أختي هوني عليك ...

قد تكون نقاط التنافر كثيرة .. ولكن معقول أنه ليس هناك نقاط التقاء ؟؟

كونه تزوجك اعجابا بجسدك .. لا يمنع أنه يمكن أن يعجب بالكثير من الصفات الأخرى التي سيكتشفها لاحقا ..

أعلم أن ما قاله ( له حق أن يخاف منك ) عبارة مؤلمة تماما ... فهي طعن في انوثتك .. ولكن اعتقد أن وراء هذه الجملة اشارات يجب أن تقفي عندها ..

لم يعتبرك زوجك متوحشة أو مخيفة ؟
هل ظهرت امامه و أنت غاضبة ؟ عصبية ؟ ترفعين صوتك ؟ عنيدة ؟ حادة النقاش ؟ عالية الصوت أثناء الضحك ؟
هل حاولت أن تظهري أمامه الأنثى بداخلك ؟
هل رأى منك رومنسية أو نعومة ؟
انقيادا له ؟
اهتماما بشكلك و تزينك ؟
هدايا من دون مناسبة ؟
بطاقات تحمل عبارات الود و الاحترام ؟
ليال رومنسية في أجواء هادئة ؟
اغراءك له بشعرك و ملابسك أو حتى عطرك ؟
لا أريد أن أقول أنك مقصرة ..
وأنا هنا لا اقلل من شأنك أختي بل أريد فقط أن أوجه نظرك لأشياء (( قد )) تكوني نسيتيها ..
و يجب أن تتذكري أختي دوما أن النتيجة لا تظهر بين يوم او ليلة ..
والتغيير لا يجب أن يكون ملحوظا بحيث يشعر بالتغير المفاجئ فيسخر منك ..


ابدئي بالتغيير أختي .. فأنت لازلت في بداية حياتك الزوجية .. والأمر لا زال في طور التحكم .

انا ما فاهمه ولا كلمه شو المشكله

عزيزتي ياسمينة..
أنا معك في كل كلمة..
صراحة يمكن فيا دفاشة شوي ويمكن مرة أو مرتين بعصب.. بس والله العالم اني بحاول بكل ما عندي من قوة انو ما يصير عندي اتهيار عصبي بالعكس بمسك في حالي.. ولكن بتكشيرة..
يعني لو وحدة غيري ولهلوبة كان بتعمل العكس بتمسك حالها بتسير تضحك وتتغنوج...الخ
أنا ما بعرف هالشي واللله ما بعرف الفي قلبي على لساني ما عندي لؤم والله يعلم بحالي بس عندي اني بكتم في صدري ممكن أنسى وممكن لا...
هاي هي حالتي...
غنوجة ما بعرف بزبط في حالي ما بلاقي مدح ولا شكر... آخر مرة صبغت شعري ما عجبو اللون كان بدو أصفر وأنا صراحة لوني أصفر.. وأصفر على أصفر سرت لمونة...
هدايا في بداية الزواج يالله شو أنا مغرمة بشي اسمو هدايا هو لا....
من ايام الخطوبة كان يجيب العطر ما بعرف من وين جابو ولا شو هالعطر أو شو هاي الريحة.. أو يجيب طقم أقلام أقول في نفسي طب لشو هالطقم...
بعكسي إذا لانقيتو محتاج شي أو بدو شي كنت أشتريه وأهديلو اياه....
لا وأعمل في حركات يعني مرة حطيت الهدية في السيارة...
والمفروض... انو امبارح يوم ميلادو وأول مرة يمر علينا من غير ما أ جيب هدية طب ليش أجيبلو هدية اذا هو ما تذكرني في يوم كتب الكتاب أو في يوم العرس حتى لو بوردة...
حاولت معاه..
وحقيقة اكتشفتها هاي اشياء تافهة من عندي لشو الهدايا ما الها داعي...
ودمتي على خير..

أهلين أختي عيون فلسطينية .. تصدقي إني تقريبا تزوجت في نفس الفترة اللي تزوجت فيها ... وعمر ابني مثل عمر بنتك الله يخليها لك ... والصراحة ما عندي أي نصيحة أقدمها لك .. فخبرتي بسيطة ... بس حبيت أقولك ربي يسعدك ويوفقك في حياتك .. ويحبب زوجك فيك ..
وأكثري الدعاء ... وقيام الليل فسهام الليل لا تخطئ ...

أختك رحيق الزهور ....

اخيتي الغالية عيون فلسطينية..
حالي متل حالي كتير من الاخوات ..والله لما دخلت الموضوع حسبت انه بدك نصيحة لواحدة من قرايبك او صحبتك بس انصدمت لما تفاجات انك انتي صاحبة المشكلة ..سدقيني مابجاملك بس مواضيعك كلها بتدل على وعي منك وثقافة واسلوب رائع ومتميز الي بيخلينا نثق فيكي انه هالفترة مؤقته وسحابة صيف وكل شي يرجع متل ماكان ...المهم انتي اهدي وربنا يقدم لك الي فيه الخير ..

شوفي يااختي اول 5 سنين هاي كلها خناقات وكلمة اني صرت اكرهك ..مش قادرعلى العيشة معك ..كلها ممكن تسمعيها لكن بعد 5 سنوات بتكونوا تعودتوا على بعض ومشيت اموركم
اول شي ابعدي فكرة الطلاق عن تفكيرك منشان تقدري تاثري على زوجك منشان شغلتين :اول شي بنتك الصغيرة الموجودة بينكم ....والتانية وهي الاهم انكم بتفرحوا الشيطان وانتي عارفة كلهم وظيفتهم الوسوسة لكن افضلهم الي بيفسد بين المرة وزوجها ...فادعي ربنا يبعدكم عن هالقرار..

عفكرة اسلوبك ومحبتك بين الناس وبساطتك في التعامل هدا سبب من اول الاسباب الي بتاثر بالزوج بيصيروا الكل يشكروا في مرته وهو بيحاول يهز ثقتك بنفسك مو لانه بيكرهك بس بيخاف (يكبر راسك عليه )ومايقدؤ يحكي معك او يناقشك باي شي ...
قرات انك كنتي بتدرسي وانجبتي البنت...اذا كنتي خريجة جامعة فهدا السبب ورا المشكلة بينكم لانه يمكن زوجك شعر انك صرتي مثله بالشهادة ..واشتغلتي (يعني بتعملي معه راس براس ) وهدا اكيد صار فيه تقصير على البيت ..مسؤولياتك ..وقتك بالبيت صار موزع بينه وبين الشغل والبيت وبنتك ...يعني بطل الاهتمام له لحاله الي كان موجود في فترة الخطبةاو اول الزواج بظرف تغييرات الحياة الي مريتي فيها ........
ونصيحتي لك انه المشكلة حليها بايدك انتي ...(انتي موجودة معه بالبيت ولا عند اهلك)
طبعا اذا موجودة بالبيت (وهدا الاقضل )ارجعي له زي ماكنتي اول ماتزوجتي ..بالجسم الحلو باهتمامك فيه بالحركات الرومانسية الي ياما قراناها وتعلمناها منك ..

مابحكي لك روحي واعتذري بس حاولي انك تبداي بينك وبين نفسك صفحة جديدة في تعاملك معه
يعني الشغل لعله خير انه اجت الاستقالة بوقتها منشان تخف المسؤوليات عليكي ...

اهتمي فيه وباكله والمقولة معروفة الطريق الي قلب الرجل معدته..
اعملي له اكتر اكلة بيحبها وبعدها صنف حلو جديد وزينيها بطريقة حلوة وجديدة ...
حتى لو متدايقة منه اطلعوا لمكان حلو او مطعم له ذكريات بينكم وبينكم معكم وانتو قاعدين بالمطعم لاعبي بنتك وقولي لها هون بابا حكى لي بحبك ...يعني كانك بتحكي مع البنت بيني انك بتحبيه ومابتتغيري معه ...
ماتستعجلي منشان تعرفيشو السبب الي مغيرته من ناحييتك يمكن عنده ظروف بالشغل وضغوط ماثرة عليه بتخليه يطلع الي مدايقة بالبيت ...
معلش اصبري عليه هالفترة وتذكري انه زوجك وابو بنتك
وكمان لاتخلي تجارب ابوكي وامك تاثر عليكي او تحسسيه بهالشي ..لانه راح يستخدمها ضدك وممكن يقول عنك انك معقدة ..
ودايما خلي تعاملك معه الوسط يعني لاتدللي كتير ولاتجنبي كتير ....لانه هو تعود على الدلال الكتير ولما حس انك انشغلتي عنه حاول يجذبك له بالمشاكل ...وسدقيني ماحدا بيتزوج واحدة منشان معجب بجسمها او بصدرها او بعيونها لانه كل شي مع الزمن بيتغير يمكن في صفات بتجذب لكن مو على اساسها بيتزوج ....يعني شو الفايدة لو ماخد واحدة منشان نعومة ايديها ومابتطبخ له ولابتهتم فيه منشان ايديها تضل ناعمة ساعتها حيكره هالايدين صح ولا لا؟؟؟؟
سدقيني زوجك غار من انشغالك عنه بعد ماتعود تكوني له وبس يعني بيتدلع منشان تسيبي الشغل وتتفرغي اكتر ...


وبالنسبة لشغلة المناسبات والهدايا احنا بنهتم اكتر من الرجال هيك ربنا خالقنا ...احنا بنحب نتذكر اي شي بنحبه بيومه ..لكن الرجال عفويين يعني ممكن يدخل عليكي بهدية (وهاي قليل )بمجرد انه كان بمحل بالصدفة وعجبته هاي الشغلة او مر بياع الورد قدامه بالصدفة اشترى وردة لكن احنا بنرتب ونعمل وشوع وحركات منشان نرضيهم ...
سدقيني متله متل اي رجال ...واكيد الكلام الي قاله قاله بلحظة غضب وزعل ...انتي حاولي معه بس تهدوا شوي ابعتي له رسالة فيها عتاب وحب بنفس الوقت ..وانك ماحتقدري تعيشي بدونه ...وبعدها بتتفاهموا وبتتصارحوا بالشغلات الي مدايقاكم من بعض ..

بتعرفي صار لي متزوجة خمس سنين وصبغت شعري 4 مرات وقصيته 3 مرات ........والله احيانا مايلاحظ الفرق الكل بالبيت يلاحظ الا هو ..طيب مين احلى هيك ولا المرة الي راحت ووالله مابيميز
واذا سمع الكل بيشكر في اللون بقول لي فاتح كتير ..غامق ...مستحيل يمدح لي شي.........خلاص انا عرفت هيك طبعه ومازعلت ..المهم انا نحاول نرضيهم بالشي الي يريحنا ومانكون مقصرين معهم واذا مابين فيهم بيبين عند رب العامين

اهم شي يااختي انك تدعي ربنا يوفق بينكم ويبعد عنكم عيون الحاقدين والحاسدين وحصني نفسك وبيتك وزوجك واقراي سورة البقرة او تشغليها بالبيت خلي الشياطين تطلع من البيت ويبعد وسوستهم عنكم .....
وماتضلك تحكي كتير عن زوجك انه كويس وبيحبك لانه مابيحسد المال الا اصحابه ........والله يوفقكم ويهدي سركم ويصلح بينكم ...