عيب خلقي !! ومين بيرضى فيني !

السلام عليكم
قبل فترة طرحت لي موضوع تقريباً مشابه له
ولكن كررت طرحه هنا بالتفصيل لأني تعبببببت كثير وتعبت نفسيتي والله
أنا بنت عندي عيب خلقي
وهالعيب الخلقي واضح ومن كنت صغيرة وللحين والله العالم بالكلام اللي يجيني بس عشان هالعيب اللي فيني
وحتى أهلي يتفشلون اذا كان فيه عزيمه عند ناس ثانين
يتفشلون من نظرات الناس والكلام بسببي
ذبحتني نظرات الناس بسبب هالعيب اللي فيني
من كنت صغيرة للحين والله
هذا غير إنهم يخافون ويتقرفون وكأني وحش أو مسخ
وليتكم والله يا خواتي اللي في عالم حواء تحسون بالحسرة والجرح من كلامهم ونظراتهم
واتذكر الحين معلمة كانت تدرسني في المتوسطة جات قربت مني وقدام البنات قالت لي أنتي ليش طالع فيك كذا !!
ومعلمتين كانوا بس يتتبعوني بس عشان يتأملون في هذا العيب اللي فيني
حتى أهلي نظراتهم أحياناً تجرحني خاصة إذا التفت عليهم غفلة وفجأة وهم كانوا يدققون ويناظرون فيني وبهالعيب الخلقي اللي فيني
حتى المناسبات والعزايم والزواجات والله الذي لا اله الا هو مقاطعتها من زماااااااااان
لأن محد يتكلم معاي ولا أحد يعطيني وجه كأنهم خايفين مني
والله العظيم ماتعرفون وش كثر انجرحححت من كنت صغيرة للحين
والحين تخرجت من الكلية دبلوم
وفي الآونةالأخيرة صرت أفكر بالزواج كثير حالي من حال البنات في عمري
وخاصة إن صديقاتي كلهم اللي تزوجت واللي مخطوبة وأتا الوحيدة اللي ماتزوجت ولا قد حتى انخطبت
حتى اللي تتزوج بينهم ما احضر زواجها لأني في داخي فيني صيحة وبكاااااااااااء على حالي
مافي أحد بيرضى فيني أبداً
ومين الرجل اللي بيرضى فيني ؟ نظرة النساء وصديقاتي كانت مؤلمة وجارحة وكانوا يبتعدون
فكيف برجل والرجل يحب تكون زوجته كاملة وما الكامل الا الله
ويخاف الرجل إنه يتزوج مثلي يخاف على ذريته يجيهم مثلي بالوراثة
تعبااااانة والله
بتقولون الحياة مو موقفة على زوج وأولاد
بس هذي غريزة في كل بنت
وكل بنت تحلم بهالشي وأنا أمنيتي بس زوج صالح وأبي ذرية صالحة
أبي أكون مثل صديقاتي وابي احسب الأيام لتجهيز زواجي وأبي اعزم البنات وكذا
قولولي وش اسوي ؟!!
دعواتكم لي بالزوج الصالح والله ماشكيت إلا لكم أنتم بعد الله
ولا تجرحوني بالردود جعلكم بالجنة
دعواتكم ونصائحكم تكفيني