غريبة اطوار؟

السلام عليكم جميعاً !
انا بنت عاديه عمري ما اتعدى الـ ١٨ سنه
عندي مشكله معقدتني مره.. وما عرفت اذا الغلط مني او من ايش بالضبط
الهرجه ومافيها اني عجزت عجز تام بإني اتعرف او ابني علاقه مع اي احد من بنات الفصل او البنات اللي حولي بشكل عام
يعني احس اني مختلفه مدري ليه واحس اني فاقده الرغبه بإني اتعرف عليهم
يعني عادي اتكلم معاهم حق كم دقيقه بس.. لكن ما افضل اني اطور العلاقه اكثر من كذا
كل اللي اقابلهم احسهم غير عني من كل النواحي
سواء من الاسلوب، الاهتمامات، التفكير، النظره العامه لبعض الاشياء او الاشخاص او حتى التصرفات
امي دايما تعاتبني.. تحت مسمى انو ما راح اقدر اتعرف على احد مستقبلا وانو راح يجيني توحد وووو…
كلام كثير
وجاتني تساؤلات كثير برضو من بنات المدرسه زي.. ( ليه تحبي تجلسي لحالك؟ ، ليه انتي نفسيه ؟ ، ليه احسك غريبة اطوار؟ ، ليه ليه ليه… )
انزعج مره لما احد يسألني ذي الاسئله
ولو نرجع ورا قبل ٤ سنين، راح تشوفوا اني ماكنت كذا
كنت احب اتعرف او كنت احب اتعرف على بنتين فقط ويكون اقرب لي من اهلي
لكن يوم نقلت من مدرستي وشفت عقليات وشخصيات غير اللي كنت متعوده عليهم انعزلت لكن رجعت اتعرفت برضو
لكن… نقلت من مدرستي برضو للمره المليون وانعزلت وبعدها اتعرف على ٣ بنات
انا كنت المحبوبه بينهم
لدرجة انو وحده منهم سألتنا، ليه انتي اللي نحبك اكثر بس ؟
حسيت السؤال استفزازي او جاي من قهر مثلا
اتغاضيت عنه
مرت الايام وصارت مشكله كبيره، بعدت عن الشله وانعزلت لنفسي اخيرا
وهذي انا.. ما اروح المدرسه الا ومعاي كتابي عشان اتسلى فيه لكن لازلت اعاني من اتهامات التوحد والانطوائيه المزعجه
لكن برضو.. لقيت متعتي وانا لحالي!
هل انا غلطانه بأني عازله نفسي او تشوفوه شي عادي؟