس نفسي متلخبطة تماما ما ادري وش لي ابغاه احس نفسي بفوضى عارمة كارهة نفسي حتى نوم الظهر بعد ما ارجع من دوامي ما اعرف انام راسي احسه ينفجر بهالازعاج هذا انا واختي ولازم نتحملهم وين يروحون بعد ابوهم
مسافر وامهم لاهية بزيجتها
اول لما كان اخوي مرتاح بدوامه كان ينامون معاه بشقته ونرتاح شوي
الحين لااا معاناا
جننونا ومواقف كثيرة تخلي ضغطي يرتفع
عاد مرة اختفو مني تماما واحد مدري وين راح والثاني مختفي من الصباح وانا ادور عليهم يجيني ابن عمه ابو ٥ سنين
يقولي لالو مات خلاص الله يرحمه ويروح يأشرلي عليه ورحت اركض وانا قلبي طايح الاقيه منسدح على بطنه بالارض بس كذا وتؤامه واقف بعيد عنه يحوس بمصيبة وانا اركض وراهم وصراخي يملي المكان هو اسم الدلع حقه لالو 😅😅😅 وتؤأمه اسمه مرقي
بنت عمهم هي لي طلعت عليهم هذي الاسماء من يوم ما وعت عليهم وهي تناديهم واحد لالو والثاني مرقي لحد ما الكل يناديهم بهالاسم وابوهم يعصب عشانهم
انا مدري عن حالتهم النفسية لاني شعرت بزهق مو منهم اعوذ بالله بس من هالحالة هذي والازعاج بالبيت
حتى تفرقة بينهم ما اقدر افرق ياربي والله متطابقين بكل شي وابوي ضغطه يرتفع بسبب الثاني على قرادته على طول يلاحقه ويمسكه تسطير هواش صراخ ولازم يمسكه ويقولنا هذا ابن كلب مو بشر هذا
احبهم بمحبتي ل ابوهم بس حراام وضعهم كذا لا ام تسأل ولا اب يلتفت لهم حاسة البيت فوضى كله مو عارفة كيف اتصرف
مو حاسة نفسي عازبة لا والله مو حاسة نفسي الا ام عيال كل اخواتي واخواني متزوجين وعايشين حياتهم فلة ووناسة وطلعات الا انا قاعدة بهالبيت ارعى واربي هالتؤام ذولي وعيال اخوي الثاني وبعض الاحيان عيال اخوي الكبير الايتام اذا جاوني زيارة
كلهم يجوني اساعدهم بالواجبات واحلها لهم واذاكرلهم واعشيهم وافطرهم
والمشكلة ما اقدر اردهم ولا اقدر اوريهم اني مزعوجة احب اخوااني كثيير وما احب اشوفهم الا مبسوطيين لانهم هم سندي بعد ابوي
اووف يارب صبرني واكتب اجري بتربيتهم