اليوم جايبتلكم طريقة غرزة تريكو جديدة .... سهلة وبسيطة احنا بنسميها (عين البومة ) وبعتبرها نوع من أنواع الجدلات اللي بالتريكو .... بتمنى يكون شرحي واضح وسهل عليكن وتعجبكن الغرزة
هي صورة الغرزة
الشرح :
نبدأ 32 غرزة ونشتغل أول دور كله وجه ... واذا بتحبوا فوراً اشتغلوا الغرزة
الدور الاول: نشتغل 2 غرزة مقلوب .... بعدها نترك غرزيتن ونسحب أو نقلب الغرزة التالتة عليهم وهي الغرز على السنارة بدون ماننقلهم لسى ... وهي الصورة رح توضح أكتر
وهي الصورة بعد ماتركنا الغرزة من السنارة وهيك بيصير الشكل
بعدها بنشتغل أول غرزة من الغرزتين اللي صاروا مع بعض ... بنشتغلها وجه وبنعمل لفة لنعوض الغرزة اللي قلبناها عليهن .... واللفة بتكون بانه ناخد الخيط لقدام السنارة ونشتغل فوراً الغرزة التانية كمان وجه ... الصورة رح توضح اللفه
بعدها بنشتغل 2 مقلوب وبنكرر نفس الشي لنهاية الدور ... لازم يكون بنهاية الدور 2 غرزة مقلوب متل أول الدور
الدور التاني : 2 غرزة وجه .... 3 مقلوب ... وبنكرر لنهاية الدور 2 غرزة وجه ... 3 غرزة مقلوب
الدور التالت : 2 غرزة مقلوب ... 3 غرزة وجه ... وبنكرر لنهاية الدور 2 غرزة مقلوب .... 3 غرزة وجه
الدور الرابع : متل الدور التاني وبهيك بنكون خلصنا ... طبعاً وبنرجع بنكرر الأدوار بتمنى تكون سهلة وواضحة
بتمنى يكون الشرح واضح ... وانا حاضرة لأي سؤال ... وانطروني مع الغرزة الجاي ان شاء الله