ماشاء الله لاقوة الا بالله
هذا ياحلوات غدانا ثاني ايام العيد .:icon28:بس مافضيت انزله الا اليوم
طبعا اول يوم كان غدانا مع الاهل كلهم وكان من برا
لكن ثاني يوم انا اللي طبخت و سويت مندي على ايراني بس طلع روووووووووووعه كأنه جاهز والله
وكان معاه:
سلطه خضرا +سلطه حاره
مخلل ليمون + مخلل طماطم
وهذا المندي الرائع ....حطيت معاه بطاطس لان اولادي يحبوه وزينته بالبصل المقلي
اول شي اسلقي اللحم بالطريقه المعتاده وبعدين صفيه من المرق واتركيه على جنب
حطي في قدر قطعة زبده كبيره وحطي معاها هيل وقرنفل وقرفه حبوب كامله وبعدين حطي عليهم الرز المنقوع والمصفى وقلبيه قلبتين وبعدين صبي عليه المرق المصفى والمغلي وحطي معاه الملح والجينوموتو وشوي فلفل ابيض واتركيه الين يغلي وبعدين وطي النار وغطيه الين يستوي تماما
ذوبي شوي زعفران في فنجان ماء كادي وصبيها على الرز بعد مايستوي وغطيه
افرمي بصل وابشري جزر وحطي فحمه على النار
حمري البصل مع زيت وزبده في قدر على نار متوسطه وحطي معاه الجزر المبشور وماجي وبهارات حسب الرغبه وملح ....زيدي عليه ملعقتين من السكر المحروق( الكراميل) اللي يجي مع الكريم كراميل او سويه بنفسك وحطيه مع الخلطه وقلبيه وبعدين حطي اللحم وقلبيهم مع بعض ووطي النار وغطي القدر واتركيهم الين يستوي اللحم ويتتبل بالخلطه مضبوط .....انا كمان زدت مع البصل بطاطس مقطعه كبير بس هي مو اساسيه
بعد ماتستوي خلطة اللحم نقلبها على قدر الرز ونكون مولعين فحمه .........نحط وسط الخلطه فنجان زيت ونرمي فيه الفحمه و نغطي القدر على طول وكمان نحط عليه مناشف وثقل عشان الدخان مايطلع لبرا ونخليه على نار هاااااااااديه ومن الافضل نرفع القدر على حديده......ويترك من نص ساعه الى ساعه الاربع
نرفع اللحم على جنب ونغرف الرز اول وبعدين نحط اللحم على الوجه ونزينه بالمكسرات والبصل المقلي وكلي الذ مندي ممكن تاكليه في حياتك وعليكم بالف عافيه مقدما
والحلى سويت ايسكريم بالفستق وايسكريم شوكولاته وصبيت عليهم شوكولاته سائله وقدمتهم مع كيكة شوكولاته
وهذا رابط الايسكريم
http://forum.hawaaworld.com/showthread.php?t=1351749
وهذا رابط الكيكه للغاليه هند
http://forum.hawaaworld.com/showthread.php?t=427632
وهذي سفرة الحريم وماكان عندي غير اخواتي وامي عشان كذا السفره كانت بسيطه ...لكن سفرة الرجال كانت معتبره ...بس ماقدرت اصورها للاسف:(
وبس خلاص ياحلوات .....وكل عام وانتم بالف خير >>صباح الليل خخخخخخ
ماشاء الله تبارك الله