للرومانسيات المصدومات..
هلا والله يابعدي انتم..
من هي الرومانسيه المصدومه.؟؟
هي اللي تحب الكلمة الحلوه ولسانها حلو وتحلم بزوج يراعي هالحلاوه كلها ويبادلها كلام الحب والغزل ولكنها تتفاجأ بأنها مرت مع هالرجل الغريب بمرحلتين..
مرحلة الملكه: وهنا تحقق شيء من أحلامها وتحس إن كل أحلامها صارت واقع..
ومرحلة الزواج: هنا يبدأ تتلاشى الكلمه الحلوه وتنصهرخخخخ وواقعها يرجع حلم مثل ماكان..
وبعض الزوجات الشاطرات يقدرون يهيئون بعض الأجواء لاسترجاع هذي الرومانسيه..!!
بالنسبة لي زوجي لما يشوفني أحكي عن مشاعري أو أحاسيسي اتجاهه او اتجاه أي شي يناظرني كأني كائن غريب..!!
ودايم عذره :أنا رجل..!!!
ماني خكري..
ياقلبي يازوجي عمري ما سمعت إن صاحب الكلمة الحلوه يعاني من خلل في رجولته..!!
لما أراجع تفاصيل حياته أعذره..!!
كانت حياته جافه..
وأمه وأبوه ماعندهم سوالف أبوي وأمي الله يخليهم..
من تقدير وحب
واهتمام ودلع وحنان..!!
= كانت أول نتايج صدمتي إني صرت دايم أسأله:
تحبني.؟!!
وكان يكره هالسؤال..!!
أحس اني بهالسؤال أستخرج خفايا قلبه..!!
بس مع الوقت صار يستنكر إذا ماسألته..!!
وصار يحاول يلين شوي معي ويبين لي مشاعره ويبين إنه غاصب نفسه..!!
= أكثر شي يكرهه زوجي إنه يميزني قدام الناس يخاف ينقال عليه زوجته ممشيته على كيفها..!!
تقبلت هالشي ..بس دايم أبين له إعجابي في الرجال اللي يظهرون تقديرهم لزوجاتهم..وأحسهم نادرين..!!
وصجيته بالقصص..!!
خصوصا لأن مجتمعي مليان نماذج من الرجال اللي يظهرون حبهم لزوجاتهم..!!
أقوله : ماشاء الله على عمي..تصدق لما قلطنا على العشاء..لقينا لحم معزول على جنب جايبه عمي لزوجته لأنها ماتاكل سمك..ماشاء الله عليه أهم ماعليه زوجته اللي شايلته على راسها مافكر في الناس اللي ماراح يفيدونه..!!
زوجي لما أحكي يسكت..!!
لكن يفكر في كلامي..!!
ولقيت أثر كلامي لما جيت أحج وكانوا أخواته بيحجون معنا بدون رجالهم شلت هم..قلت راح يتجاهلني في الحج عشان يبين رجولته قدام أخواته..
ولكني تفاجأت إنه كان حريص علي أكثر منهم يمسك يدي في الزحمه ويركض وهم وراي يحاولون يلحقون علينا لدرجة إنهم يمسكون طرف عباتي يخافون يضيعون..!!
= جمعاته مع أهلي غيرته شوي..
زوجي أختي عكسه يبين حبه لأختي ماشاء الله..
وهو يستحي يذكر اسمي..
ومع كثرت جمعاته مع اخواني وزوج اختي تأثر بهم شوي..
صار مايستحي يذكر قصه يجي فيها طاري اسمي..
= كنت بعد تنظيفي للبيت أحط له كرت جاهز فيه إهداء للزوج باسم الزوجه جنب مخدته..
ماكان يلقي لها بال..
وإلا الآن إذا شافها ينسى مضمونها ويسأل عن سعرها ومن وين شريتها..
عادي تعودت..
آخر مره لمست تحسن بسييييييييييط..
قال حركات وش هالكرت.؟!! >> ياقلبي يا أنا صارت ذي من المصطلحات الرومانسيه من كثر ماهي قليله..!!
= سويت حفله بسيطه ولما مرت سنه أرسلت له رساله إنه تراك تأخرت بالحفله اللي عليك..جا دورك..
ما رد علي وجا وهو معه كم كيكه وورده حسيت من كلامه إنه متحسف بالفلوس عليها..
احس إني أغصبه يكون رومانسي..بس ولو العشم ولا القطيعه..!!
= كنت أقرا شريط الاهدائات اللي في المجد وجتني فكره وكتبت رساله وأرسلتها لشريط المجد:
أبارك لزوجتي الغاليه بالعيد والله يجعل أيامنا كلها أفراح زوجك:أبوفلان..
يعني أرسلتها باسم زوجي كأنه هو مهديها لي..
ثم رحت له أضحك وأقوله فلان : شكرا على إهدائك لي في شريط المجد..
طارت عيونه..بس أكيد حس إن مثل هالحركات تهمني وتفرحني وأحتاجها..
هذا اللي عندي يا الرومانسيات المصدومات الله يكفينا شر الصدمات..!!
يعني بإختصار:
لا لليأس نعم للحيل والتخطيط..!!
يالله عطونا من خططكم..!!
واللي يأست وش تسوي :06: