غسالة اوتوماتيك للملابس الرقيقه خبراتكم ؟

السلام عليكم ورحمة الله

بنات الله يرضى عليكم احتاج لمعونه منكم ومساعده واللي بتدلني على اللي أبغاه بتكون فرجت عني كربه الله يفرج عليها دنيا واخره

السالفه هي اني 70% من الملابس اغسلها بأم حوضين لان الاوتوماتيك اللي عندي تخرب الملابس حتى لو استخدمت غسيل الملابس الرقيقه وتعدم لي الملابس واقل وقت هو 45 دقيقه لذلك اضطر لام حوضين
اما الاوتوماتيك اخليها للشراشف والمناشف والملابس الداخليه وحاجات بسيطه والباقي كله بام حوضين
حتى الثياب بالعاديه لان الاوتوماتيك اللي عندي خربت الياقات وحاست الدنيا
على فكره غسالتي جينيرال الكتريك ام عمود
وام حوضين ال جي

وانا بصراحه مليت وطقت كبدي وطفشت من ام حوضين هدت حيلي وأعلنت الاضراب عن الغسيل فيها
وقعدت ادور بالنت عن غساله اوتوماتيك يكون فيها خيار الغسيل اليدوي ولقيت ماركات كثيره لكن لما بديت أتبحر واتعمق بالمعلومات اكتشفت انهم مافيهم تحديد للوقت
يعني مقدر أحدد مدة النقع ومدة الغسيل ولقيت اقل مده 20 دقيقه وكانت غسالة ال جي يعني كأنك يابو زيد ماغزيت وبالتالي تحطمت ولا ادري وش اسوي
لذلك قررت استفسر منكم وانا متأكده انكم ماراح تخيبون ظني بإذن الله

اللي ابي اعرفه هل في غساله اوتوماتيك اقدر احدد المده يعني مثلا ابغى انقع الملابس بس خمس دقايق او 3 دقايق لان البلايز ماتتحمل اكثر من كذا
وهل اقدر احدد وقت الغسيل ويكون دقيقتين مثلا او دقيقه وبنفس الوقت مابي تنعصر يعني مجرد تنشطف من الصابون اطلعها وانشرها

يعني باختصار ابي انا اللي احدد المده مو الغساله هي اللي تحدد
ومو مهم تعبئه علويه ولا اماميه المهم أحصل فيها :الغسيل اليدوي , تحديد المده

الله يجزاكم خير وان شاء الله كلامي يكون مفهوم والله يفرج لكم ان شاء الله مثل ماتفرجون عني