السلام عليكم ورحمة الله وبركاته ....
بمناسبة عيد الفطر المبارك اعاده الله علينا وعليكم بالخير والبركة واليٌمن .... جبت لكم عيدية بسيطة ( معليش متأخرة العيدية ) بس اعتبروها عيدية لعيد الفطر والاضحى مع بعض ... خخخخخخخخ
عيديتي عبارة عن ورشة لشنطة بنتي اللي عملتها للعيد ضمن اكسسوارات العيد ....
اكسسوارات فستان بنتي تبع العيد
نحتاج نوعين من الخيوط .... سميك ورفيع ... او ممكن اذا حبيتوا تعملوا رفيع بس ... اهم شي النوع الرفيع عشان لما نعمل الكشكشة تطلع انسيابية وناعمة مو واقفة ....
نبدأ نعمل قاعدة الشنطة بالخيط السميك او زي ما تحبي ....
حسب الذوق وحسب قد ايش تبغوا يكون حجم الشنطة ... انا عملت 30 سلسلة ... وزيادة عليهم 3 سلاسل بمثابة اول عمود ... ثم نشتغل في رابع سلسلة 6 اعمدة بلفة ... بعدين نشتغل على كل سلسلة عمود الى ان نوصل لآخر سلسلة نشتغل عليها 7 اعمدة بلفة ....
الحين نقلب الشغل رأساً على عقب عشان نشتغل على الجهة الثانية من السلاسل ... نشتغل عمود على كل سلسلة من الجهة الثانية ( طبعاً اول وآخر غرزة ما حنشتغل عليها ) ... ونختم بمنزلقة ...
هذي هي قاعدة الشنطة ... حبيتها تكون صغيرة ... الحين نبدأ في جدران الشنطة .. ركزوا في هذي الخطوة ...
خرجي الابرة من السلسلة المتكونة على الابرة ودخليها من خلف آخر عمود عملناه ثم ندخلها في السلسلة ... والصورة توضح اكثر ...
نسحب هذي السلسلة من داخل العمود ....
ثم نعمل سلسلة ... وكمان سلسلتين .. حتكون بمثابة اول عمود ...
الحين نقلب الشغل بحيث ان الشغل حيكون في الجهة الخلفية للقاعدة ...
الشغل حيكون ندخل الابرة و نخرجها من الغرزة اللي بعدها زي الصورة .. ان شاء الله تكون الفكرة واضحة ... شوفو السهم الاحمر .. بنفس الطريقة ندخل الابرة من غرزة ونخرجها من الغرزة اللي بعدها ونشتغل عمود عادي ....
اذا حسيتوا ان الطريقة صعبة عليكم بعد ما تعملوا القاعدة اطلعوا بالجوانب بشكل عادي جداً يعني تشتغلوا على كل عمود عمود بدون زيادة ولا نقصان ..... ما حيتأثر الشغل ... بس من كثر الفلاحة عملت الحركة هذي ...
نعمل السطر الثاني بطريقة عمود خلفي ....
وهذي صورة مقربة .. لاحظوا كيف نقطة التقاء القاعدة مع الجوانب كأنها عمود خلفي ...
نشتغل 6 اسطر بطريقة العمود الخلفي ... واذا حبيتي تكون الشنطة اكبر ممكن تزودي اصطر كمان ...
بكده نكون انهينا جسم الشنطة ... وانتوا تقدروا تزودوا في عدد الاسطر اذا حبيتوا تكون الشنطة اكبر ... لكن ما تقل عن هذا العدد لانه ما اتوقع تطلع حلوة ...
شوفي معايا .... الخطوط الحمراء الصغيرة هذي الاسطر اللي حنشتغل عليها ... وحيكون الشغل في سطر وسطر لا ... يعني من تحت حنعمل 3 اسطر ومن فوق سطرين ... المنطقة اللي بالازرق حيكون مكان الشريطة ...
نقلب الشنطة فوق تحت .... يعني قاعدتها فوق وفتحتها تحت ونشبك الخيط الرفيع في آخر سطر عملناه ... يعني آخر سطر من تحت جهة الفتحة ... ونرتفع بثلاث سلاسل بمثابة اول عمود .... ونشتغل عمودين في نفس الغرزة .... بعدين نشتغل على كل غرزة 3 اعمدة .. وممكن نزود نخليهم 4 اعمدة او بعد كم غرزة نزود ... حسب ما تبغي الكشكشة كيف تكون .... انا عملت حوالي 4 غرز في كل غرزة 3 اعمدة بعدين عمود عملت عليه 4 اعمدة ورجعت اشتغلت في كل غرزة 3 اعمدة وبعد كم وحدة عملت 4 اعمدة وزي كده ... يعني مافي نظام معين ....
تختمي الشغل وتقطعي الخيط ... بعدين سيبي سطر واشبكي الخيط في السطر اللي قبله ... وحيكون الشغل على الجزء الامامي من الغرزة ... زي كده يعني ...
نشبك الخيط ونطلع بثلاث سلاسل كأول عمود ونكرر نفس الحركة الاولى ... في كل غرزة 3 اعمدة او 4 او مزيج بينهم حسب الرغبة ... ونختم بمنزلقة ونقطع الخيط ...
نرجع نقلب الشغل ... يعني نخلي القاعدة تحت والفتحة فوق .... ونشبك الخيط في اول سطر بعد القاعدة ... ونطلع بثلاث سلاسل ونكرر نفس الشي اعمدة ...
ونقطع الخيط .... نترك السطر اللي فوقه ونشبك الخيط في السطر اللي فوقه ونكرر الحركة ... ونقطع الخيط ونترك سطر ونشبك الخيط في السطر اللي قبله ونشتغل اعمدة ... كده حيكون عندنا 3 اسطر من الكشكشة ... طبعاً اذا زودتوا اسطر في جسم الشنطة ساعتها حتكون اسطر الكشكشة اكثر ... بس راعوا ان الجزء العلوي اسطر الكشكشة فيه اقل من الجزء السفلي ...
انا عملت 3 اسطر تحت وسطرين فوق .... اذا خلصنا نغير اللون اذا حبينا ونعمل سطر ثاني اعمدة او نصف اعمدة او حشو زي ما تحبو على اسطر الكشكشة .. وحيكون الشغل غرزة على كل غرزة ... يعني بدون زيادة ولا نقصان ...
بعدين نجيب شريط عريض شوية ونخيطه او نلصقه على الجزء الفاضي من الشنطة ونعمل فيونكة او وردة او اي تزيين حسب الرغبة ... وطبعاً لا تنسوا اليد برضه كل وحدة وذوقها وما شاء الله عليكم كلكم ذويقات ولمساتكم مميزة .. واترك لكم حرية الابداع ...
وهذي النهاية السعيدة ... خخخخخخخ
في امان الله .....