عيشوا حياتكم واكرفوا واخدموا ازواجكم وعيالكم..قبل تفقدونها

السلام عليكم ورحمه الله

كيفكم خواتي ..

انا كنت من المتواجدات بكثره في هالقسم وقسم التجارب والحلول المنزليه..

لكن الحين لا..

كنت اتعب كثير في بيتي واغير فيه دايم مو اشتري لا ابدل مواضع الاثاث واغير وانسق واذا صابني الفتور دخلت هالقسم وقسم التجارب واشوف مشاركات البنات واتشجع كنت اقول تعبت اف قرف الشغل والبيت ..

ألحين لا..
الحين ادخل واشوف تنظيمكم وتنسيقكم وصور بيوتكم واذكر ربي وادعي ربي يهنيكم
واقرا شكاوي الحريم من تنظيف الحمام والمواعين والغسيل

ودي اقول احمدوا ربكم انتو في بيوتكم مستقرين مثل ماكنت انا مستقره ..
انا فقدت بيتي لاننا نقلنا منه ومن يوم نقلنا من بيتنا وجيرانا واحنا متلعوزين..مافيه استقرار نفسي ..

اشتاق لكرف بيتي اول ..اتمنى اني دايم اكرف واغسل وانظف بس اكون في بيتي..

انا مع اهل زوجي الحين مرتاحه معهم مررره فيه شغاله ومبسوطه بس بيت الوحده غيركل ماتذكرت ذيك الايام ..بكيت..

اتذكر يوم يجي زوجي من الدوام ونتغدى واغسل مواعين الغدا واجهز للعصريه واتذكر عيال جاراتي دايم مع عيالي واتذكر يوم زوجي يطلع المغرب ويرجع وانا مجهزه العشاء قبل النوم اجهز ملابسه ..انظف مطبخي امسح المشمع ارتب ..

كنت اتبطر على النعمه واقول طفشت روتين ..يازينه من روتين ..يازينها من عيشه ..:06:

الحين ماعندي شي اكتبه هنا او استشيركم فيه لان البيت اللي املكه فقدته ..العيال اللي ابي اربيهم تركتهم واهملتهم وصرت بس عايشه على ذكرى ذيك الايام ماقدرت انساها..ولا انسى لحظه من لحظتها..
اكتشفت اني كنت اسعد انسانه بالدنيا ..

لكن الواحد مايعرف قيمه الشي الا اذا راح للاسف..:06:


عيشو حياتكم ونظفو واكرفو واخدموا ازواجكم وعيالكم وتمتعوا وربي انها احلى ايامكم ..ولاتقولون طفش وروتين..

جعلكم ماتفقدونها