الغريبة من المخبوزات اللى بحبها اوى وجربتها بكزا طريقة مكانتش بتطلع ناعمة زى بتاعة المحلات
لغاية ماوصلت للطريقة اللى تخليها دايبة ومعاها كل الاسرار والتكات
اولا عايزين نتفق على حاجة
الغريبة لا فيها بيكنج بودر ولا بيض ولا نشا
الغريبة دقيق وسمنة وسكر بودرة وبس
ندخل على المقادير
3 كوب دقيق
2 كوب سمنة
1 كوب سكر بودرة
والسمنة دى كانت زبدة صفرا وانا حولتها لسمنة عشان الغريبة لازم سمنة متنفعش بزبدة وهقولكم ع الطريقة فى الاخر
هنجيب بولا نحط فيها السمنة
نضربها بالمضرب كتير لغاية مايبقى لونها ابيض ويتضاعف حجمها
ونحط عليها السكر بودرة
ونضربهم بالمضرب
ونضيف الدقيق بالتدريج
لغاية ماتخلص كمية الدقيق ونضربهم هتكون مفرفتة بالشكل ده
نجمع العجينة بايدينا
شكلتها كور صغيرة وزينتها بالقرنفل
هدخلها الفرن وده شكلها لما طلعت وطبعا الغريبة لازم يكون لونها ابيض جدا
اولا بالنسبة لطريقة تحويل الزبدة الصفرا لسمنة
انا جبت كيلو زبدة صفراء حطتها فى حلة وحطيت
عليها قشطة كتير كنت مجمعاها حوالى 8 معالق كبار وشغلت عليهم نار هادية
اووووووووى وحطيت عليهم رشة ملح
وسبتهم ع النار لغاية ماندمجوا مع بعض وبقى لونهم دهبى وخلى
بالكم فيه ثانية بين حرق السمنة ولونها الدهبى ولما طفيت عليها سبتها
لغاية ماتبرد خالص وحطتها فى برطمان وطبعا كل اللبن والدقيق اللى فى الزبدة الصفرا اترسب تحت فى الحلة وبقى مورتة وبقى عندنا سمنة صافية
بالنسبة بقى لأسرار الغريبة لونها الابيض ونعومتها
اول شىء غريبة المحلات ياجماعة عشان نكون متفقين نص نية عشان كده بتكون بيضا وناعمة اوى وحتى مش بتحمر من تحت بس السر ده محدش بيصرح بيه
انتى يادوبك بتدخليها فى فرن البوتاجاز على حرارة اقل من
125 وبمجرد ماحجمها يكبر يعنى الكور تفرش تطلعيها من الفرن وبسرعة تشيليها
بحذر وتحطيها فى علبة مقفولة لأنك لو معملتيش كده هتلاقى
شكلها اتغير لانها بتكون طرية جدا والهوا خارج الفرن بيغير شكلها وبردو دى
من اسرار المحلات هما بيعملو كده
هتقولولى طيب ازاى نية يعنى احنا بناكلها نية هقولكم لاء انتى اول مابتخرجيها بتكمل سواها فى السخونية اللى فيها
تانى حاجة الغريبة مش عايزة سوا جامد لانها مفيهاش دقيق كتير
يارب موضوعى البسيط ده يكون عجبكم