عيال جاراتي جننوني الحقووووووووووني

السلام عليكم ورحمه الله وبركاته



بنات انا جديده وقديمه بالمنتدى :confused-



انا قديمه بالمتابعه احب هالمنتدى واعرفكم واتابعكم :laughing:



بس جديده بالمشاركه مااحب اكتب احب اقرأ واروح بس الزمن حدني عالكتابه :booo:



عاد تحملوني وهذرتي شوي

انا ياطويلات الاعمار متزوجه وعندي اربعه الله يحفظهم وساكنه بمدينه بعيده عن اهلي واهل زوجي بحكم عمله شقتي اربع غرف وصاله ومطبخ وحمامين وانتو بكرامه- طبعا مجلس ومقلط وغرفتي وغرفه عيالي والصاله كبيره وجلستنا فيها ومخزن صغير - طيب وين المشكله اصبرو علي عشان تفهمون وضعي

الله رزقني بجارات عسولات نمون على بعض ونسير على بعض بأي وقت ومابينا كلفه ابد - طيب وين المشكله :confused-



المشكله عيال جاراتي :booo:


الله يصلحهم اعصار وجاراتي كثير واقل وحده عندها ثلاثه اذا جوني نجلس بالصاله والصغار بالمقلط حاطه لهم تي في وعندي بالصاله دولاب كبير ضاف اغراض كثيره ادري انه مو موضه بس مريحني لان مخزني صغير يادوبك شايل المفارش والشناط والاغراض الكبيرره اما هالدولاب فشايل العفش الصغير الافياش واالكتب والشواحن وكل شئ وعندي بالصاله كوايتي حاطتها بزاويه بما ان طلعاتنا كثيره فاكوي كل شوي والله عيالي ماعمرهم جوها لاني معودتهم مايمدو يدهم على شئ
المشكله عيال جاراتي يدمرون بيتي اذا جوني يتمشون بالاكل يفتحون الدولاب ويحوسونه يدخلون ورا الككنب ويدفونه مره ملاقيف بنتي تنجن منهم تلاحقهم تمنعهم وكل شوي عندي ببالمطبخ ياماما الحقي فلان سوا وعلاننه سوت عاد امهاتهم انواع الي تمنع بس مايفيد لان التعود بالبيت مو عند الناس والي تطنش وتسولف ولاكنهم يقربولها امس جتني وحده عندها ثلاثه دقت الباب فتحت قالت جبيلي عصير يبرد على قلبي الله يأخذ فلان ويريحنا منه -فلان الي هو زوجها -:laughing: انا دخلتها وجبت العصير الحرمه جتني بروبها وتشكي وعيالها تقولون مجانين وانفكو الي يتشبلق بالكوايه والي انطلق على الدولاب والي طالع بالموز من المطبخ :booo:
بعد ماراحت قعدت ادور في شقتي انا احب جاراتي واحب عيالهم وانا اجتماعيه بطبعي وصبوره بس مااحب الوصخ ولا الخراب ولا جرأءه الاطفال على بيوت الناس عندي اربعه ياربي لك الحمد معودتهم على النظام والنظافه وش ذنبي اتحمل عيالهم ولقافتهم - المهم قررت انو صالتي والقسم الداخلي يتقفل بالمفتاح وتصير جلستنا بالمجلس والصغار بالمقلط والداخلي مقفول والمفتاح بصدري :laughing:
المجلس مايجونا رجال كثير زوجي ضيوفه يستقيلهم دايم بالاستراحه وهو كنب كامل يعني قسم الرجال مافيه شئ كثير يخربونه اناقلت لزوجي قال بيتك وانتي حره فيه شاورت اختي قالت لا قفلي مجلسك وحافظي عليه طيب مين بيجيني فيه انا ابغى ارتاح والله نفسيتي تعبت كل كم يوم تقريبا تجيني وحده ونفس الحكايه البارح جتني جارتي وارتاحت وانا ارتفع ضغطي ليه - بس خايفه لو سويت كذا يزعلون مني اش بيقولو قفلت عنا وساعات اقول بكيفهم بيتي وانا حره تعبت وانا افكر فقلت اشاوركم لاتبخلون على برأي نخيتكم مانخيت رخوم :laughing:

اعذروني طولت بس حاولت اشرح وضعي - بانتظار شوركم سلام الله عليكم