اليوم حبيت اعمل الغدا وكان المقرر علينا كبسة لحم :icon20:..
لكن حبيت أغير شوي عن الكبسة المعتادة ولقيت طريقة حلوة وجربتها طلعت لذيذة فعلاً..
مااطول عليكم شوفوها واحكموا بأنفسكم..
المقادير :
2كيلو لحم بالعظم مقطع وسط.
6كاسات رز شعلان مغسولة ومنقوعة نص ساعة بموية دافية.
( اللحم والرز على حسب عددكم طبعاً بس هذي كمية تقريبية للي طبخته)
3بصلات كبار مقطعة شرائح (جوليان)
نص كوب زيت
ملعقة كبيرة كركم مطحون
ملعقة كبيرة كركم (أو لون طعام أصفر) منقوعة في كاسة مويه صغيرة لحد مايذوب.
ملعقة كبيرة زعفران منقوعة في كاسة مويه صغيرة لحد مايذوب.
(استخدمي كاسة الشاي لنقع الكركم والزعفران )
ملح
م ص بهارات مشكلة مطحونة.
بهارات صحيحة ( م ك فلفل أسود,م ك كمون,م ك كزبرة, 4أعواد قرفة, نص م هيل,نص م قرنفل ,ورقتين غار ,2 ليمون أسود)
تحمسي البهارات الصحيحة ماعدا الليمون الأسود على نار هادية -بدون زيت- لحد ماتفوح رائحتها الزكية وتطفي عنها (هذي أهم خطوة)
الطريقة:
تحطي نص كمية الزيت في القدر وعليه البهارات الصحيحة المحموسة ثم اللحم وتقلبيها مع بعض لحد مااللحم ياخذ نكهة البهارات (حوالي خمس دقايق) ثم تضيفي مويه مغليه وملح وتخليه لما ينضج..
بعد ماينضج تطلعيه وتصفي المرقة وترجعيها وتحطي فيها الرز لحد ماينضج ثلاث أرباع استواء..زيدي الملح للرز لأن اللحم ياخذ ملح المرقة..
للناس اللي مايضبط معها الرز لكل كاسة رز كاستين مرقة وبيطلع معك مضبوط...بس هنا قللي شوي المرقة لأننا مانبغى الرز يستوي بشكل كامل..
بعدين تجيبي قدر جديد تحطي فيه باقي الزيت و البصل وتشوحيه لحد مايذبل وتحطي عليه اللحم وم الكركم وم البهارات المطحونة وتقلبي شوي ثم تضيفي نص كمية الرز وتصبي عليها كاسة الزعفران المنقوع ثم باقي كمية الرز ثم كاسة الكركم المنقوع وتخليه على نار هادية ربع ساعة ثم تقلبيها بالصينية وتزينيها بالمكسرات وتقدميها ..
أنا زينتها بالصنوبر واللوز المقلي.
وقدمتها مع سلطة خضرا ومخلل ليمون..
خسارة ماصورت الخطوات لأنه ماكان على بالي أنزلها لكن لما طلع طعمها لذيذ قلت يستاهلون الحوائيات :heart:
هذي صورتها النهائية
الله يعطيك العافية