شلونكم يا بنااات
اول مرة بحياتي اسوي عيش"رز " صيادية ماتوقعته بهالشكل هذا وبالرووووعه هااذي .. احلى من المطعم مليووووون مرة ...
طبعا الطريقة كانت من اجتهادي ...
عيش صيادية مع سمك فيلية مشوي ...
اولا .. السمك ..
نحتاج الى سمك فيليه نتبله بـ " ملح -فلفل اسود- بهار مشكل - كمون - فنجان خل ابيض - كركم - فص ثوم - واعشاب مجففة خاصة بالسمك او استعملي اي اعشاب متوفره ..
نجيب صينية الفرن ونحط فيها قصدير وندهنها بزيت ونحط شرايح السمك ونسكرها بقصدير ونسوي فيه شقوق ...
نخليهاا تطبخ بالفرن الى ان تستوي ونشيل القصدير ونحمرها من الجهتين ...
ثانيا: عيش " رز " الصيادية ..
نحتاج بصله مقطعه لجوانح ونحمرها بزيت حتى نحصل على اللون البني الغامج .. ونضيف لها الماي اللي نحتاجه لكمية الرز " 4 اكواب " ..
ونخليه شوي حتى نحصل على اللون البني بالماي .. ونصفي الماي من البصل ..
نحضر جدر ونحط فيه زيت ونحمر فص ثوم وحبة طماطة مقطعه .. ونحط الرز " 2 كوب " ونحركه حتى تغلف كل حبات الرز بالزيت ..
نضيف لها بهارات " دراسين او قرفة مطحون - فلفل ابيض - ملح " .. ونحرك حتى تختلط البهارات ..
نصب الماي اللي حصلنا عليه من البصل .. ونتركها على النار الى ان يستوي الرز .. وبالعافية ...
اترككم مع الصور ...
لا تردون شوي حبايبي ...
عيش صيادية مع دجاج بدبس الرمان ..
اولا: الدجاج ..
نحتاج دجاجة مغسولة ومنظفة ومقسومة نصين ..
نجيب جدر ونحمس فيه بصل وثوم ونحط الدجاجة ونضيف لها " بهار مشكل - فلفل اسود - كركم - زنجبيل مطحون - ملح " ونحمسها حتى تتشبع بالبهارات ..
نضيف لها بهارات صحيحة " هيل - مسمار - اعواد دارسين - ورق غار " .. ونضيف لها الماي ونركها الى ان تستوي ...
بعد ما تستوي .. نحضر صينية الفرن ونبطنها بقصدير ونحط شرايح بطاط وقطع طماط ونحط الدجاجة ونصب عليها دبس الرمان .. تقريبا نص كوب ..
وندخلها الفرن حتى تتحمر من الجهتين ونحمر البطاط معاها ..
ثانيا: عيش الصيادية ..
نصفي مرقة الدجاج من البهارات ونحطها على جنب لاستعمالها بالرز ..
نجيب بصله مقطعه جوانح ونحمرها بزيت حتى نحصل على اللون البني ..
نضيف لها من مرقة الدجاج حتى نحصل على اللون البني ونصفي المرق من البصل ..
نجيب جدر ونحط فيه زيت ونحط الرز ونحركه حتى تتغلف حبات الرز بالزيت ونتبلها بـ " دارسين مطحون - فلفل ابيض " ..
نصب عليه مرقة الدجاج اللي صفينا منها البصل ونعدل الملح ونتركه حتى يستوي .. وبالعافية ...
اترككم مع الصور ...
هاا اشرايكم يا بنااات ...
الحمد لله الذي رزقنا من غير حول ولا قوة ...
لا تنسون عيالي من دعوتكم الحلووة ... ولكم بالمثل ...
انتهى موضوعي ...