شوفي حبيبتي ..
ترتيب الغرفة ماهو بالشي الصعب فقط تحتاجين لعمل جرد للغرفة باستمرار لأن تراكم الاشياء اللي ما لها داعي يسبب الفوضى مثلا000
مشكلة الملابس:سوي جرد متكامل على دولابك وكوني حازمة في اتخاذ قرارات بخصوص الملابس الزايدة(احتاجها او ما احتاجها)وجيبي كيس كبير جنبك وابدأي الاشياء اللي انتهت موضتها او مقاسها تغير او ما عادت تعجبك على طول وبدون اي تفكير في الكيس وتأكدي انك ما تخلين الا اللي متأكدة انك بتلبسينها ....وبعدين ودي الكيس لاقرب جمعية خيرية
وبعد كذا رتبي كل شي على حده 00اللانجري لحاله..البديهات لحالها..الشراريب لحالها...الخ وهكذا والادراج المباعة في الاسواق باحجام مختلفة تفي بالغرض..
نجي لمشكلة التسريحة:اذا كنت من النوع اللي يستخدم المكياج باستمرار وتحبين يكون قريب منك على طول جيبي لك سلة وسط حطيها على التسريحة ورتبي فيها المكياج اللي تستخدميه باستمرار فقط فقط... والباقي رتبيه في علبة او سلة في الدرج وخلي لك قارورتين عطر على التسريحة بالكثير وحطي فازة ناعمة عشان تفتح نفسك وبسسسسسس الباقي رتبيه في الادراج على راحتك ....والعلب راح تساعدك كثير في فرز الاشياء
فكرة: لو عندك علب جزم ممكن تستفيدين منها في تجميع الشراريب او البديهات او الاشياء الصغيرة الزايدة
ولو شايفة ان الغرفة ما تستوعب حتى بعد الترتيب طلعي التلفزيون اذا كان عندك والجزم (الله يكرمكم)
وبالنسبة للشرشف حاولي انك دايما تشترين شراشف بمطاط ويدخل تحت السرير مضبوط ويكون مقاسة مناسب يعني شوفي كم مقاس السرير واشتري على اساسه او ممكن تفرشين لحاف وليس شرشف خفيف.
نصيحة: عشان ترتاحين من الملابس الملقاة على الارض جيبي سلة غسيل كبيرة وحطيها جنب الدولاب او جنب الحمام عشان الملابس الوسخة على طول ترمينها فيها وعودي زوجك يسوي نفس الشي عشان ما يتراكم عليك الغسيل واول ما تمتلي غسلي على طول..

ما شاء الله البنات كفوا ووفوا...
...

بالنسبه للتسريحه نفس كلام اختي الشعاع المستتروتضعين كرتونين او اكثر داخل درج التسريحه وترتبين الاغراض اللي باقيه فيها
اما بالنسبه للشرشف ضعي اول شرشف قديم او جديد وضعي الشرشف الاساسي فوقه يمنع تزحلق الشرشف الاساسي
خزانة التصفيط اذ فيها وسع ضعي البجامات واروابة البيت
اما الدولاب ضعي التنانير مع بعض فستلاقين وسع تحتهم جيبي لك ادراج وخزني اغراضك فيهن
والاهم من هذا كله لازم جرد بين فتره واخرى
اتمنى اكون افدتك

اسمعي حبيبتي انامثلك ساكنه شقه واكن احسن منك اعرف اتصرف بالنسبه للغرفه حبيبتي اول حاجه قللي من الورود والمناظر الي في الغرفه وبعدين اشري لك شنطة مكياج شكله حلو اوحطيهم في علب للمكياج انا صراحه مسويه الاثنين مكياجي مره كثير وخلي التسريحه مافيها الا الشنطه وتحفه والباقي في الادراج والعلب تلقينهم عند سيتي بلازا او سيتي ماكس اوايكيا وترى ايكيا اغرضها كلها توفرلك اماكن مثل الخزانه حقتي واسعه شوي قسم التعليق وشريت منها ادراج من قماش بس تاخذ ينها وتعلقيهاداخل الخزانه وتحطين فيها ملابسك الداخليه وكذا وفرت لي مكان الادراج والادراج اتي حطي فيهم الحاجات المشوهه الغرفه مثل الكريمات والملابس الي نادر ماتستعمليها وعندهم تحفه على شكل كوخ توضع فوق الخزانه وهي بنفس الوقت عباره عن صندوق للاغراض

السلام عليكم أختي ..

أول شي لا تشيلين هم هذا وضع يحصل.. ويحصلي خصوصاً في الأوقات اللي تكون فيها نفسيتي تعبانه تلقين غرفتي محتاسه وكل شي فوق بعضه وشكلها يفشل .. مع انه غرفتي تقريباً 7 في 6 وأنا ما اقولج حجم غرفتي الا عشان تعرفين انه حجم الغرفه مش مهم المهم النفسية وأكرر النفسية .. وانسي انه الموضوع بعد موضوع شطارة لأنه مافي حد بيغفل كيف يصرف أموره إذا حاول ينفض بعض الأفكار السلبية من راسه وعزم انه يغير

أول شي رددي هالشيئين في بالج:-
حجم الغرفه مشكلة ولكن مب مشكلة ترتيب
أنا قادرة اني اغير من وضع غرفتي واخليها تكون أجمل.. وأرتب

لأن دام انتي في بالج انه العيب الرئيسي من الغرفة ما بتترتب

بعد ما ترددين هالعبارتين وتقتنعين فيهم.. حددي يوم يكون فيه زوجج غايب لفترة عن البيت فترة تكفييج تقلبين كل الأمور في الغرفة.. لأنه وجوده راح يكون له تأثير سلبي عليج خصوصاً انه عندج شعور من قبل انه حاط بباله انه الغرفة مش مرتبه!! (هذا عناد أنثوي عندنا يكون بالفطرة)

قبل لاتبتدين في الترتيب (وهذي نقطة مهمه لا تستهينين فيها) لازم يكون عندج حافز أو عامل تشجيع لأنه الغرفه اللحين مب عاجبتج بالتالي مابتعرفين من وين راح تبتدين!!

اشتري بعض الأغراض الجديدة (لأنه هالشي بيعطيج حافز ويحسسج انج مستعدة)

في حال ما توافق معاج يوم طلعة ومشتريات مب مهم سوي بعض الأشياء وأمثلة عليها:-

حددي

1- انا محتاجه شرشف أكبر! مب شرط تشترين شرشف متكامل في حال الميزانيه اللحين ما تسمح وبعد عشان ما تتكاسلين وتقولين بعدين لما يصير عندي فرصه! شرشف أبيض كبير (أو المفرش اللي يكون تحت) يكفي اللحين .. حتى لو ترسلين حد أييبه لج الخدامه السايق اختج صديقتج أي أحد!! وموجود حتى في أي جمعية أهم شي ماتتكاسلين دبريه.. وحطية على السرير وممكن تخيطين أطرافة من الزوايا خياطة خفيفة .. وفوقة تحطين مفرشج العادي..

2- التسريحه مليانه (البنات حطو حل جميل فوق وهو انج تستغلين المكان الفاضي اللي يكون تحت البلايز) بالتالي انتي محتاجه أدراج اللحين!! ما عندج فرصه تطلعين السوق هالوقت؟ ماعلينا لا تتكاسلين دبري حل بديل اخذي كرتون الماي فضيه وحطيه بالدولاب .. وحطي كل مكياجج والأشياء الزايده فيه"كحل مؤقت" أو "خطة مبدئية" ليش؟؟ عشان تزيلين العوائق اللحين وبشكل سريع هالشي بيخفف عليج عبء الترتيب بعدين! او خلينا نقول حركة تجريبيه هل فعلاً الدولاب بيكفي؟ أو هل هالحل عملي بالنسبة لج انتي؟ لأنه يمكن ينفع عند غيرج وعندج لا.
3- فكري بالحمام هل فيه مساحه؟ مثلاً الفوط هل في مجال يكون فيه مكان لوضع رفوف للفوط والروبات عشان يخف الحمل على الغرفه؟ كريمات الترطيب بعد فكري بالحمام اذا يكفيهم؟ وهل في مجال تستخدمين الخزانه وعليها مرايه بدال مراية الحمام عشان تستغلينها للكريمات؟؟ أي مساحات في الحمام استغليها بحيث تفصلين أغراض الحمام عن أغراض الغرفة.

4- زحمة الدولاب هل من الممكن أني أحط بلوزتين + تنورتين أو بنطلونين في علاقه وحده؟ بحيث أوفر مساحه لباقي ملابسي؟ أو هل في مجال أني أعلق شنط الإيد مع الملابس اللي تتماشى معاهم (أنا اسوي هالحركة عشان يكون اسهل علي عند الطلعه بحيث أني اعلق الشنطة البيضاء مثلاً في نفس العلاقة اللي عليها البلوزه البيضا مع تنورتها الفلانيه!!.. وساعات أعلق الشيلة معاهم .. تصير العلاقة الوحدة فيها أربع إلى خمس شغلات..

بالنسبة للملابس اللي تتحذف حطي علاقات على أطراف الدولاب من الخارج على الأطراف أو من الداخل في الأبواب!! بحيث يكون فيه مكان أول ما ينحذفون ينحطون هناك..

طبعاً أنتي من واقع معرفتج بأغراضج وغرفتج أكثر بتطلع عندج أفكار أكثر من هذي

اللحين فكرتي وحددتي ابدي في التنفيذ..

نبدا من التسريحة

أ)الكريمات والمكياجات والعطور في كرتون وعلى صوب
ب)بأيدج كيس زباله أو كيس عادي كبير للأشياء الثانيه اللي مالها تصنيف وخصوصاً الأشياء الصغيرة
ت)أي أوراق مجلات فواتير استخدامات ورقية احذفيهم بنص الغرفة مبدئياً لين تفرغين التسريحة.
ث)أدوات الشعر على صوب فوق التسريحة بما انها صارت فاضية.
ج)احتياجاتج الثانيه اللي بأدراج التسريحة سويلهم تصنيف.

اللحين كل شي مفرغ برا التسريحة .. نعيد الترتيب من البداية (وبعد التنظيف)
أدوات الشعر بالدرج الأول (بعد ما يتم تنظيفهم تنظيف سريع) لا تضيعين وقتج وانتي تنظفين تنظيف عميق عشان بتتعبين وتملين وانتي بعدج ما بديتي – وأنا عن نفسي أفضل الدرج اللي على اليمين في حال كانت الأدراج ناحيتين.

الدرج اللي على اليسار (الكحل وأدوات التزيين اليومية مثل روجاتج اليومية وكريمات النهار أو الحماية) أو أي شغلات تستخديمنها بشكل يومي.

وابدي تدرجي للأدراج اللي تحتهم كل ما قل استخدامج للشيء كل ما كان بأدراج سفلية وهكذا.

اللحين خلصتي الأساسيات اللي بالتسريحة

تعالي نرجع للأوراق والفواتير عندج خيارين اما تخصصين لهم درج بالتسريحة أو بالكومدينو (هو يفضل مكان بالكبت فوق بس اللي فهمته انه دولابج مليان ونحب يكون استخداماته أقل حالياً) .. أنتي حددي الأفضل

أنا عن نفسي عندي بطاقات المستشسفى والأوراق الفواتير والأدوية (مثل البندول والمسكنات حاطتهم بدرج واحد) بس مصنفتهم بعلب مفتوحة عشان ألقاهم بسرعه يوم الحاجة. وانا استخدم درج الكومدينو اللي بالجهة الأبعد لباب الغرفة.. وهالشي مخليني اعود نفسي دام بأيدي ورقة على طول احطها بهالدرج وبالتالي متى فكرت اني محتاجة ورقة أو بطاقة صرت عارفه وين بلقاهم (لأني من النوع اللي ينسى ويضيع).

اللحين تقريباً مش كلياً تقريباً صار لكل شي مكان!! نرجع عندج اللحين التسريحة حطي عليها عطوراتج اللي تستخدمينها بشكل دايم عطرين ثلاثه وصفيهم بجهة وحدة.. خلي مساحه شوي .. الجهة المقابلة حطي كريم ترطيب اليدين أو أي كريم انتي تستخدمينه بشكل دايم .. حاولي ما يتعدون الثلاثه عشان الشكل بعد.. البخور أو أي شي تحسينه ما يخرب الشكل والتنصيف الجمالي للتسريحة أضيفيه .. والأشياء الصغيرة على طول في الدرج الأول لأنها تسوي زحمة وصعب تتحصل .. بحيث يكون فيها مساحه لوضع أشياء للاستخدام العام .. يعني مشط وكريم مجلة .. كلينكس . إذا توفرت مساحة للأشياء هذي فاضية معناتها انتي في السليم وتسريحتج غير مكتضه..

باجر لا خذيتي كريم علاجي!! وحطيتيه على التسريحة يومين!! بتلقين نفسج تلقائياً ناقلته للدرج المخصص للأدوية..!! دام لكل شي مكان!! انتي في السليييييم

انا طولت عليج أدري بس خليني اقولج منطق عندي!! أنا ضد اللي يقول خلي التسريحة شكل جمالي ولاتحطين عليها الا شيئين ثلاثه!! لا التسريحة وضعت عشان تكون شيئ عملي والتكديس عليها قبل لا نعتبره شيء غير جمالي .. هو عيبه انه يأثر على قدرتنا على التعامل مع التسريحة يعني يروح الطابع العملي لها .. فتذكري انه التسريحة شي عملي ولا يضر مراعاة الجمالية فيه؟؟ عشان ما تلقين نفسج ترتبينها بشكل جمالي وبعد فترة لاشعورياً ترجع الأشياء تكتض لأنج بكل بساطة ما راعيتي انها غرفتج وهذي وتحتاجينها في أشياء عملية بعد!!


ولاتنسين نصيحتي لج لاتفكرين انج ترتبين غرفتج ترتيب مسكت مره وحده.. صنفي الأشياء في أماكن وتلقائياً راح تلقينها ترتبت..!!..

وطمنينا عليج