غسالتي الlgدايركت درايف

شكلها زي غسالتي صوريها لي
بالنسبه لي استخدم صابون الملابس العادي
فتحت الكلوركس على حافة الغساله من فوق على جهة اليسار
اللي لازم يكون مرفوع عشان ماتنكب المويه
بس انت صوريها لي عشان اتأكد هي زي حقتي ولالا


🌸~~~~~~~~🌸~~~~~~~~🌸
اسألكم بالله اللي تقرأ توقعي
ان تدعون لي بالحمل فوالله اني بحاجة الدعاء اسعدكم الله بالدارين

مشكوره ع ردك رواسي والله يسعدك دنيا واخره.ويرزقك بالحمل الي يفرح قلبك.مااعرف انزل الصوره والاكان نزلتها مع استفساري هي بيضاء ومكتوب ع جنب بالانجليزي دايركت درايف وفتحتها اماميه ولوحه التحكم فيها بالوسط شي تفرينه وجنبه زراير صغار.وكيف ارفع الي ومتى انزله عشان تصرف غريبه ماقالي البايع ارفعي الي وفتحت الكلوركس هي فتحت الملين الزرقاء والاوين بالضبط.ببحث كيف انزل الصور وانزلها لك

وعليكم السلام ورحمة الله وبركاته

مبرووك عليك الغساله اختي والله يعطيك خيرها

بالنسبه للي حق التصريف( الهوز) مايحتاج ترفعينه وتنزلينه يدوي
اهو يكون مرتفع بطريقه مناسبه ومجرد ماتدخلينه في فتحة تصريف المياة الغساله تحتوي على دينمو يرفع الماي ويصرفه للخارج من نفسه

_ في حالة فتحة تصريف الماء عندك في الجدار مرتفعه تدخلين الهوز في الفتحة والغساله تتحكم في نفسها متى تحافظ عالماء او تصرفه.
_ في حالة ان فنحة التصريف عندك في الارضيه اتركي الهوز مثل ماجاء معلق بالخطافات في ظهر الغساله والدينمو راح يصرف الماء ويرفعه للاعلى وبينزل على ارضية غرفة الغسيل

* دروج المنظفات في الغسالة تحتوي ع 3 دروج
الاول حق الغسيل الاولي ( عني نادرا ما أستخدمه) اللي فيه شرطه وحده ( | )
والازرق حق الكمفورت
والاخير حق الغسيل الاعتيادي ( || )

المبيض : لايوجد له مكان محدد في الغسالة
عني ماأستخدمه ولا أحتاجه استخدم صابون الاريال او اومو للغسالات الاماميه لانه مايحتوي على الرغوة اللي ممكن تطفو وتخرب لك الغساله

بس فيه امكانيه ببساطه انك تضيفينه للغسيل وانا جربته عدة مرات عشان احصل على ملابس أنصع

الطريقه:
انك بعد ماتحطين الملابس وتشغلين البرنامج المراد مثلاا ( DELICATE عادة استخدمه للغسيل اليومي )
وتتضيفين الصابون والملطف تخلين الدرج حقهم مفتوح بجزء بسييط يسمحلك تشوفين تدفق الماء في الدرج
لما يوصل مرحلة ان الغسالة تضخ الماء في درج الصابون أبو شرطتين ( || ) امسكي علبة المبيض وحطي المقدار اللي تحتاجينه بشكل تدريجي في نفس درج الصابون وكذا يتخفف المبيض وينزل مع الصابون والماي ومايبقع الملابس عليك وسكري الدرج وخلي الغساله تتابع عملها

لاتخافين ما تتأخر الخطوة هذي اعتقد في الدقيقه الثانيه من تشغيل الغساله

بشكل مبسط بقولك عن استخدامي لهالغساله من اربع سنوات ولاواجهت اي مشكله والنتائج بالنسبه لي ممتازه

غسيل الملابس العادي برنامج DELICATE ومدته ساعه ودقيقتان وتطلع الملابس مغسوله نظيفه تنشيفها عادي مب قوي ولا مبلله تقطر ماي

الغسيل السريع QUICK ومدته 30 دقيقه لكن الملابس تطلع مبلوله كثير فأنا بعد ماأختار البرنامج الكويك اضغط ع زر ال SPIN واخلي عدد الدورات يوصل الى 1200 راح يزيد وقت الغسله من 30 دقيقه الى 35 دقيقه
وتطلع الملابس تقريبا 70 % ناشفه فأنا كذا اختصر كثير من الوقت اللي بيضيع في التجفيف

طيب الى هنا انتبهي ماأستخدمنا المجفف ابدا
الملابس اللي ابغى اجففهم اخليهم في الغساله واشغلها بدون ماأدور الساعه حق برامج الغسيل
اختار زر ال OPTION واتم اضغطه الين يوصلني لخيار DRY ONLY
يعني تجفيف فقط

بتلاحظين ان الفريره حق التجفيف ولعت ازرارها انتي تقومين تختارين الدقايق اللي تحتاجينها للتجفيف ان كانت غسله كبيره بتحتاجين من 60 الى 120 دقيقه
اذا قطع بسيطه ال 60 دقيقه تكفيك

عندك اخر شي برنامج ال DUVET وهذا خاص للمفارش والبطانيات والتلبيسات واي شي له حشوة خفيفه حتى المخدات اللي يصير تنغسل اغسلها فيه

انتبهي التجفيف فقط طاقتها 6كيلو يعني فقط للملابس البطانيات ماراح تقدرين تشغلين لها برنامج التجفيف الا اذا بس حشوات او تلبيسات

اي سؤال انا في الخدمه
دعواتك لي بالتوفيق في الدنيا والاخره

ماقصرتي حبيبتي الله يوفقك دنيا واخره عندي لك كم سوال ياليت تساعديني احس متوهقه حيل فيها امس غسلت بطانيه وفريت الساعه ع لحاف وطلع لي الوقت ساعه ونص وطلعت مبلوله يعني لازم نشر بس ماتقطر مي.وحطيت بعدها بدلتين لولدي واخترت خيار القطن طلع لي الغسيل4ساعات تخيلي وقت مره طويل ع بدلتين ابي الغسيل العادي للملابس مايطول وش احط الساعه عليه.وكمان ابي اسالك اذا خلصت غسيل اقفل المويا والااخليه موصله بالغساله ع طول.الله يجزاك خير