- أسعد الله مساكم
بدخل بلا مقدمات
انا انسانة في النقاش الحاد اصير ام دميعة
تخنقني العبرة وماعاد اقدر اتكلم ياليت ابكي واتكلم كان اهون لا خلاص العبرة لاخنقت خنقت وخلاص اسكت وماعاد اقدر انطق بحرف دايم اي نقاش حاد بيني وبين زوجي بالذات
ابكي يمكن لان الموضوع اللي اتكلم عنه دايم اكبته لين انفجر او لاني اخاف ردة فعله حتى لو كان احسها مو مبرر لهالغصة اللي مالها داعي ...مادري بنات وش يتفسر هالشي ؟ مين كانت مثلي وتغيرت ؟ لازم اقضي على هالمشكلة كمان لان زوجي من النوع اللي ماتمشي عليه الدموع وانا والله مو عشان ابيه يلين هذا عيب فيني اني لاناقشت نقاش حاد جدا اببكي ليه ليه ابي ادخل من الموضوع واخرج صامدة انا في بالي كلام يلين الحجر واقناع له بس لما اجي اخرجه هالعبرة تخرب كل شي وتقعد بقلبي والكلام يعشش بصدري
صرت يابنات مااقدر اواجهه واغلب المشكلات تصير ع الواتس بس بالنهاية انا انتصر > شفتو شلون عندي كلام يهد صخر بس مايخرج بلساني لكن بالقلم) ملكة قلم ( حلو سالفة مشاكل الواتس هدوء بضجيج داخلي😅 ولكن معقول عمري كله اعيش ع الواتس 😢 افرضوا تخاصمت مع غير زوجي و ابكي ؟ اصير ضعيفة مره بعين اللي قدامي هذا مو حل لاي مشكلة اساسا
حسيتها أليمة بحق نفسي ان صوتي مكبوت
كان الله في عون كل من ساعدني مين مر بحالة مثلي وعالج هالوضع تراها شينة يابنات 😭
رفع الله قدر من رفعت موضوعي لين نجد حل
واتوقع اغلبنا كذا والسبب
لانك متوقعه ان النقاش معه مافيه فايده ولا راح يسمع كلامك ولا يستجيب معك وتحسين بكلامه تسليك يعني وعوووود فقط
هذا اذا فكر يرد عليك
الشكوى على الله ياوخيتي والحمدالله على كل حال